على التوازي
8
پاكبوونەوەی نەخۆشی گولی
1كاتێك عیسا لە چیاكە هاتە خوارەوە، خەڵكێكی زۆر دوای كەوت. 2ئەوە بوو پیاوێكی گول#8‏:2 گول: یۆنانی: لەپرۆس. تەنها واتای گولی نادات، بەڵكو بۆ چەندین نەخۆشی پێست بەكارهێنراوە. هات، كڕنۆشی بۆ برد و گوتی: «گەورەم، ئەگەر بتەوێت، دەتوانیت پاكم بكەیتەوە.»
3عیساش دەستی بۆ درێژكرد و دەستی لێدا، فەرمووی: «دەمەوێت، پاك بەرەوە!» دەستبەجێ لە گولی پاك بووەوە. 4ئینجا عیسا پێی فەرموو: «ئاگاداربە، بە كەس مەڵێ، بەڵام بڕۆ خۆت بە كاهین پیشان بدە و ئەو قوربانییەی موسا فەرمانی كردووە بیكە، وەك شایەتییەك بۆیان.»
باوەڕی سەرپەلێك
5كاتێك عیسا چوو بۆ كەفەرناحوم، سەرپەلێك#8‏:5 وشە یۆنانییەكە مەبەست لە سەركردەی سەد سەربازە لە سوپای ڕۆم. هاتە لای، لێی پاڕایەوە 6و گوتی: «گەورەم، خزمەتكارەكەم بە ئیفلیجی لە ماڵەوە كەوتووە و ئازارێكی زۆری هەیە.»
7عیسا پێی فەرموو: «من دێم و چاكی دەكەمەوە.»
8سەرپەلەكەش وەڵامی دایەوە: «گەورەم شایانی ئەوە نیم خۆت بێیتە ماڵەكەم، بەڵكو تەنها وشەیەك بفەرموو خزمەتكارەكەم چاكدەبێتەوە. 9منیش مرۆڤێكم لەژێر دەسەڵاتدام، سەربازیشم لەژێر دەستدایە. بەمە دەڵێم: ”بڕۆ،“ دەڕوات؛ بەوی دیكەش دەڵێم: ”وەرە،“ دێت؛ بە كۆیلەكەشم دەڵێم: ”ئەمە بكە،“ دەیكات.»
10كاتێك عیسا گوێی لەمە بوو، سەرسام بوو، بەوانەی فەرموو كە دوای دەكەوتن: «ڕاستیتان پێ دەڵێم، لە ئیسرائیلدا باوەڕێكی بەهێزی ئاوام نەدیوە. 11پێتان دەڵێم كە خەڵكێكی زۆر لە ڕۆژهەڵات و ڕۆژئاواوە دێن و لەگەڵ ئیبراهیم و ئیسحاق و یاقوب لە شانشینی ئاسماندا لەسەر خوان دادەنیشن. 12بەڵام ڕۆڵەكانی شانشین#8‏:12 مەبەستی لە خەڵكی جولەكەیە. فڕێدەدرێنە تاریكی دەرەوە، جا لەوێ دەگریێن و جیڕەی ددانیان دێت.»
13ئینجا عیسا بە سەرپەلەكەی فەرموو: «بڕۆ! با هەروەك باوەڕت هێنا، بۆت ببێت.» جا لەو كاتەدا خزمەتكارەكەی چاك بووەوە.
چاككردنەوی خەسووی پەترۆس
14عیسا هاتە ماڵی پەترۆس، خەسووی پەترۆسی بینی كەوتووە، تای هەبوو. 15عیسا دەستی لە دەستی دا و تایەكە بەریدا. ئەویش هەستا و دەستی بە خزمەتكردنیان كرد.
16كاتێك ئێوارە داهات، زۆر كەسیان بۆ هێنا ڕۆحی پیسیان تێدابوو، ئەویش بە وشەیەك ڕۆحە پیسەكانی دەركرد و هەموو نەخۆشەكانی چاككردەوە. 17تاكو ئەوەی لە ڕێگەی پێغەمبەر ئیشایا گوتراوە بێتە دی كە دەڵێ:
[ئەو دەردەكانی ئێمەی هەڵگرت و
نەخۆشییەكانمانی برد.]#8‏:17 ئیشایا 53‏:4‏‏.
نرخی دوای عیسا كەوتن
18كاتێك عیسا خەڵكێكی زۆری لە دەوری خۆی بینی، فەرمانی دا بپەڕنەوە ئەوبەری دەریاچەكە. 19مامۆستایەكی تەورات هاتە لای، پێی گوت: «مامۆستا، بۆ كوێ بڕۆیت دوات دەكەوم.»
20عیساش پێی فەرموو: «ڕێوی كونی هەیە و باڵندەی ئاسمانیش هێلانە، بەڵام كوڕی مرۆڤ#8‏:20كوڕی مرۆڤ: مەسیح بەم نازناوە خۆی دەناسێنێت. بڕوانە دانیال 7‏:13‏-14.‏‏ جێیەكی نییە سەری لێ دابنێت.»
21یەكێكی دیكە لە قوتابییەكانی پێی گوت: «گەورەم، ڕێگام بدە یەكەم جار بچم باوكم بنێژم.»#8‏:21 مەبەستی ئەوەیە كە لەگەڵ باوكی بێت هەتا ئەو كاتەی دەمرێت.
22بەڵام عیسا پێی فەرموو: «دوام بكەوە، واز لە مردووان بهێنە با مردووەكانی خۆیان بنێژن.»
عیسا ڕەشەبا هێمن دەكاتەوە
23كاتێك عیسا سواری بەلەمەكە بوو، قوتابییەكانی دوای كەوتن. 24لەناكاو ڕەشەبایەكی بەهێز هەڵیكردە سەر دەریاچەكە، خەریك بوو شەپۆلەكان بەلەمەكە داپۆشن، بەڵام عیسا نوستبوو. 25ئینجا قوتابییەكانی چوون و هەڵیانستاند، گوتیان: «گەورەم، ڕزگارمان بكە! وا لەناودەچین!»
26ئەویش پێی فەرموون: «ئەی كەم باوەڕینە، بۆچی دەترسن؟» ئینجا هەستا، لە ڕەشەبا و دەریاچەكەی ڕاخوڕی، ئیتر بووە هێمنییەكی تەواو.
27ئەوانیش سەرسام بوون و گوتیان: «ئەمە چ مرۆڤێكە؟ تەنانەت با و دەریاش گوێرایەڵی دەبن!»
دەركردنی ڕۆحی پیس
28كاتێك عیسا گەیشتە ئەوبەر، لە هەرێمی گەدەرین، دوو كەسی تووشبوو ڕۆحی پیسیان تێدابوو، لە گۆڕستانەوە هاتبوونە دەرەوە. بە ڕادەیەك توندوتیژ بوون كە تەنانەت كەس نەیدەتوانی بەو ڕێگایەدا تێبپەڕێت. 29هاواریان كرد و گوتیان: «چیت لێمان دەوێ، ئەی كوڕی خودا؟ ئایا پێش وەخت بۆ ئێرە هاتوویت، تاكو ئەشكەنجەمان بدەیت؟»
30لە دووری ئەوانەوە ڕانە بەرازێكی گەورە دەلەوەڕان. 31ڕۆحە پیسەكانیش لێی پاڕانەوە و گوتیان: «ئەگەر دەرماندەكەیت، بماننێرە ناو ڕانە بەرازەكە.»
32ئەویش پێی فەرموون: «بڕۆن!» ئەوانیش هاتنە دەرەوە و چوونە ناو بەرازەكان، ئەوە بوو هەموو ڕانەكە بە خێرایی لە قەراغی شاخەكەوە بۆ ناو دەریاچەكە هەڵدێران و لە ئاوەكەدا خنكان. 33بەرازەوانەكانیش ڕایانكرد بۆ ناو شار و هەموو شتێكیان گێڕایەوە، بگرە ئەو ڕووداوەشیان گێڕایەوە كە بەسەر ئەوانەدا هاتبوو كە ڕۆحی پیسیان تێدابوو. 34ئەوە بوو شارەكە هەمووی بۆ بینینی عیسا هاتنە دەرەوە، كە بینییان، لێی پاڕانەوە لە ناوچەكەیان بچێتە دەرەوە.