على التوازي
24
پێشبینی وێرانبوونی پەرستگا
1عیسا لە پەرستگا هاتە دەرەوە، هێشتا لە ڕێگا بوو كاتێك قوتابییەكانی لێی هاتنە پێشەوە تاكو سەرنجی بۆ تەلارەكانی پەرستگا ڕابكێشن. 2وەڵامی دایەوە: «هەموو ئەمانە دەبینن؟ ڕاستیتان پێ دەڵێم: لێرە بەردی بەسەر بەردیەوە نامێنێت كە نەڕووخێت.»
نیشانەكانی كۆتایی سەردەم
3كاتێك لەسەر كێوی زەیتوون دانیشتبوو، قوتابییەكان بە تەنها هاتنە لای و گوتیان: «پێمان بفەرموو كەی ئەمە ڕوودەدات؟ نیشانەی هاتنەوەت و كۆتایی زەمان چییە؟»
4عیسا وەڵامی دایەوە: «ئاگاداربن، كەس چەواشەتان نەكات، 5چونكە زۆر كەس بە ناوی منەوە دێن و دەڵێن ”من مەسیحم،“ زۆر كەس چەواشە دەكەن. 6جەنگ و هەواڵی جەنگیش دەبیستن، وریابن مەتۆقن، چونكە دەبێت ئەمە ڕووبدات، بەڵام هێشتا كۆتایی نییە. 7نەتەوە لە نەتەوە ڕاست دەبێتەوە و شانشین لە شانشین، قاتوقڕی و بوومەلەرزەش لە شوێنی جیاجیا دەبێت. 8بەڵام ئەمانە هەمووی سەرەتای ژانەكانن.
9«ئینجا بۆ چەوسانەوە بە گرتنتان دەدەن و دەتانكوژن، هەموو نەتەوەكان لەبەر ناوی من ڕقیان لێتان دەبێتەوە. 10ئەو كاتە زۆر كەس لەڕێ لادەدەن و یەكتری بە گرتن دەدەن و ڕقیان لە یەكتری دەبێتەوە. 11زۆر پێغەمبەری درۆزن دەردەكەون، زۆر كەس چەواشە دەكەن. 12لەبەر زۆربوونی سەرپێچی، خۆشەویستی زۆر كەس سارد دەبێتەوە. 13بەڵام ئەوەی تاكو كۆتایی دانبەخۆیدا بگرێت، ڕزگاری دەبێت. 14ئەم مزگێنی پاشایەتییەش لە هەموو جیهاندا ڕادەگەیەنرێت، وەك شایەتییەك بۆ هەموو نەتەوەكان، ئینجا كۆتاییەكە دێت.
گەورەترین تەنگانە
15«لەبەر ئەوە كاتێك دەبینن [قێزەونی وێرانكەر]#24‏:15 دانیال 9‏:27؛ 11‏:31؛ 12‏:11‏‏ لە شوێنی پیرۆزدا ڕاوەستاوە، ئەوەی پێغەمبەر دانیال باسی كردووە، با خوێنەر تێبگات، 16ئینجا با ئەوانەی لە یەهودیان ڕاكەنە چیاكان، 17ئەوەی لە سەربانە با نەیەتە خوارەوە تاكو شتەكانی لە ماڵەوە ببات. 18هەروەها ئەوەی لە كێڵگەیە با نەگەڕێتەوە تاكو جلەكەی ببات. 19لەو ڕۆژانەدا قوڕبەسەر دووگیان و شیردەران! 20نوێژ بكەن با هەڵاتنتان لە زستان یان لە شەممەدا نەبێت، 21چونكە لەو كاتەدا تەنگانەیەكی وا گەورە ڕوودەدات، لە سەرەتای جیهانەوە هەتا ئێستا ئاوا نەبووە و نابێت.
22«ئەگەر ئەو ڕۆژانە كورت نەكرابوونایەوە، كەس ڕزگاری نەدەبوو. بەڵام لە پێناوی ئەوانەی هەڵبژێردراون، ئەو ڕۆژانە كورت دەكرێنەوە. 23ئەگەر ئەو كاتە یەكێك پێی گوتن: ”ئەوەتا مەسیح لێرەیە!“ یان: ”ئەوەتا لەوێیە!“ باوەڕ مەكەن، 24چونكە مەسیحە درۆزنەكان#24‏:24 كەسانێك بانگەشەی ئەوە دەكەن كە مەسیحن. و پێغەمبەرانی درۆزن دەردەكەون، نیشانەی گەورە و پەرجوو دەكەن، بە شێوەیەك ئەگەر بكرێ تەنانەت ئەوانەی هەڵبژێردراون چەواشە دەكەن. 25ئەوەتا پێشوەخت پێم گوتن.
26«لەبەر ئەوە ئەگەر پێیان گوتن: ”ئەوەتا لە چۆڵەوانییە!“ مەڕۆن، ”ئەوەتا لە ژوورەكانی ناوەوەیە!“ باوەڕ مەكەن، 27چونكە وەك چۆن هەورەتریشقە دێت و ڕووناكی دەدات لە ڕۆژهەڵاتەوە هەتا ڕۆژئاوا، هاتنەوەی كوڕی مرۆڤیش ئاوا دەبێت. 28كەلاك لەكوێ بێت، داڵ لەوێ كۆدەبێتەوە.
هاتنەوەی عیسا
29«دەستبەجێ دوای تەنگانەی ئەو ڕۆژانە،
«[خۆر تاریك دەبێت، مانگ ڕووناكییەكەی نادات،
ئەستێرەكان لە ئاسمان دەكەون،
تەنی ئاسمانی دەهەژێن.]#24‏:29 ئیشایا 13‏:10؛ 34‏:4‏‏
30«لەو كاتە نیشانەی كوڕی مرۆڤ لە ئاسماندا دەردەكەوێت، ئەوسا هەموو نەتەوەكانی زەوی شیوەن دەگێڕن، كوڕی مرۆڤ دەبینن بەسەر هەوری ئاسماندا بە هێز و شكۆیەكی گەورەوە دێت.#24‏:30 دانیال 7‏:13‏‏ 31فریشتەكانی بە كەڕەنایەكی دەنگ بەرزەوە دەنێرێت، لە ئاراستەی هەر چوار بایەكە ئەوانە كۆدەكەنەوە كە هەڵبژێردراون، لەم سەری ئاسمانەوە تاكو ئەوسەری.
لە دار هەنجیرەوە پەند وەرگرن
32«لە دار هەنجیرەوە پەند وەرگرن: كاتێك لقەكانی نەرم بوون و گەڵایان كرد، دەزانن هاوین نزیكە. 33بە هەمان شێوە، ئێوەش كە هەموو ئەم شتانەتان بینی، بزانن نزیكە و لە بەردەرگایە. 34ڕاستیتان پێ دەڵێم: ئەم نەوەیە بەسەرناچێت، هەتا هەموو ئەمانە نەیەنە دی. 35ئاسمان و زەوی بەسەردەچن، بەڵام وشەكانم هەرگیز بەسەرناچن.
كەس ئەو كاتە نازانێت
36«سەبارەت بەو ڕۆژ و كاتە كەس نایزانێت، نە فریشتەكانی ئاسمان و نە كوڕەكە، تەنها باوك نەبێت. 37ڕۆژانی نوح چۆن بوو، هاتنەوەی كوڕی مرۆڤیش ئاوا دەبێت. 38وەك چۆن لە ڕۆژانی پێش لافاوەكە دەیانخوارد و دەیانخواردەوە، ژنیان دەهێنا و مێردیان دەكرد، هەتا ئەو ڕۆژەی نوح چووە ناو كەشتییەكە، 39كەس نەیدەزانی چی ڕوودەدات، هەتا لافاوەكە هات و هەمووی برد. هاتنەوەی كوڕی مرۆڤیش ئاوا دەبێت. 40لەو كاتەدا دوو پیاو لە كێڵگە دەبن، یەكیان دەبردرێت و ئەوی دیكە بەجێدەهێڵدرێت. 41دوو ئافرەت دەستاڕ دەگێڕن، یەكیان دەبردرێت و ئەوی دیكە بەجێدەهێڵدرێت.
42«لەبەر ئەوە ئێشك بگرن، چونكە نازانن لە چ ڕۆژێكدا گەورەتان مەسیح دێتەوە. 43بەڵام ئەوەش بزانن: ئەگەر گەورەی ماڵ بزانێت لە چ كاتێكدا دز دێتە سەری، ئێشك دەگرێت و نایەڵێت ماڵەكەی ببڕدرێت. 44كەواتە ئێوەش ئامادە بن، چونكە كوڕی مرۆڤ لە كاتێكدا دێتەوە كە بیری لێ ناكەنەوە.
نموونەی كۆیلەی دڵسۆز
45«كەواتە ئەو كۆیلە دڵسۆز و ژیرە كێیە كە گەورەكەی كردوویەتی بە لێپرسراوی خزمەتكارانی دیكە تاكو لە كاتی خۆیدا خواردنیان بداتێ؟ 46خۆزگە دەخوازرێت بەو كۆیلەیە كاتێك گەورەكەی دێتەوە دەبینێت ئاوا دەكات. 47ڕاستیتان پێ دەڵێم: بەسەر هەموو ماڵەكەیەوە دایدەنێت. 48بەڵام ئەگەر ئەو كۆیلەیە خراپ بێت و لە دڵی خۆیدا بڵێ: ”گەورەكەم دوادەكەوێت،“ 49ئینجا دەست بكات بە لێدانی كۆیلە هاوكارەكانی و لەگەڵ سەرخۆشان بخوات و بخواتەوە. 50ئەوسا گەورەی ئەو كۆیلەیە لە ڕۆژێكدا دێتەوە كە چاوەڕێی ناكات و لە كاتژمێرێك كە نایزانێت. 51ئینجا پارچەپارچەی دەكات و بەشی لەگەڵ دووڕوواندا دادەنێت، جا لەوێ دەگریێت و جیڕەی ددانەكانی دێت.