على التوازي
20
نموونەی كرێكارانی ناو ڕەز
1«چونكە شانشینی ئاسمان لە گەورەی ماڵێك دەچێت، بەیانی زوو دێتە دەرەوە تاكو بچێت كرێكار بۆ ڕەزەكەی بگرێت. 2لەگەڵ كرێكارەكان ڕۆژی بە دینارێك ڕێككەوت، ئینجا ئەوانی بۆ ڕەزەكەی نارد.
3«نزیكی كاتژمێر نۆ#20‏:3 دەكاتە كاتژمێری سێیەم بە كاتی عیبری. دەستپێكردنی ڕۆژ و كاتژمێر لە كاتی عیبری كاتژمێر شەش بووە بە كاتی ئێستا. دووبارە چووە دەرەوە، لە مەیداندا هەندێكی دیكەی بینی بێكار ڕاوەستابوون، 4پێی گوتن: ”ئێوەش بڕۆنە ڕەزەكە، چەندتان بكەوێ دەتاندەمێ.“ 5ئەوانیش ڕۆیشتن.
«ئینجا كاتژمێر دوازدە و كاتژمێری سێ ڕۆیشتەوە و هەمان شتی كردەوە. 6نزیكی كاتژمێر پێنجی ئێوارە دیسان ڕۆیشت، كرێكاری دیكەی بینی ڕاوەستاون، لێی پرسین: ”بۆچی بە درێژایی ڕۆژ لێرە بێكار ڕاوەستاون؟“
7«وەڵامیان دایەوە: ”چونكە كەس بە كرێی نەگرتووین.“ ئەویش پێی گوتن: ”ئێوەش بڕۆنە ڕەزەكە!“
8«كاتێك ئێوارە داهات خاوەن ڕەزەكە بە سەركارەكەی خۆی گوت: ”كرێكارەكان بانگ بكە و كرێیەكانیان بدەرێ، لەوانەی كۆتاییەوە دەستپێبكە تاكو یەكەم.“
9«جا ئەوانەی كاتژمێر پێنج#20‏:9 یۆنانی: كاتژمێری یازدەیەم. هاتن، هەریەكە دینارێكیان وەرگرت. 10یەكەمینەكانیش هاتن و وایانزانی زیاتر وەردەگرن، بەڵام هەریەكە دینارێكیان وەرگرت. 11كە وەریاندەگرت بۆڵەبۆڵیان بەسەر خاوەن ماڵ دەكرد و 12دەیانگوت: ”دواهەمینەكان كاتژمێرێك ئیشیان كرد. تۆش لەگەڵ ئێمە یەكسانت كردن كە گرانی و گەرمای ڕۆژمان كێشاوە.“
13«وەڵامی یەكێكیانی دایەوە: ”برادەر، من غەدرم لێ نەكردوویت. ئایا لەگەڵ من بە دینارێك ڕێك نەكەوتوویت؟ 14هی خۆت ببە و بڕۆ. من دەمەوێت بەوەی دواهەمینیش وەك تۆی بدەمێ. 15ئایا بۆم نییە ئەوەی دەمەوێت بە ماڵی خۆمی بكەم؟ یان چاوت هەڵنایەت چونكە من چاكم؟“
16«بەم شێوەیە دواهەمین دەبنە یەكەمین و یەكەمینیش دەبنە دواهەمین.»
سێیەم باسی مردنی عیسا
17كاتێك عیسا بۆ ئۆرشەلیم سەردەكەوت، دوازدە قوتابییەكەی جیا كردەوە و بە ڕێگاوە پێی فەرموون: 18«ئەوا بۆ ئۆرشەلیم سەردەكەوین، كوڕی مرۆڤ دەدرێتە دەست كاهینانی باڵا و مامۆستایانی تەورات، ئەوانیش بڕیاری مردنی دەدەن و 19بۆ گاڵتە پێكردن و بە قامچی لێدان و لەخاچدان دەیدەنە دەست نەتەوەكان، لە ڕۆژی سێیەمیش هەڵدەستێنرێتەوە.»
خزمەتكار پایەبەرزترینە
20ئینجا دایكی كوڕەكانی زەبدی لەگەڵ كوڕەكانی هاتە لای و كڕنۆشی برد و داوای لێكرد شتێكی بۆ بكات.
21ئەویش پێی فەرموو: «چیت دەوێت؟» گوتی: «بفەرموو با هەردوو كوڕەكەم لە شانشینییەكەتدا یەكێكیان لەلای ڕاستت و ئەوی دیكەیان لەلای چەپت دانیشن.»
22عیسا وەڵامی دایەوە: «ئێوە نازانن داوای چی دەكەن. ئایا دەتوانن ئەو جامە#20‏:22 مەبەستی لەو ئازارەیە كە بەگوێرەی پلانی خودا لەسەر خاچ دەیچێژێت. بخۆنەوە كە من دەیخۆمەوە؟» وەڵامیان دایەوە: «دەتوانین.»
23ئەویش پێی فەرموون: «لە ڕاستیدا لە جامی من دەخۆنەوە، بەڵام دانیشتن لەلای ڕاست و چەپمەوە، بۆ من نییە بیدەم، بەوانە نەبێت كە باوكم بۆی ئامادە كردوون.»
24كاتێك دە قوتابییەكە بیستیان، لە دوو براكە تووڕە بوون. 25بەڵام عیسا بانگی كردن و فەرمووی: «دەزانن سەرۆك نەتەوەكان وەك میر فەرمانڕەواییان بەسەردا دەكەن و گەورەكانیان دەسەڵاتیان بەسەریاندا جێبەجێ دەكەن. 26جا لەنێو ئێوەدا ئاوا نابێت، بەڵكو ئەوەی دەیەوێت لەنێوتاندا پایەی بەرز بێت، با ببێتە خزمەتكارتان و 27ئەوەش كە دەیەوێ لەنێوتاندا ببێتە یەكەم، با ببێتە بەندەتان، 28هەروەك كوڕی مرۆڤ كە نەهاتووە تاكو خزمەت بكرێت، بەڵكو خزمەت بكات و ژیانی خۆی بەخت بكات بۆ كڕینەوەی خەڵكێكی زۆر.»
چاككردنەوەی دوو كەسی نابینا
29كاتێك عیسا و قوتابییەكانی ئەریحایان بەجێدەهێشت، خەڵكێكی زۆر دوای كەوت. 30ئەوە بوو دوو كەسی نابینا لە قەراغ ڕێگاكەدا دانیشتبوون، كاتێك گوێیان لێبوو عیسا وا بەوێدا دەڕوات، هاواریان كرد: «گەورەم، كوڕی داود، بەزەییت پێماندا بێتەوە.»
31جا خەڵكەكە سەرزەنشتیان كردن تاكو بێدەنگ بن، بەڵام ئەوان زیاتر هاواریان كرد: «گەورەم، كوڕی داود، بەزەییت پێماندا بێتەوە!»
32عیسا ڕاوەستا، بانگی كردن و فەرمووی: «چیتان دەوێت بۆتان بكەم؟»
33وەڵامیان دایەوە: «دەمانەوێت چاومان بكەیتەوە، گەورەم.»
34عیساش دڵی پێیان سووتا و دەستی لە چاویان دا، دەستبەجێ ڕۆشنایی هاتەوە چاویان و دوای كەوتن.