على التوازي
19
ژن هێنان و تەڵاقدان
1كاتێك عیسا لەم قسانە بووەوە، جەلیلی بەجێهێشت و هاتە هەرێمی یەهودیا، لە پشت ڕووباری ئوردون. 2خەڵكێكی زۆر دوای كەوت، ئەویش لەوێ چاكیكردنەوە.
3هەندێك فەریسی هاتنە لای بۆ ئەوەی تاقیی بكەنەوە، گوتیان: «ئایا دروستە مێرد لەبەر هەر هۆیەك بێت ژنەكەی تەڵاق بدات؟»
4عیسا وەڵامی دانەوە: «ئایا نەتانخوێندووەتەوە، ئەوەی لە سەرەتاوە بەدیهێناوە [بە نێر و مێ بەدیهێنان]#19‏:4 پەیدابوون 1‏:27.‏‏؟ 5هەروەها فەرمووی: [لەبەر ئەوە پیاو دایك و باوكی خۆی بەجێدەهێڵێت و بە ژنەكەیەوە دەنووسێت، ئیتر هەردووكیان دەبنە یەك جەستە.]#19‏:5 پەیدابوون 2‏:24‏‏ 6كەواتە چیتر دوو نین بەڵكو یەك جەستەن. لەبەر ئەوە ئەوەی خودا بە یەكتری گەیاندووە، با مرۆڤ جیای نەكاتەوە.»
7لێیان پرسی: «ئەی بۆچی موسا فەرمانی داوە تەڵاقنامە بدرێت و تەڵاق بكەوێت؟»
8پێی فەرموون: «لەبەر دڵڕەقیتان موسا ڕێی دان ژنەكانتان تەڵاق بدەن، ئەگینا لە سەرەتاوە وا نەبوو. 9بەڵام پێتان دەڵێم: ئەوەی بەبێ هۆی داوێنپیسی ژنەكەی خۆی تەڵاق بدات و یەكێكی دیكە بهێنێت، ئەوا داوێنپیسی دەكات.»
10قوتابییەكانی پێیان گوت: «ئەگەر حاڵی پیاو لەگەڵ ژن وابێت، باشترە ژن نەهێنێت!»
11بەڵام عیسا پێی فەرموون: «هەموو خەڵكی ناتوانن ئەم قسەیە پەسەند بكەن، تەنها ئەوانەی پێیان دراوە. 12خەساو هەن زگماكن، خەساویش هەن مرۆڤ خەساندویانن#19‏:12 لەو سەردەمە هەندێك لە پیاوە گەورەكان كۆیلەكانی خۆیان دەخەساند، تەنها بۆ كارپێكردن تەرخان دەكران.، خەڵكیش هەیە بڕیاریان داوە لە پێناوی شانشینی ئاسمان وەك خەساو بژین#19‏:12 باوەڕدار لە پێناوی خزمەتكردنی مەسیح بە ڕەبەنی دەمێنێتەوە.. كێ دەتوانێت پەسەندی بكات، با پەسەندی بكات.»
13ئینجا خەڵكی منداڵیان هێنایە لای عیسا تاوەكو دەستیان لەسەر دابنێت و نوێژ بكات، كەچی قوتابییەكان سەرزەنشتیان كردن.
14بەڵام عیسا فەرمووی: «لێگەڕێن منداڵان بێنە لام، ڕێیان لێ مەگرن، چونكە شانشینی ئاسمان هی وەك ئەمانەیە.» 15دەستی لەسەر دانان و لەوێ ڕۆیشت.
گەنجە دەوڵەمەندەكە
16ئینجا یەكێك هاتە لای و گوتی: «مامۆستا، چ چاكەیەك بكەم تاكو ژیانی هەتاهەتاییم هەبێت؟»
17عیسا وەڵامی دایەوە: «بۆچی لەبارەی چاكەوە پرسیارم لێ دەكەیت؟ تەنها یەكێك چاكە. بەڵام ئەگەر دەتەوێت بچیتە ناو ژیانەوە، ڕاسپاردەكان بەجێبگەیەنە.»
18پێی گوت: «كامیان؟»
عیساش فەرمووی: «[مەكوژە، داوێنپیسی مەكە، مەدزە، شایەتی درۆ مەدە، 19ڕێزی دایك و باوكت بگرە،]#19‏:19 دەرچوون 20‏:12‏-16 و دواوتار 5‏:16‏-20‏‏ هەروەها [نزیكەكەت وەك خۆت خۆشبوێت.]#19‏:19 لێڤییەكان 19‏:18‏‏»
20گەنجەكەش پێی گوت: «ئەمانەم هەمووی كردووە، ئیتر لە چیم كەمە؟»
21عیسا پێی فەرموو: «ئەگەر دەتەوێت تەواو بیت، بڕۆ سامانەكانت بفرۆشە و بیدە هەژاران، ئیتر گەنجینەیەكت لە ئاسماندا دەبێت و وەرە دوام بكەوە.»
22بەڵام گەنجەكە كە ئەم وشەیەی بیست، بە دڵتەنگییەوە ڕۆیشت، چونكە سامانێكی زۆری هەبوو.
23عیساش بە قوتابییەكانی فەرموو: «ڕاستیتان پێ دەڵێم: دەوڵەمەند بە سەختی دەچێتە ناو شانشینی ئاسمانەوە. 24دیسان پێتان دەڵێم: ئاسانترە وشترێك بە كونی دەرزییەكەوە بچێت لەوەی دەوڵەمەندێك بچێتە ناو شانشینی خوداوە.»
25قوتابییەكان كە گوێیان لەمە بوو زۆر سەرسام بوون، گوتیان: «كەواتە كێ دەتوانێت ڕزگاری بێت؟»
26عیساش سەیری كردن و فەرمووی: «ئەمە بۆ مرۆڤ مەحاڵە، بەڵام لەلای خودا هەموو شتێك دەبێت.»
27ئینجا پەترۆس وەڵامی دایەوە و پێی گوت: «ئەوەتا ئێمە وازمان لە هەموو شتێك هێناوە و دوات كەوتووین، ئێمە چیمان بۆ دەبێت؟»
28عیساش پێی فەرموون: «ڕاستیتان پێ دەڵێم، لە نوێبوونەوەدا#19‏:28 مەبەست لە كاتی ڕۆژی زیندووبوونەوەیە، كە هەموو شتێك سەرلەنوێ دروستدەكرێتەوە.، كاتێك كوڕی مرۆڤ لەسەر تەختی شكۆی خۆی دادەنیشێت، ئێوەش كە دوام كەوتوون لەسەر دوازدە تەخت دادەنیشن و دوازدە هۆزەكەی ئیسرائیل حوكم دەدەن. 29هەركەسێكیش لەبەر ناوی من، ماڵ یان برا یان خوشك یان دایك یان باوك یان منداڵ یان كێڵگەی بەجێهێشتووە، سەد ئەوەندە وەردەگرێتەوە و ژیانی هەتاهەتاییش بە میرات وەردەگرێت. 30بەڵام زۆر لە یەكەمینەكان دەبنە دواهەمین و دواهەمینەكانیش دەبنە یەكەمین.»