على التوازي
15
سەرپێچیكردنی ڕاسپاردەی خودا
1ئینجا فەریسی و مامۆستایانی تەورات لە ئۆرشەلیمەوە هاتنە لای عیسا و گوتیان: 2«بۆچی قوتابییەكانت نەریتی پیران دەشكێنن؟ پێش نانخواردن دەستیان ناشۆن!»
3ئەویش وەڵامی دانەوە: «ئەی بۆچی ئێوە لەبەر نەریتی خۆتان سەرپێچی لە ڕاسپاردەی خودا دەكەن؟ 4چونكە خودا فەرموویەتی: [ڕێزی دایك و باوكتان بگرن]#15‏:4 دەرچوون 20‏:12 و دواوتار 5‏:16‏‏، [ئەوەی نەفرەت لە باوكی یان دایكی بكات، دەبێت بكوژرێت.]#15‏:4 دەرچوون 21‏:17 و لێڤییەكان 20‏:9‏‏ 5بەڵام ئێوە دەڵێن: ”ئەگەر یەكێك بە دایك یان باوكی گوت: ’ئەوەی بەنیاز بووم بیدەمە ئێوە بۆ خودام تەرخان كردووە،‘ 6ئەو ئەركەی ناخەنە سەر كە ڕێزی دایك و باوكی بگرێت.“ جا لەبەر نەریتی خۆتان دەسەڵاتی ڕاسپاردەی خودا ڕەت دەكەنەوە. 7ئەی دووڕووان! سەبارەت بە ئێوە ئیشایای پێغەمبەر پێشبینی باشی كردووە و دەڵێت:
8«[ئەم گەلە بەسەر لێوان ڕێزم لێ دەگرێت،
بەڵام دڵی لێم دوورە.
9بەخۆڕایی دەمپەرستن،
تەنها ڕاسپاردەی مرۆڤانە فێری خەڵك دەكەن.]»#15‏:9 ئیشایا 29‏:13‏‏
ئەوەی مرۆڤ گڵاو دەكات
10عیسا خەڵكەكەی بانگكرد و پێی فەرموون: «گوێ بگرن و تێبگەن. 11ئەوەی دەچێتە ناو دەمەوە مرۆڤ گڵاو ناكات، بەڵكو ئەوەی لە دەم دێتە دەرەوە، ئەمە مرۆڤ گڵاو دەكات.»
12ئینجا قوتابییەكان هاتنە پێش و لێیان پرسی: «دەزانی كاتێك فەریسییەكان گوێیان لە قسەكە بوو بێزار بوون؟»
13وەڵامی دایەوە: «هەر ڕووەكێك باوكی ئاسمانیم نەیچاندبێت، هەڵدەكەنرێت. 14وازیان لێ بهێنن، ئەوانە كوێرن ڕابەرایەتی كوێرەكان دەكەن. ئەگەر كوێر ڕابەرایەتی كوێر بكات، هەردووكیان دەكەونە چاڵەوە.»
15پەترۆس پێی گوت: «ئەم نموونەیەمان بۆ ڕوون بكەوە.»
16عیسا فەرمووی: «ئێوەش هێشتا تێناگەن؟ 17نازانن هەرچی دەچێتە ناو دەم دەڕواتە ناو سك، دوایی فڕێدەدرێتە دەرەوە؟ 18بەڵام ئەوەی لە دەم دێتە دەرەوە، لە دڵەوە دێت، ئەمە مرۆڤ گڵاو دەكات، 19چونكە بیری خراپ لە دڵەوە دەردەچێت، كوشتن، داوێنپیسی، بەدڕەوشتی، دزی، شایەتی درۆ، كفركردن. 20ئەمانە مرۆڤ گڵاو دەكەن. بەڵام خواردن بەبێ دەست شوشتن مرۆڤ گڵاو ناكات.»
باوەڕی ژنێكی كەنعانی
21عیسا لەوێ ڕۆیشت و چوو بۆ ناوچەكانی سور و سەیدا. 22ژنێكی كەنعانی خەڵكی دەوروبەری ئەوێ، بەرەو ڕووی هات و هاواری كرد: «گەورەم، كوڕی داود، بەزەییت پێمدا بێتەوە! كچەكەم بە خراپی ڕۆحی پیسی تێدایە.»
23بەڵام عیسا بە وشەیەكیش وەڵامی نەدایەوە. قوتابییەكانی هاتنە پێشی و تكایان لێی كرد: «بەڕێی بكە، وا بەدوامانەوە هاوار دەكات.»
24وەڵامی دایەوە: «من تەنها بۆ مەڕە ونبووەكانی ماڵی ئیسرائیل نێردراوم.»
25بەڵام ژنەكە هات، كڕنۆشی بۆ برد و گوتی: «گەورەم یارمەتیم بدە!»
26وەڵامی دایەوە: «ناشێت نانی منداڵان ببڕدرێت و فڕێبدرێت بۆ سەگ.»
27ژنەكە گوتی: «ڕاستە گەورەم، بەڵام سەگیش لەو پاشماوەیە دەخوات كە لە خوانی گەورەكانی بەردەبێتەوە.»
28ئینجا عیسا وەڵامی دایەوە: «خانم، باوەڕی تۆ بەهێزە! ئەوەی داوای دەكەیت با بۆت ببێت.» لەو كاتەوە كچەكەش چاك بووەوە.
ناندانی چوار هەزار كەس
29ئینجا عیسا لەوێ ڕۆیشت و هاتە لای دەریاچەی جەلیل، چووە سەر شاخێك و لەوێ دانیشت. 30ئەوە بوو خەڵكێكی زۆر هاتنە لای، شەل و كوێر و گۆج و لاڵ و زۆری دیكەشیان لەگەڵ بوو، لەبەرپێی دایاننان، ئەویش چاكیكردنەوە. 31تەنانەت خەڵكەكە سەرسام بوون كە بینییان لاڵ قسە دەكات و گۆج چاكدەبێتەوە و شەل دەڕوات و كوێر دەبینێت، جا ستایشی خودای ئیسرائیلیان كرد.
32ئینجا عیسا قوتابییەكانی بانگكرد و فەرمووی: «دڵم بەو خەڵكە دەسووتێت، ئەوە سێ ڕۆژە لەگەڵمدان و هیچیان نییە بیخۆن. ناشمەوێت بە برسیێتی بیاننێرمەوە، نەوەك لە ڕێگا بڕ نەكەن.»
33قوتابییەكانی وەڵامیان دایەوە: «لەم چۆڵەوانییە ئەو نانە زۆرەمان لەكوێ بوو بۆ ناندانی ئەم هەموو خەڵكە؟»
34عیساش پێی فەرموون: «چەند نانتان پێیە؟»
گوتیان: «حەوت، لەگەڵ چەند ماسییەكی بچكۆلە.»
35ئیتر فەرمانی دا خەڵكەكە لەسەر زەوی دانیشن. 36حەوت نان و ماسییەكانی برد، سوپاسی خودای كرد و لەتی كردن و دایە قوتابییەكان، قوتابییەكانیش دایانە خەڵكەكە. 37هەموو خواردیان و تێربوون، دوایی حەوت سەبەتەی پڕ پەلكەنانیان كۆكردەوە. 38نانخۆران چوار هەزار پیاو بوون، بێجگە لە ژن و منداڵ. 39ئینجا عیسا خەڵكەكەی بەڕێكرد و سواری بەلەم بوو و هاتە سنووری مەگەدان.