على التوازي
16
داواكردنی نیشانەی ئاسمانی
1فەریسی و سەدوقییەكان هاتنە لای عیسا بۆ ئەوەی تاقی بكەنەوە، داوایان لێكرد نیشانەیەكی ئاسمانییان پیشان بدات.
2وەڵامی دایەوە: «كە ئێوارە داهات، دەڵێن ”ساماڵە، چونكە ئاسمان سوور هەڵگەڕاوە،“ 3سەر لە بەیانیش، ”ئەمڕۆ هەورە، ئاسمان سوور هەڵگەڕاوە و ڕووگرژە.“ ئێوە دەزانن ڕووی ئاسمان بخوێننەوە، بەڵام ناتوانن نیشانەكانی زەمانە لێكبدەنەوە! 4نەوەیەكی بەدكار و داوێنپیس داوای نیشانە دەكات، نیشانەی نادرێتێ، جگە لە نیشانەی یونس.» ئینجا بەجێی هێشتن و ڕۆیشت.
5كاتێك قوتابییەكان گەیشتنە ئەوبەری دەریاچەكە، لەبیریان چووبوو لەگەڵ خۆیان نان ببەن. 6عیسا پێی فەرموون: «وریابن، ئاگاداری هەویرترشی فەریسی و سەدوقییەكان بن.»
7لەناو خۆیاندا گفتوگۆیان كرد و گوتیان: «لەبەر ئەوەیە كە نانمان نەهێناوە.»
8عیسا زانی و پێی فەرموون: «ئەی كەم باوەڕینە، بۆچی لەنێو خۆتان دەڵێن نانمان نییە؟ 9ئایا هێشتا تێنەگەیشتوون؟ نایەتە بیرتان پێنج نانەكەی پێنج هەزارەكە و چەند سەبەتەشتان هەڵگرتەوە؟ 10یان حەوت نانەكەی چوار هەزارەكە و چەند سەبەتەشتان هەڵگرتەوە؟ 11چۆن تێناگەن من باسی نانم بۆ نەكردن؟ لە هەویرترشی فەریسی و سەدوقییەكان ئاگاداربن!» 12ئینجا تێگەیشتن كە ئەو لە هەویرترشی نان ئاگاداریان ناكاتەوە، بەڵكو لە فێركردنی فەریسی و سەدوقییەكان.
پەترۆس دان بە مەسیحدا دەنێت
13كە عیسا گەیشتە ناوچەی قەیسەرییەی فیلیپۆس، لە قوتابییەكانی پرسی: «ئایا خەڵك دەڵێن كوڕی مرۆڤ كێیە؟»
14گوتیان: «هەندێك دەڵێن یەحیای لەئاوهەڵكێشە، هەندێكی دیكە دەڵێن ئەلیاسە، هەندێكیش یەرمیا یان یەكێك لە پێغەمبەران.»
15پێی فەرموون: «ئەی ئێوە دەڵێن من كێم؟»
16شیمۆن پەترۆس وەڵامی دایەوە: «تۆ مەسیحیت، كوڕی خودای زیندووی.»
17عیساش وەڵامی دایەوە: «شیمۆنی كوڕی یۆنا، خۆزگەت پێ دەخوازرێت، چونكە گۆشت و خوێن ئەمەیان بۆت ئاشكرا نەكرد، بەڵكو ئەو باوكەم كە لە ئاسمانە. 18منیش پێت دەڵێم، تۆ پەترۆسی#16‏:18 پەترۆس بە زمانی یۆنانی واتە بەرد. و لەسەر ئەم بەردە كۆمەڵەی#16‏:18 یۆنانی: كڵێسا. خۆم بنیاد دەنێم كە دەروازەكانی دۆزەخ#16‏:18 مەبەست لەوەیە كە دوژمن لە بەهێزترین خاڵی خۆی ناتوانێت بەرەنگاری كڵێسا ببێتەوە و هەرگیز كڵێسا تێكناشكێت. پێی ناوێرێت.#16‏:18 مەبەست لەوەیە كە كڵێسا نامرێت. 19كلیلەكانی شانشینی ئاسمانت دەدەمێ، ئەوەی تۆ لەسەر زەوی گرێی بدەیت، لە ئاسماندا گرێدراو دەبێت، ئەوەی تۆ لەسەر زەوی بیكەیتەوە، لە ئاسماندا كراوە دەبێت.» 20ئینجا فەرمانی دایە قوتابییەكان بە كەس نەڵێن كە ئەو مەسیحە.
یەكەم باسی مردنی عیسا
21لەو كاتەوە عیسا دەستی بە ڕوونكردنەوە كرد بۆ قوتابییەكانی كە دەبێت بچێتە ئۆرشەلیم، لەوێ بە دەستی پیران و كاهینانی باڵا و مامۆستایانی تەورات زۆر ئازار بچێژێت و بكوژرێت و لە ڕۆژی سێیەم هەستێنرێتەوە.
22پەترۆس هێنایە ئەم لاوە و دەستی كرد بە سەرزەنشتكردنی: «خودا نەكات گەورەم! هەرگیز ئەمەت بەسەرنەیەت!»
23عیسا ئاوڕی دایەوە و بە پەترۆسی فەرموو: «لەبەرچاوم لاچۆ، ئەی شەیتان! تۆ كۆسپی لەبەردەمم، چونكە بیر لە شتە خوداییەكان ناكەیتەوە، بەڵكو شتی مرۆڤانە.»
خۆ ئامادەكردن بۆ مردن
24ئینجا عیسا بە قوتابییەكانی فەرموو: «ئەگەر یەكێك ویستی دوام بكەوێت، با نكۆڵی لە خۆی بكات و خاچەكەی هەڵبگرێت و دوام بكەوێت. 25ئەوەی بیەوێت ژیانی خۆی ڕزگار بكات، دەیدۆڕێنێت، بەڵام ئەوەی لە پێناوی من ژیانی خۆی بدۆڕێنێت، دەیدۆزێتەوە. 26چی بەكەڵكی مرۆڤ دێت ئەگەر هەموو جیهان بباتەوە و خۆی بدۆڕێنێت؟ یان مرۆڤ بۆ كڕینەوەی خۆی چی دەدات؟ 27كوڕی مرۆڤ بە شكۆی باوكییەوە لەگەڵ فریشتەكانی خۆی دەگەڕێتەوە، ئەوسا پاداشتی هەركەسێك بەپێی كرداری دەداتەوە. 28ڕاستیتان پێ دەڵێم: هەندێك لەوانەی لێرە ڕاوەستاون، مردن ناچێژن تاكو كوڕی مرۆڤ نەبینن بە شانشینەكەیەوە دێتەوە.»