على التوازي
13
نموونەی جوتیارێك
1هەر لەو ڕۆژەدا عیسا لە ماڵ هاتە دەرەوە و لە كەناری دەریاچەی جەلیل دانیشت. 2خەڵكێكی ئێجگار زۆر لێی كۆبووەوە، هەتا وای لێهات چووە ناو بەلەمێك دانیشت، هەموو خەڵكەكەش لە كەنارەكە ڕاوەستان. 3بە نموونە باسی زۆر شتی بۆ كردن و فەرمووی: «جوتیارێك چووە دەرەوە تۆو بكات. 4كە تۆوی دەوەشاند، هەندێكی كەوتنە سەر ڕێگا، باڵندەش هاتن و خواردیانن. 5هەندێكیش كەوتنە سەر زەوییەكی بەردەڵان كە خۆڵی كەم بوو، خێرا سەریان دەركرد، چونكە زەوییەكەی قووڵ نەبوو. 6بەڵام كە ڕۆژ هەڵهات سووتان و وشك بوون، چونكە ڕەگیان نەبوو. 7هەندێكیشیان كەوتنە نێو دڕكان، دڕكەكان گەورە بوون و خنكاندیانن. 8بەڵام هەندێكیان كەوتنە سەر زەوییەكی باش و بەرهەمیان دا، هەندێك یەك بە سەد و هەندێك یەك بە شەست و هەندێكیش یەك بە سی. 9ئەوەی گوێی هەیە، با ببیستێت!»
بۆچی عیسا بە نموونە دەدوێت؟
10قوتابییەكان هاتن و لێیان پرسی: «بۆچی بە نموونە قسەیان بۆ دەكەیت؟»
11وەڵامی دانەوە: «لەبەر ئەوەی بە ئێوە دراوە نهێنی شانشینی ئاسمان بزانن، بەڵام بەوان نەدراوە، 12چونكە ئەوەی هەیەتی، پێی دەدرێت و لێی دەڕژێ، بەڵام ئەوەی نییەتی، تەنانەت ئەوەی هەشیەتی لێی دەسەنرێتەوە. 13لەبەر ئەوە بە نموونە قسەیان بۆ دەكەم:
«چونكە سەیر دەكەن، بەڵام نابینن،
گوێ دەگرن، بەڵام نابیستن و تێناگەن.
14پێشبینییەكەی ئیشایا لەواندا هاتە دی، كە دەفەرموێ:
[ئێوە هەمیشە دەبیستن بەڵام هەرگیز تێناگەن،
ئێوە هەمیشە سەیر دەكەن بەڵام هەرگیز نابینن.
15چونكە دڵی ئەم گەلە ڕەق بووە و
گوێیان قورس بووە،
چاویان نوقاندووە،
نەوەك بە چاویان ببینن و
بە گوێیان ببیستن،
بە دڵیان تێبگەن و بگەڕێنەوە،
منیش چاكیان بكەمەوە.]#13‏:15 ئیشایا 6‏:9‏-10‏‏
16بەڵام ئێوە، خۆزگە دەخوازرێت بە چاوتان، چونكە دەبینن، بە گوێتان، چونكە دەبیستن. 17ڕاستیتان پێ دەڵێم: زۆر پێغەمبەر و پیاوچاك بە ئاواتەوە بوون ئەوە ببینن كە ئێوە دەیبینن بەڵام نەیانبینی، ئەوەش ببیستن كە ئێوە دەیبیستن، بەڵام نەیانبیست.
ڕوونكردنەوەی نموونەكە
18«كەواتە گوێ لە واتای نموونەی جوتیارەكە بگرن: 19هەركەسێك پەیامی شانشین ببیستێت و تێینەگات، شەیتان#13‏:19 یۆنانی: خراپەكارەكە. دێت و ئەوەی لە دڵیدا تۆوكراوە دەیڕفێنێت. ئەمانە ئەو تۆوانەن كە كەوتنە سەر ڕێگاكە. 20ئەوانەی كەوتنە سەر بەردەڵانەكە، ئەو كەسانەن كە پەیامەكە دەبیستن و بە خۆشییەوە وەریدەگرن. 21بەڵام ڕەگ داناكوتن و كاتین، كاتێك لەبەر پەیامەكە تووشی تەنگانە و چەوسانەوە دەبن، یەكسەر دەكەون. 22ئەوانەش كە كەوتنە نێو دڕكەكان، ئەو كەسانەن كە پەیامەكە دەبیستن، بەڵام خەمی ژیان و فریوخواردنی دەوڵەمەندی پەیامەكە دەخنكێنن، ئیتر بێ بەرهەم دەبن. 23بەڵام ئەوانەی كەوتنە سەر زەوییە باشەكە، ئەو كەسانەن كە پەیامەكە دەبیستن و لێی تێدەگەن. یەك بە سەد و یەك بە شەست و یەك بە سی، بەرهەم دەدەن.»
نموونەی گەنم و زیزان
24نموونەیەكی دیكەی بۆ هێنانەوە: «شانشینی ئاسمان لە مرۆڤێك دەچێت، تۆوی چاك لە كێڵگەكەی بچێنێت. 25بەڵام كاتێك خەڵك نوستبوون، دوژمنەكەی هات و لەناو گەنمەكەدا زیزانی چاند و ڕۆیشت. 26كاتێك گەنمەكە ڕوا و گوڵی دەركرد، زیزانەكەش دەركەوت.
27«كۆیلەی خاوەن ماڵ هاتن و پێیان گوت: ”گەورەم، ئایا لە كێڵگەكەتدا تۆوی چاكت تۆو نەكرد؟ ئیتر ئەم زیزانە لەكوێوە هات؟“
28«ئەویش وەڵامی دانەوە: ”دوژمن ئەمەی كردووە.“ كۆیلەكانیش پێیان گوت: ”دەتەوێ بچین زیزانەكان بژار بكەین؟“»
29گوتی: «”نەخێر، نەوەك لەگەڵ بژاركردنی زیزان، گەنمیش هەڵبكێشن. 30هەتا كاتی دروێنە لێگەڕێن با بەیەكەوە پێبگەن، جا لە كاتی دروێنەدا بە سەپانەكان دەڵێم، یەكەم جار زیزانەكە بژار بكەن و بیانكەنە مەڵۆ#13‏:30 مەڵۆ: دەسكە زیزان (زیوان) و دەغڵ. بۆ ئەوەی بسووتێنرێن، بەڵام گەنمەكە لە ئەمبارەكەم كۆبكەنەوە.“»
نموونەی دەنكە خەردەل
31نموونەیەكی دیكەی بۆ هێنانەوە: «شانشینی ئاسمان وەك دەنكە خەردەل#13‏:31 ڕووەكێكە لە وڵاتی فەلەستین دەڕوێت، بەرزییەكەی لە ماوەی ساڵێك لە ڕواندنی دەگاتە نزیكەی 3 بۆ 4 مەتر. وایە، كە یەكێك بیهێنێت و لە كێڵگەكەیدا بیچێنێ، 32كە بچووكترین تۆوە، بەڵام كاتێك گەشە دەكات، گەورەترین ڕووەكە و دەبێتە درەخت، تەنانەت باڵندەی ئاسمانیش دێن و لەسەر لقەكانیدا هێلانە دەكەن.»
نموونەی هەویرترش
33نموونەیەكی دیكەی بۆ هێنانەوە: «شانشینی ئاسمان لە هەویرترشێك#13‏:33 هەویرترش: هەوێن، خومرە. دەچێت، ئافرەتێك هێنای و كردییە ناو سێ پێوانە#13‏:33 یۆنانی: سێ ساتا، واتە 22 لیتر. ئاردەوە، هەتا هەمووی هەڵهات.»
34عیسا هەموو ئەمانەی بە نموونە بۆ خەڵكەكە باسكرد، بەبێ نموونە قسەی بۆ نەدەكردن، 35تاكو ئەوەی خودا لە ڕێگەی پێغەمبەرەكەوە فەرموویەتی بێتە دی:
[بە نموونە دەمم دەكەمەوە،
ئەوەی لە دامەزراندنی جیهانەوە شاراوەیە دەریدەبڕم.]#13‏:35 زەبوورەكان 78‏:2‏‏
ڕوونكردنەوەی نموونەی زیزان
36ئینجا خەڵكەكەی بەڕێكرد و گەڕایەوە بۆ ماڵ. قوتابییەكانی هاتنە لای و گوتیان: «نموونەی زیزانی ناو كێڵگەكەمان بۆ لێكبدەوە.»
37وەڵامی دایەوە: «ئەوەی تۆوە چاكەكەی چاند، كوڕی مرۆڤە. 38كێڵگەكەش جیهانە، تۆوە چاكەكەش ڕۆڵەكانی شانشینن، زیزانەكەش ڕۆڵەكانی شەیتانن، 39دوژمنەكەش كە تۆوی كردن ئیبلیسە، دروێنەكەش كۆتایی زەمانە#13‏:39 مەبەست هاتنەوەی مەسیحە كاتێك لەسەر زەوی حوكم دەكات.، سەپانەكانیش فریشتەكانن.
40«هەروەك چۆن زیزانەكە بژاركرا و بە ئاگر سووتێنرا، لە كۆتایی زەمانیشدا وا دەبێت. 41كوڕی مرۆڤ فریشتەكانی دەنێرێت، هەموو كۆسپ و سەرپێچیكاران لە شانشینییەكەی كۆدەكەنەوە و 42فڕێیان دەدەنە ناو كوورەی ئاگرەوە، جا لەوێ دەگریێن و جیڕەی ددانیان دێت. 43ئەوسا ڕاستودروستان لە شانشینی باوكیاندا وەك ڕۆژ دەدرەوشێنەوە. ئەوەی گوێی هەیە، با ببیستێت!
نموونەی گەنجینە و مرواری
44«شانشینی ئاسمان لە گەنجینەیەك دەچێت لە كێڵگەیەكدا شاردرابێتەوە. یەكێك دۆزییەوە و شاردییەوە، لە خۆشیان دەچێت و هەرچی هەیە دەیفرۆشێت و ئەو كێڵگەیەی پێ دەكڕێت.
45«هەروەها شانشینی ئاسمان لە بازرگانێك دەچێت بە شوێن مرواری نایابدا دەگەڕا. 46كاتێك مروارییەكی گرانبەهای بینی، چوو هەرچیی هەبوو فرۆشتی و مروارییەكەی كڕی.
نموونەی تۆڕ
47«هەروەها شانشینی ئاسمان لە تۆڕێك دەچێت فڕێدرابێتە دەریاچەوە، لە هەموو جۆرەكانی ماسی كۆدەكاتەوە. 48كاتێك تۆڕەكە پڕ بوو، ماسیگرەكان ڕایانكێشایە كەنار، باشەكانیان لە سەبەتەدا كۆكردەوە و خراپەكانیشیان فڕێدا. 49كۆتایی زەمانیش ئاوا دەبێت: فریشتەكان دێن و بەدكاران لەناو ڕاستودروستاندا دەردەهێنن و 50فڕێیان دەدەنە ناو كوورەی ئاگرەوە. جا لەوێ دەگریێن و جیڕەی ددانیان دێت.»
51عیسا لێی پرسین: «ئایا هەموو ئەمانە تێگەیشتن؟»
وەڵامیان دایەوە: «بەڵێ.»
52جا پێی فەرموون: «لەبەر ئەوە هەر مامۆستایەكی تەورات كە دەبێت بە قوتابی لە شانشینی ئاسمان، لە خاوەن ماڵێك دەچێت لە گەنجینەكەیدا نوێ و كۆن دەربهێنێت.»
ڕەتكردنەوەی عیسا
53كاتێك عیسا ئەم نموونانەی تەواو كرد لەوێ ڕۆیشت. 54هاتەوە شارەكەی خۆی، لە كەنیشتەكەیان فێری كردن، هەتا ئەوەی سەرسام بوون و گوتیان: «ئەمە ئەم دانایی و پەرجووانەی لەكوێ بوو؟ 55ئەمە كوڕی دارتاشەكە نییە؟ ئەی دایكی ناوی مریەم نییە؟ یاقوب و یوسف و شیمۆن و یەهوزا برای نین؟ 56ئەوە نییە خوشكەكانی هەموویان لەلامانن؟ ئەی ئەمە هەموو ئەمانەی لەكوێ بوو؟» 57جا ڕەتیان كردەوە.
بەڵام عیسا پێی فەرموون: «پێغەمبەر بێ ڕێز نییە، تەنها لە شار و ماڵی خۆی نەبێت.»
58لەوێدا پەرجووی زۆری نەكرد، لەبەر بێباوەڕییان.