على التوازي
12
گەورەی ڕۆژی شەممە
1لەو كاتەدا، لە ڕۆژی شەممەدا عیسا بەناو دەغڵدا تێدەپەڕی، قوتابییەكانی برسییان بوو، دەستیان بە گوڵەگەنم پرواندن و خواردنی كرد. 2كە فەریسییەكان بینییان، پێیان گوت: «تەماشا بكە، ئەوەی قوتابییەكانت دەیكەن دروست نییە لە شەممەدا بكرێت.»
3ئەویش پێی فەرموون: «ئایا نەتانخوێندووەتەوە داود چی كرد#12‏:3 بڕوانە یەكەم ساموئێل 21‏:6.‏‏، كاتێك خۆی و ئەوانەی لەگەڵی بوون برسییان بوو؟ 4چۆن چووە ناو ماڵی خودا و نانی تەرخانكراوی#12‏:4 ئەم نانە پێشكەشی خودا كراوە لە پەرستگا و بۆی تەرخانكراوە، تەنها كاهینان بۆیان هەبوو لەو نانە بخۆن. بڕوانە دەرچوون 25‏:30‏‏. خوارد، كە بۆ ئەو و ئەوانەی لەگەڵی بوون دروست نەبوو بیخۆن، تەنها بۆ كاهینان نەبێ؟ 5یان لە تەوراتدا نەتانخوێندووەتەوە كە هەرچەندە كاهینان بەهۆی ئەركیان لە پەرستگا لە ڕۆژانی شەممەدا ڕاسپاردەی ڕۆژی شەممە دەشكێنن بەڵام بە بێتاوان دادەنرێن؟ 6پێتان دەڵێم، مەزنتر لە پەرستگا لێرەیە. 7بەڵام ئەگەر واتای ئەوەتان بزانیایە: [من میهرەبانیم دەوێ نەك قوربانی،]#12‏:7 هۆشەع 6‏:6‏‏ ئەوا بێتاوانتان تاوانبار نەدەكرد، 8چونكە كوڕی مرۆڤ گەورەی ڕۆژی شەممەیە.»
چاككردنەوەی نەخۆش لە شەممە
9لەوێ ڕۆیشت و هاتە كەنیشتەكەیان، 10ئەوە بوو پیاوێك دەستێكی وشك بوو. بۆ ئەوەی فەریسییەكان بتوانن سكاڵای لێ بكەن، لێیان پرسی: «ئایا لە شەممەدا چاككردنەوە دروستە؟»
11پێی فەرموون: «كێ لە ئێوە ئەگەر مەڕێكی هەبێت و لە شەممەدا بكەوێتە چاڵێك، ئایا نایگرێت و دەریناهێنێت؟ 12مرۆڤ چەند لە مەڕ بەنرخترە! كەواتە لە شەممەدا چاكەكردن دروستە.»
13ئینجا بە پیاوەكەی فەرموو: «دەستت درێژ بكە.» ئەویش درێژی كرد و چاك بووەوە، وەكو ئەوەی دیكە. 14بەڵام فەریسییەكان كە هاتنە دەرەوە، تەگبیریان كرد چۆن لەناوی ببەن.
بەندەی هەڵبژێردراوی خودا
15عیساش بەمەی زانی، لەوێ ڕۆیشت و خەڵكێكی زۆر دوای كەوتن، ئەویش هەموویانی چاككردەوە و 16ئاگاداری كردنەوە ئاشكرای نەكەن، 17تاكو ئەوەی لە ڕێگەی پێغەمبەر ئیشایا گوتراوە بێتە دی كە دەڵێت:
18[ئەوەتا خزمەتكارەكەم، ئەوەی هەڵمبژاردووە،
خۆشەویستم كە پێی دڵشادم،
ڕۆحی خۆمی دەخەمە سەر،
جاڕی دادپەروەری بۆ نەتەوەكان دەدات.
19شەڕ ناكات و هاوار ناكات،
كەسیش لە شەقامدا دەنگی نابیستێت.
20قامیشێكی كوتراو ناشكێنێت،
پڵیتەیەكی پرتەپرتكەر ناكوژێنێتەوە،
تاكو دادپەروەری بە سەركەوتن دەگەیەنێت.
21نەتەوەكان هیوایان بە ناوی ئەو دەبێت.]#12‏:21 ئیشایا 42‏:1‏-4‏‏
عیسا و شای ڕۆحە پیسەكان
22ئینجا پیاوێكیان بۆ هێنا ڕۆحی پیسی تێدابوو، ئەویش نابینا و لاڵ بوو، چاكیكردەوە هەتا ئەوەی لاڵەكە قسەی كرد و بینی. 23خەڵكەكە هەموو سەرسام بوون و گوتیان: «ئەمە كوڕی داود نییە؟»
24بەڵام فەریسییەكان كە ئەمەیان بیست، گوتیان: «ئەمە ڕۆحی پیس دەرناكات، مەگەر بە بەعل‌زەبولی#12‏:24 بڕوانە پەراوێزی مەتا 10‏:25‏‏ شای ڕۆحە پیسەكان نەبێت.»
25بەڵام عیسا بە بیركردنەوەی ئەوانی زانی، پێی فەرموون: «هەر شانشینێك دووبەرەكی تێدابێت، وێران دەبێت، هەر شارێك یان ماڵێك دووبەرەكی تێدابێت، خۆی ڕاناگرێت. 26ئەگەر شەیتان، شەیتان دەربكات، ئەوا دووبەرەكییان تێدایە، كەواتە چۆن شانشینییەكەی خۆی ڕادەگرێت؟ 27ئەگەر من بە بەعل‌زەبول ڕۆحی پیس دەربكەم، ئەی كوڕەكانتان#12‏:27 مەبەستی لە قوتابییەكانیانە. بە كێ دەریاندەكەن؟ لەبەر ئەوە ئەوان دەبنە دادوەرتان. 28بەڵام ئەگەر من بە ڕۆحی خودا ڕۆحی پیس دەربكەم، ئەوا پاشایەتی خودا هاتووەتە سەرتان.
29«یان چۆن یەكێك دەتوانێ بچێتە ماڵی بەهێزێك و شتەكانی تاڵان بكات، ئەگەر زوو نەیبەستێتەوە، ئینجا ماڵەكەی تاڵان بكات؟
30«ئەوەی لەگەڵ من نییە لە دژی منە، ئەوەش لەگەڵ من كۆناكاتەوە، بڵاو دەكاتەوە. 31لەبەر ئەوە پێتان دەڵێم: هەموو گوناە و كفركردنێكی مرۆڤ دەبەخشرێت، بەڵام كفركردن سەبارەت بە ڕۆحی پیرۆز نابەخشرێت. 32ئەوەی قسە لە دژی كوڕی مرۆڤ بكات، دەبەخشرێت، بەڵام ئەوەی قسە لە دژی ڕۆحی پیرۆز بكات، نابەخشرێت، نە لەم دنیایە و نە لەو دنیا.
دار بە بەرهەمی دەناسرێت
33«دار بە بەرهەمەكەی دەناسرێتەوە. ئەگەر دار باش بێت، بەرهەمی باش دەدات، ئەگەر دار خراپ بێت، بەرهەمی خراپ دەدات. 34ئەی بێچووە ماران، كە ئێوە خراپ بن، چۆن دەتوانن بە چاكە بدوێن؟ دەم ئەوە دەڵێت كە لە دڵ دەڕژێتەوە. 35مرۆڤی چاك لە گەنجینەی چاك شتی چاك دەردەهێنێت، مرۆڤی خراپیش، لە گەنجینەی خراپ، شتی خراپ دەردەهێنێت. 36بەڵام پێتان دەڵێم: هەر وشەیەكی پووچ كە خەڵك پێی دەدوێ، لە ڕۆژی لێپرسینەوەدا حیسابی خۆی هەیە، 37چونكە بە وشەكانی خۆت بێتاوان دەكرێیت، بە وشەكانی خۆشت تاوانبار دەكرێیت.»
نیشانەی یونسی پێغەمبەر
38ئینجا هەندێك مامۆستای تەورات و فەریسی وەڵامیان دایەوە و گوتیان: «مامۆستا، دەمانەوێ نیشانەیەكت لێ ببینین.»
39كەچی وەڵامی دانەوە: «نەوەیەكی بەدكار و داوێنپیس#12‏:39 لێرەدا مەبەست لە مانای مەجازی داوێنپیسییە، بەو واتایەی كە گەلی خودا دڵسۆز نەبوون بۆ خودای یاقوب و سەرپێچی فەرمانەكانیان كردووە. داوای نیشانە دەكات، بەڵام نیشانەی نادرێتێ، جگە لە نیشانەی یونسی پێغەمبەر. 40هەروەك چۆن یونس سێ شەو و سێ ڕۆژ لەناو سكی ماسییەكی گەورەدا بوو، ئاواش كوڕی مرۆڤ سێ شەو و سێ ڕۆژ لە ناخی زەویدا دەمێنێتەوە. 41خەڵكی نەینەوا لە ڕۆژی لێپرسینەوەدا، لەگەڵ ئەم نەوەیە لە مردن هەڵدەستنەوە و تاوانباری دەكەن، چونكە تۆبەیان كرد كاتێك یونس پەیامی خودای ڕاگەیاند. ئەوەتا لە یونس مەزنتر لێرەیە. 42شاژنی باشوور#12‏:42 شاژنی باشوور: مەبەست شاژنە بەلقیسە كە لە سەردەمی حەزرەتی سلێمان فەرمانڕەوای یەمەن بوو. لە ڕۆژی لێپرسینەوەدا لەگەڵ ئەم نەوەیە لە مردن هەڵدەستێتەوە و تاوانباری دەكات، چونكە لەوپەڕی زەوییەوە هات بۆ گوێگرتن لە دانایی سلێمان. ئەوەتا لە سلێمان مەزنتر لێرەیە.
گەڕانەوەی ڕۆحی پیس
43«كاتێك ڕۆحی پیس لە مرۆڤێك دەردەچێت، لە شوێنە وشكەكاندا بەدوای حەوانەوەدا دەگەڕێت و دەستی ناكەوێت. 44ئینجا دەڵێت: ”دەگەڕێمەوە بۆ ماڵەكەی خۆم كە لێی دەرچووم.“ كاتێك دەگەڕێتەوە دەبینێت چۆڵە و گسكدراوە و ڕێكخراوە. 45ئەوسا دەچێت و حەوت ڕۆحی پیسی دیكە لە خۆی خراپتر لەگەڵ خۆی دەهێنێت، دەچنە ژوورەوە و لەناو ئەو مرۆڤە دەژیێن. ئینجا كۆتایی ئەو مرۆڤە لە جاران خراپتر دەبێت. بۆ ئەم نەوە بەدكارەش، ئاوا دەبێت.»
دایك و براكانی عیسا
46لە كاتێكدا كە عیسا قسەی بۆ خەڵكەكە دەكرد، دایك و براكانی لە دەرەوە ڕاوەستابوون، داوایان دەكرد لەگەڵی بدوێن. 47یەكێك پێی گوت: «وا دایك و براكانت لە دەرەوە ڕاوەستاون، دەیانەوێ لەگەڵت بدوێن.»
48ئەویش وەڵامی قسەكەری دایەوە: «دایكم كێیە و براكانم كێن؟» 49ئینجا دەستی بۆ قوتابییەكانی ڕاكێشا و فەرمووی: «ئەوەتا دایك و براكانم، 50چونكە ئەوەی بە خواستی باوكم بكات كە لە ئاسمانە، ئەوا خوشك و برا و دایكمە.»