मत्ति 17
17
इसुको जिउ फेरिन्हाका
(मरकुस ९:२-१३; लुका ९:२८-३६)
1इङकोको तु दिनान्हुअ्सो इसु पत्रुस, याकुब रो वाको ओने युहन्नाहेङ खिनिङ दोसाङ चुमपुतेङ झाउका आरदाङर्हुता हानिहि। 2एम्बालाइको आगाता वाको गोताङ जिउ फेरेन्हातेङ र्हाइ बेलाभाइपाङ चिल्काहि रो वाको धाबा बुङ साने भाइपा जेल्हाल्हाहि। 3कालाउ ओदोङघरि मोसा रो एलिया देखाल पितेङ इसुदोफा काथा पालि तेङहि। 4इदोइ तिङतेङ पत्रुस इसुहेङ दोअ्हि, “ओइ प्रभु, केलाइ इता हिका रेम्का जेङहि। नाङको इछा हिनु का इता सुमलोङ हिका थामे बान्हायाङका। एलोङ नाङको भाअ्सिङ, एलोङ मोसाको भाअ्सिङ रो एलोङ एलियाको भाअ्सिङ।”
5पत्रुस धुइकाधुइकाताङ, चोलका बादेल एम्बालाइहेङ थुम्हि रो इङको बादेलसो एलोङ गाला हिङहि, “या काङको मोन्दाताका चान, याकोदोफा का हेन्जाङ लेङचाघा, याको काथा हिङसु।”#सिरजाइ २२:२; ले २:७; यासाइया ४२:१; मत्ति ३:१७; १२:१८; मरकुस १:११; लुका ३:२२; न्याम १८:१५; २ पत्रुस १:१७-१८ 6जेलाउ चात्यागेलाइ इदोइ हिङहि, कालाउ एम्बालाइ थितेङ पोम्भेलेहि। 7कालाउबुङ इसु लोतेङ एम्बालाइहेङ साइतेङ दोअ्हि, “ल्होसु, माथिसु।” 8जेलाउ एम्बालाइ ताइको मिँ तोल्हेहि, कालाउ इसु बाहेक एम्बालाइ बो हासुहेङ मातिङहि।
9कालाउ आरदाङसो लेता खुअ्काताङ पालाउ इसु चात्यागेलाइहेङ दोअ्हि, “जेलाउथिकापा का द्याङको चान सिकासो मासिन्हुपाधाउ, नेलाइ इदोइ दरसनको काथा हासुहेङ मादोअ्सु।”
10कालाउ चात्यागेलाइ वासेहेङ एसा दोअ्तेङ हिअ्हि, “कालाउ हाइपालि धरम मास्टरगेलाइ लाम्फा एलिया लोलिगोयाङ दोअ्तेङ दोअ्खे?”#मलाकि ४:५ 11इसु एम्बालाइहेङ दोअ्हि, “एलिया जातिङको दोङ ल्वावा रो वा गोताङ काथा आरोङ रुजुपावा। 12कालाउबुङ का नेलाइहेङ दोअ्खा, ‘एलिया लाम्फादोङ लोलिदोहोइ, कालाउ द्याङगेलाइ वासेहेङ मानाल्हि रो एम्बालाइ वासेहेङ मनलागि पाहि। एन्सा दोङ का द्याङको चान बुङ एम्बालाइको खुरसो पिर भोगिलि गोयाङका।’”#मत्ति ११:१४ 13कालाउ वा चिभुअ्लि पिका युहन्नाको बारेता एम्बालाइहेङ दोअ्का दोअ्तेङ चात्यागेलाइ गिहि।
इसु मासान खोअ्का जामालहेङ एल्पाका
(मरकुस ९:१४-२९; लुका ९:३७-४३)
14इसु चात्यागेलाइदोफा द्याङको चेअ्सुमेअ्सुका हिका थामेता थुकालिलोकान्हुअ्सो एअ्मि द्याङ वाको आगाता लोतेङ तिर्हो थोतेङ दोअ्हि, 15“प्रभु, काङको चानहेङ दायापि, हाइपानु इङकोहेङ झाकालोङकाबेथा खोअ्का हि रो बारका पिर भोगिदोङखे। वा जेलाउ मेता वाङखे, जेलाउ चिता दुल्खे। 16का इङकोहेङ नाङको चात्यागेलाइकोता चुमाघा, कालाउबुङ एम्बालाइ इङकोहेङ एल्पालि मादोहि।” 17कालाउ इसु दोअ्हि, “ओइ खान्धुर मान्थुका रो दुरजन खालको द्याङगेलाइ, हेअ्लाउथिकापा का नेलाइको दोफा ह्याङका? हेअ्लाउथिकापा का नेलाइहेङ सहितेङ हिलि? इङकोहेङ इता काङकोता चुमासु।” 18इसु इङकोता हिका मासानहेङ हाकाराइहि रो इङको ओल्हितेङ हानिहि। कालाउ इङको वाजान ओदोङघरि एल्हि।
19कालाउ चात्यागेलाइ इसुकोता सिपापा लोतेङ दोअ्हि, “केलाइ इङकोहेङ हाइपालि ओल्हिपालि मादोन्हाहि?” 20इसु एम्बालाइहेङ दोअ्हि, “नेलाइको खान्धुर आतुइसा हिनाङसिङ एसा जेङका हि। जातिङको, का नेलाइहेङ दोअ्खा, नेलाइता एलोङ पासाइको चालाइ झोको खान्धुर हिनु इदोइ आरदाङहेङ ‘इतासो हाने’ दोअ्नु इङको हानावा। नेलाइको भाअ्सिङ जेङलि मादोका हाइदोङ मान्थु।#मत्ति २१:२१; १ कोरिन्थि १३:२; मरकुस ११:२३ 21[कालाउबुङ इदोइ खालको मासान चाहिँ पारथाना रो म्हितुपाङ माहिसा ओल्हिपालि मादोखे।]”
इसु आरोङ ताइको सिका काथा पाका
(मरकुस ९:३०-३२; लुका ९:४३-४५)
22जेलाउ ओबालाइ गालिल माउजाता जोम्हि कालाउ इसु एम्बालाइहेङ दोअ्हि, “का द्याङको चान द्याङगेलाइको खुरता पिन्हावा। 23एम्बालाइ कासेहेङ सेअ्तावा, कालाउबुङ का सिकासो सुमनिता सिन्हुतेङ ल्होपान्हाङका।” इदोइ काथा हिङतेङ चात्यागेलाइ हेन्जाङ मन तु:पाहि।
इसु थानको तिरो तिरिका
24जेलाउ ओबालाइ कफरनहुमता लोहि, थानको तिरो ल्होपाकालाइ पत्रुसकोता लोतेङ दोअ्हि, “हाइ नेलाइको मास्टर तिरो मातिरिखे?”#दामालाअ्का ३०:१३; ३८:२६ 25वा दोअ्हि, “तिर्यावा, हाइपालि मातिर्यावा?” पत्रुस साअ्ता दुल्कान्हुअ्सो इसु वासेहेङ दोअ्हि, “सिमोन, नाङको बिचार हाइ हि? दुनियाको राजागेलाइ तिरो हासुसो ल्होपाखे? ताइको चानगेलाइसो ना बोगेलाइसो?” 26पत्रुस दोअ्हि, “बोगेलाइसो।” इसु वासेहेङ दोअ्हि, “एन्सानु एम्बालाइको चानगेलाइचाहि तिरो तिरिलि मागोयावा। 27कालाउबुङ एम्बालाइ केलाइसो चेरमाताम्पाको दोअ्तेङ, चावान्दिता हानितेङ बल्सि थो रो लाम्फा देका हाया चुमा। इङकोको नुइ हेलाउ ना एलोङ रुपाको टाका निनाना। इङको चुमपुतेङ नाङको रो काङको भाअ्सिङ एम्बालाइहेङ पि।”
المحددات الحالية:
मत्ति 17: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
