मत्ति 18
18
झाराङखान्तेङ बारका हासु?
(मरकुस ९:३३-३७; लुका ९:४६-४८)
1इङको पहर चात्यागेलाइ इसुकोता लोतेङ हिअ्हि, “स्वरगको सारभिता झाराङखान्तेङ बारका हासु हि?”#लुका २२:२४ 2वा एअ्मि आतुङका जामालहेङ काइतेङ एम्बालाइको माझाता जाअ्पाहि 3रो दोअ्हि, “जातिङको, का नेलाइहेङ दोअ्खा, मन फेरिन्हातेङ नेलाइ आतुइका जामालाइभाइपा माजेङसुन्हा पानु हेअ्लाउ स्वरगको सारभिता मादुलस्वाना।#मरकुस १०:१५; लुका १८:१७ 4जाइ इदोइ आतुइका जामालभाइपाङ ताइमिहेङ नोइका बान्हाइखे, इङको स्वरगको सारभिता झाराङखान्तेङ बारका जेनावा। 5जाइ काङको मिङता इस्का जामालहेङ बान्सा बुझायावा, इङको कासेहेङ दोङ बान्सा बुझायावा।
पापता वालापाका काथागेलाइ
(मरकुस ९:४२-४८; लुका १७:१-२)
6 “कालाउबुङ हासुङ कार्हुता खान्धुर पाका इदोइ म्हुइकालाइता एअ्मिहेङ जाचता वालापालि भोखे पानु वा परमेस्वरसो निङका दार खान्तेङ ते इङकोको निरघाता बारका उन्ठुइको जान्ता धेउपितेङ इङकोहेङ वाङखाराका जाहादिता दुबिपालि रेम्का जेनावा। 7धिकार, इदोइ दुनियाको द्याङगेलाइहेङ जाइ बोमिहेङ बुङ जाचता वालापालि भोखे। कालाउबुङ धिकार, इङको द्याङहेङ जाइसो पाप पालि जाच लोखे।
8 “नाङको खुर माकुनु खोकोइ नासेहेङ पाप पालि लागाइखे पानु इङकोहेङ पोतेङ थालगिल। न्हेलोङ खुर खोकोइ रो जिउसुदाङ हेअ्लाउ मासिका मेता थालन्हाकाखान्तेङ ते भुरुङ दुन्ड्या रो नेङगारा जेङतेङ हेअ्लाउ मामुअ्का जिबन निङलि दोङ रेम्का ज्यावा। #
मत्ति ५:३०
9नाङको मिँ नासेहेङ पाप पालि लागाइनु इङकोहेङ ओल्हिपातेङ थालगिल। न्हेलोङ मिँ चुम्तेङ नरकको मेता थालन्हाकाखान्तेङ ते भुरुङ कान्हा जेङतेङ मानासाका जिबन निङलि नाङको भाअ्सिङ रेम्का ज्याङ।#मत्ति ५:२९
राम्का भेराको उदारन
(लुका १५:३-७)
10 “होस पातेङ हिसु, नेलाइ इदोइ म्हुइकालाइता एअ्मिहेङ बुङ आनादर मापासु। हाइदोनु का नेलाइहेङ दोअ्खा, एम्बालाइको रेखदेख पाका स्वरगदुतगेलाइ स्वरगता हितेङ हिका काङको परमेस्वर आबाको आगाता दिनाङ हिखे। #
लुका १९:१०
11[हाइदोनु का द्याङको चान रामकालाइहेङ बान्चिपालि लोका हिघा।]
12 “नेलाइ हाइ बिचार पासुखेना? हिदिङ द्याङको एअ्साइ भेराता एलोङ भेरा खेङन्हातेङ हानिनु, वा एलोङ कम एअ्साइहेङ घोका थामेताङ लाअ्धितेङ इङको खेङन्हातेङ हानिका एलोङहेङ भोलि मान्हावा कुनु? 13जातिङको का नेलाइहेङ दोअ्खा, वा इङकोहेङ निङनु, इदोइ खेङन्हातेङ मान्हेका एलोङ कम एअ्साइखान्तेङ इङको एलोङको भाअ्सिङ वा हेन्जा लेङचावा। 14एसादोङ स्वरगता हिका नेलाइको आबाको इदोइ इछा हि, इदोइ म्हुइकालाइता एअ्मि बुङ मामुअ्ताको।
कसुर पाका ओनेको उदारन
(लुका १७:३)
15 “नाङको ओने नाङको खिलापता कसुर पाका हिनु, हानितेङ नेलाइ न्हेमि खिनिङ हिलाउ वाको दुस तिङपापि। वा नाङको काथा हिङनु, ना ताइको ओनेहेङ मानिपान्हा। #
लुका १७:३
16कालाउबुङ वा माहिङनु ताइमिदोफा एअ्मि न्हेमिहेङ चुमपुतेङ वासेहेङ गावाइ हाइदोनु धरमकिताबता दोअ्का भाइपा न्हेमि माकुनु सुमिको दासिसो गोताङ काथा पाक्का ज्याको।#न्याम १९:१५ 17इङको एम्बालाइको काथा बुङ हिङलि माकिअ्नु, मन्डलिहेङ दोअ्। इङको मन्डलिको काथा बुङ हिङलि माकिअ्नु, वासेहेङ पाप रो तिरो ल्होपाकाभाइपाङ फोमपातेङ लाअ्गिल्सु।
18 “जातिङको, का नेलाइहेङ दोअ्खा, नेलाइ सुमिङता जेदोङ धेउस्वाना, इङको स्वरगता धेउन्हावा। कालाउ नेलाइ सुमिङता जेदोङ खाइस्वाना, इङको स्वरगता खाइन्हावा। #
मत्ति १६:१९; युहन्ना २०:२३ 19आरोङ का नेलाइहेङ दोअ्ताङका, सुमिङता नेलाइता न्हेमि हिदिङ काथाता मिलितेङ र्हेनु, स्वरगता हिका काङको परमेस्वर आबा नेलाइहेङ प्यावा। 20हाइपानु जेता न्हेमि माकुनु सुमि काङको मिङता जोमावा, इन्ता का नेलाइको माझाता ह्याङका।”
माफ मापिका कामत्याको उदारन
(लुका १७:४)
21कालाउ पत्रुस इसुकोता लोतेङ दोअ्हि, “प्रभु, काङको ओने काङको खिलापता कसुर पानु हाइ का वासेहेङ हेअ्खे माफ पिलि? हाइ न्हिअ्खे थिकापा?”#लुका १७:३-४
22इसु वासेहेङ दोअ्हि, “का नासेहेङ दोअ्खा, न्हिअ्खे माको, कालाउबुङ सुमकुरिते गुना न्हिअ्खे थिकापा!#सिरजाइ ४:२४
23 “इदोङभाअ्सिङ स्वरगको सारभि एलोङ राजादोफा दाजेलि दोखे, जाइ ताइको कामत्यादोफा हिसाब र्हुलि इछा पाहि। 24जेलाउ वा हिसाब र्हुलि तेङहि, तेहाजार सोनाको टाका रिन र्हुका एअ्मि वाकोता चुमाहि। 25कालाउबुङ इङको द्याङ तिरिलि मादोलाउ इङकोको मालिक इङकोहेङ, इङकोको बेअ्, चानचामिन्दि रो इङकोको गोताङ आनेमाने पिअ्तेङ रिन चुकाइलि हुकुम पिहि।
26 “कालाउ इङको कामत्या तिर्हो थोतेङ मालिकको खोकोइता सेउपातेङ बिम्ति पालि तेङहि, ‘मालिक, आधे दिनाथिकापा र्हुम्पि, का नाङको गोताङ रिन चुकायाङका।’ 27कालाउ इङको कामत्याको मालिक दायातेङ इङकोहेङ लाअ्पिहि रो इङकोको रिन बुङ मिनाहा पापिहि।
28 “कालाउबुङ इङको कामत्या ओल्हितेङ हानिलाउ ताइमिदोफाङ काम पाका कामत्यागेलाइता एअ्मिहेङ दुसुहि। जाइ इङकोको एअ्साइ रुपाको टाकाको रिन हिघाहि। वासेहेङ निरघाता चातेङ इङको दोअ्हि, ‘नाङको रिन तिरे।’
29 “कालाउबुङ दोसाङ काम पाका कामत्या तिर्हो थोतेङ इङकोहेङ बिम्ति पाहि, ‘आधे दिनाथिकापा र्हुम्पि, का नाङको गोताङ रिन चुकायाङका।’ 30कालाउबुङ इङको माकिअ्हि रो रिन मातिरिपाधाउ वासेहेङ थुनाता ह्वाअ्पिहि।
31 “वाकोदोफाङ काम पाका भेनेङ कामत्यागेलाइ इदोइ गोताङ तिङतेङ हेन्जाङ पिर पाहि। एम्बालाइ हानितेङ इदोइ गोताङ काथा ताइको मालिकहेङ हिम्पापिहि। 32कालाउ मालिक इङको कामत्याहेङ ताइमिकोता काइतेङ दोअ्हि, ‘ओइ दुरजन कामत्या, ना कादोफा बिम्ति पान्हा रो का नासेहेङ नाङको रिन मिनाहा पापिघा। 33का नासेहेङ दाया पाकाभाइपा ना बुङ नाङकोदोसा काम पाका कामत्याहेङ दाया पालि मागोइधाना?’ 34कालाउ इङकोको मालिक चेरताम्पातेङ इङकोहेङ बुङ गोताङ टाका मातिरिपाधाउ थुनाता ह्वाअ्पिहि।”
35 “नेलाइ ताइको ओनेहेङ ताइको कोन्धाङसो माफ मापानु, स्वरगता हिका काङको आबा बुङ नेलाइदोफा एन्साङ पावा।”
المحددات الحالية:
मत्ति 18: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
