मत्ति 16
16
भारभुसाइका काम तिम्पा दोअ्का
(मरकुस ८:११-१३; लुका १२:५४-५६)
1आधे फरिसिगेलाइ रो सदुकिगेलाइ लोतेङ इसुहेङ जाच पालि स्वरगसो एलोङ भारभुसाइका चिनो तिम्पालि वाकोदोफा काथा ताअ्हि।#मत्ति १२:३८; लुका ११:१६ 2कालाउबुङ वा एम्बालाइहेङ जाबाफ पिहि, “बेला दुबिलि तोम्लाउ नेलाइ दोअ्स्वाना, ‘आकास इका जेङका हि हाइपानु जुम्नि रेम्का दिना जेनाङ।’ 3र्हिमाचाहिँ नेलाइ दोअ्स्वाना, ‘नानि दुमभेरमा ल्वाङ हाइपानु आकास इका बादेल थुम्का हि।’ नेलाइ आकासहेङ खान्तेङ दिना हिसिका ज्याङ खेङलि गिसुखेना। कालाउबुङ नानि जुम्नि हाइ जेङदोङखे दोअ्तेङ याको माने खेङलि मादोस्वाना। 4खान्धुरसो दुरे जेङका दुरजन खालको द्याङगेलाइ खिनिङ इस्का भारभुसाइका काम खाङलि भोखे। कालाउबुङ इदोइ खालको द्याङगेलाइ परमेस्वर पाहासो धुइका योनाको जिबनता घाटिका भारभुसाइका कामबिना बो काम तिङलि मानिनावा।” इङकोन्हुअ्सो इसु एम्बालाइहेङ लाअ्तेङ इन्तासो हानिहि।#मत्ति १२:३९; लुका ११:२९
फरिसि रो सदुकिगेलाइको साउरि
(मरकुस ८:१४-२१)
5चात्यागेलाइ चावान्दि ओदोइपार थुकालिलोलाउ एम्बालाइ तोले चुमालि निलन्हाहि दोअ्तेङ गिहि। 6इसु एम्बालाइहेङ दोअ्हि, “होस पासु, फरिसि रो सदुकिगेलाइको साउरिसो जोगितेङ हिसु!”#लुका १२:१ 7चात्यागेलाइ ताताइमिता दोअ्लि तेङहि, “केलाइ तोले माचुमान्हाहि इदोइभाअ्सिङ वा एसा दोअ्का वाला।” 8इसु इदोइ गितेङ दोअ्हि, “खोइ कुनु नेलाइको खान्धुर? नेलाइदोसा तोले मान्थु दोअ्तेङ हाइपालि ताताइमिता सावालजावाफ पासुखेना? 9हाइ नेलाइ एला बुङ मागिसुखेना? नाहाजार द्याङगेलाइहेङ नालोङ तोलेहोइ चापाका काथा नेलाइहेङ फोम मान्थु? नेलाइ हेअ् दाल्हो जोम्पाका हिघासुन्हा?#मत्ति १४:१७-२१ 10कालाउ न्हिअ्लोङ तोलेहोइ द्याहाजार द्याङगेलाइहेङ चापातेङ हेअ् दाल्हो नेलाइ जोम्पाका हिघासुन्हा?#मत्ति १५:३४-३८ 11का नेलाइहेङ तोलेको बारेता दोअ्का माको दोअ्तेङ नेलाइ हाइपालि मागिसुखेना? कालाउबुङ फरिसि रो सदुकिगेलाइको साउरिसो होस पातेङ हिसु।” 12कालाउ एम्बालाइ गिहि, वा तोलेको साउरिसो माको कालाउबुङ फरिसि रो सदुकिगेलाइको बिद्यासो जोगितेङ हिलि दोअ्का हिघाहि।
इसु हासु हि?
(मरकुस ८:२७-३०; लुका ९:१८-२१)
13इसु काइसरिया फिलिप्पिको माउजाता थुकालिलोकान्हुअ्सो, वा ताइको चात्यागेलाइहेङ हिअ्हि, “द्याङगेलाइ का द्याङको चानहेङ हासु दोअ्तेङ दोअ्खे?” 14एम्बालाइ दोअ्हि, “आधिमि चिभुअ्लि पिका युहन्ना, आधिमि एलिया, आधिमि यरमिया रो परमेस्वर पाहासो धुइकालाइता एअ्मि दोअ्तेङ दोअ्खे।”#मत्ति १४:१-२; मरकुस ६:१४-१५; लुका ९:७-८
15इसु एम्बालाइहेङ हिअ्हि, “नेलाइ हाइ दोअ्स्वाना, का हासु हिघा?” 16सिमोन पत्रुस दोअ्हि, “नादोङ सिन्हुका परमेस्वरको चान ‘ख्रिस्ट’ हिन्हा।”#युहन्ना ६:६८-६९ 17इसु वासेहेङ दोअ्हि, “योनाको चान सिमोन, ना सहसाम्पा निङका हिन्हा। हाइदोनु द्याङसो नासेहेङ इदोइ तिम्पाका माको, कालाउबुङ स्वरगता हिका काङको परमेस्वर आबा तिम्पाका हि। 18का नासेहेङ दोअ्खा, एलासो नासेहेङ पत्रुस#१६:१८ पत्रुस जाइको माने “उन्ठुइ” जेङखे। दोअ्तावा। का काङको मन्डलि इदोङ उन्ठुइता बान्हायाङका रो नरकको सरबङगेलाइ इङकोहेङ जितिलि माद्वावा। 19का नासेहेङ स्वरगको सारभिको चाबिगेलाइ प्याङका। जेदोङ ना सुमिङता धेवाना, इङको स्वरगता जिङन्हावा। जेदोङ ना सुमिङता खायाना, इङको स्वरगता खाइन्हावा।”#मत्ति १८:१८; युहन्ना २०:२३ 20कालाउ इसु “का ख्रिस्ट हिघा दोअ्तेङ हासुहेङ मादोअ्लि” दोअ्तेङ ताइको चात्यागेलाइहेङ कारा हुकुम पिहि।
इसु ताइको सिकाको काथा दोअ्का
(मरकुस ८:३१-३३; लुका ९:२२)
21इङको दिनासो इसु चात्यागेलाइहेङ हेतेङ गोताङ काथा दोअ्लि तेङहि। का यरुसलेमता हानाङका रो इन्ता आगुवागेलाइ, मुल धामिगेलाइ, धरम मास्टरगेलाइसो हेन्जा तु: निङचाङका, सेअ्न्हाङका रो सुम्नि दिनाता आरोङ सिकासो सिन्हुतेङ ल्होपान्हाङका।
22इदोइ हिङतेङ पत्रुस वासेहेङ एपाहा चुमपुतेङ दोअ्हि, “परमेस्वर एसा जेङलि माप्याको, प्रभु, नासेहेङ इस्का हेअ्लाउ माज्याको।” 23कालाउबुङ इसु पत्रुसभारि घुरितेङ दोअ्हि, “ओइ साइतान, काङको आगासो हाने, ना काङको भाअ्सिङ बाधा हिन्हा। हाइदोनु ना परमेस्वरको काथागेलाइता माको, कालाउबुङ द्याङगेलाइको काथागेलाइता मन लागाइखेना।”
चात्या जेङलाउ लाअ्लि गोइका
(मरकुस ८:३४-९:१; लुका ९:२३-२७)
24कालाउ इसु ताइको चात्यागेलाइहेङ दोअ्हि, “जाइ कासेहेङ पिताइलि इछा पानु, वा ताइमिहेङ माया मार्याको रो ताइको कुरुस फातेङ कासेहेङ पितायाको#मत्ति १०:३८; लुका १४:२७ 25हाइपानु जाइ ताइको पारान बान्चिपालि खाङखे, इङको वा मुअ्पावा। कालाउबुङ जाइ ताइको पारान काङको भाअ्सिङ मुअ्पावा, इङको वा निनावा।#मत्ति १०:३९; लुका १७:३३; युहन्ना १२:२५ 26गोताङ दुनिया निङलाउ बुङ ताइको पारान मुअ्पानु, द्याङहेङ हाइ लाभ ज्यावा? माकुनु द्याङ ताइको पारानको बादलाता हाइ पिलि द्वावा? 27हाइपानु का द्याङको चान ताइको आबाको पारतापता ताइको स्वरगदुतगेलाइदोफा ल्वाङका। इङको पहर का गोताङ द्याङहेङ इङकोको काम आन्सार नातिजा प्याङका।#मत्ति २५:३१; ले ६२:१२; रोमि २:६ 28जातिङको, का नेलाइहेङ दोअ्खा, इता जाअ्कालाइता हेअ्मि द्याङगेलाइ का द्याङको चानहेङ ताइको सारभिता लोतेङहिका मातिम्पाधाउ मास्यावा।”
المحددات الحالية:
मत्ति 16: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
