मत्ति 15
15
आजुखालगेलाइको चलन मानिका बारेता बिद्या
(मरकुस ७:१-१३)
1कालाउ आधिमि फरिसिगेलाइ रो धरम मास्टरगेलाइ यरुसलेमसो इसुकोता लोतेङ हिअ्हि, 2“नाङको चात्यागेलाइ आजुखालसो चलितेङ लोका चलनगेलाइ हाइपालि मामानिखे? हाइपानु एम्बालाइ चाकालाम्फा ताइको खुर माझाखे।” 3इसु एम्बालाइहेङ दोअ्हि, “नेलाइ बुङ ताइको चलनगेलाइहेङ मानिलिको भाअ्सिङ हाइपालि परमेस्वरको हुकुम मामानेसुखेना? 4हाइदोनु परमेस्वर दोअ्का हि, ‘ताइको आबा आमाइहेङ मानभाउ पासु, रो ताइको आबा आमाइहेङ मारेम्का काथा दोअ्खे इङकोचाहिँ सेअ्लि गोयाङ।’#दामालाअ्का २०:१२; २१:१७; न्याम ५:१६; लेबि २०:९ 5कालाउबुङ नेलाइचाहिँ ताइको आबा आमाइहेङ, ‘नेलाइहेङ पिलिगोइका गोताङ परमेस्वरहेङ पिलिदोहोइका, इदोइभाअ्सिङ नेलाइहेङ पिलि माद्वाङका दोअ्सुखेना।’ 6एसापा ताइको आबा आमाइहेङ मान पालि मागोयाङ दोअ्तेङ नेलाइ ताइको चलनभारि लागितेङ परमेस्वरको हुकमहेङ बेकामको बान्हाइसुखेना। 7ओइ चिम्काटागेलाइ, यासाइया परमेस्वर पाहासो धुइका यासाइयाको दोअ्का काथा नेलाइदोफा जिस्काको उस्काङ मिलिखेः
8 ‘इदोइ द्याङगेलाइ कासेहेङ नुइहोइ खिनिङ मान पाखे,
कालाउबुङ एम्बालाइको कोन्धाङ काभारि मान्थु।
9 एम्बालाइ बित्थाता कासेहेङ बाखिन्खे,
कालाउबुङ एम्बालाइको न्याम द्याङगेलाइको धिरपाका बिधि खिनिङ हि।’ #
यासाइया २९:१३ ”
द्याङगेलाइहेङ आपुनित पाका काथागेलाइ
(मरकुस ७:१४-२३)
10इसु द्याङगेलाइहेङ ताइकोता काइहि रो एम्बालाइहेङ दोअ्हि, “काङको काथा मनपातेङ हिङसु रो गिसु, 11जेदोङ चाकाचिज नुइसो दुल्खे, इङको द्याङहेङ आपुनित मापाखे। कालाउबुङ जेदोङ काथा नुइसो बाहार ओल्हिखे, इङको द्याङहेङ आपुनित पाखे।”
12इदोइ न्हुअ्सो चात्यागेलाइ लोतेङ वासेहेङ दोअ्हि, “हाइ ना गिहोइना? फरिसिगेलाइ नाङको दोअ्का काथा हिङतेङ चेरताम्पाका हि।” 13इसु दोअ्हि, “स्वरगता हिका काङको आबा माथिङका गोताङ सिङ उअ्न्हावा। 14एम्बालाइहेङ लाअ्पिसु, इङको कान्हा आगुवागेलाइ हि। कान्हा कान्हाहेङ थोङगिल्नु, इङको न्हेमिङ खाराता वालावा।”#लुका ६:३९
15पत्रुस इसुहेङ दोअ्हि, “केलाइहेङ इदोइ उदारनको माने दोअ्पि।” 16वा दोअ्हि, “हाइ नेलाइ एला बुङ गिनाङ मान्थुसुन्हा? 17हाइ नेलाइ मागिसुखेना, जेदोङ चिज द्याङगेलाइको नुइसो दुल्तेङ हामुलिअ्ता थुकाखे रो इङको ओल्हितेङ बाहार हानिखे। 18कालाउबुङ द्याङको नुइसो बाहार ओल्हिका काथा वाको कोन्धाङसो ओल्हिखे रो इदोइदोङ काथाहोइ द्याङहेङ आपुनित बान्हाइखे।#मत्ति १२:३४ 19हाइपानु कोन्धाङसो दोङ दुरजन बिचार, सेअ्लि, दुस्चर, कासबिरि, खुलि, आसत्ते दासि रो बादानामि बाहार ओल्हिखे। 20इदोइ काथागेलाइसो चाहिँ द्याङहेङ आपुनित पाखे। कालाउबुङ खुर माझासिङ चालाउ वासेहेङ आपुनित मापाखे!”
कनानि बेबालको खान्धुर
(मरकुस ७:२४-३०)
21कालाउ इसु इन्तासो ओल्हितेङ, टुरोस रो सिदोनको माउजाभारि हानिहि। 22इङको माउजासो एअ्मि कनानि बेबाल लोतेङ र्हिकाइतेङ दोअ्लि तेङहि, “ओइ प्रभु, दाउदको चान, कासेहेङ दाया पा। काङको चामिन्दिहेङ मासान मारेम्फाङ सान्ताइका हि।” 23इसु इङकोहेङ हाइदोङ जाबाफ मापिहि। वाको चात्यागेलाइ लोतेङ वासेहेङ बिम्ति पाहि, “यासेहेङ दिङगिल, हाइदोनु इङको र्हिकाइतेङ केलाइहेङ पिताइदोङखे।” 24इसु दोअ्हि, “कासेहेङ ते राम्का भेराभाइपा इस्राएलको जात्याको द्याङगेलाइहेङ साघाइलिको भाअ्सिङ खिनिङ परमेस्वर आबा दिङगिल्का हि।” 25कालाउबुङ इङको बेबाल लोतेङ वाको आगाता तिर्हो थोतेङ दोअ्हि, “ओइ प्रभु, कासेहेङ साघाइ।” 26इसु दोअ्हि, “जामालाइको तोले र्हुतेङ खियागेलाइहेङ थालपिलि ते ठिक माज्याङ।” 27इङको दोअ्हि, “एइ प्रभु, कालाउबुङ खियागेलाइ बुङ ते ताइको मालिक चालाउ हुल्का आइथि चाखे।” 28कालाउ इसु इङकोहेङ दोअ्हि, “ओइ बेबाल, नाङको खान्धुर बारका हि। नाङको इछा पाकाभाइपा नासेहेङ ज्याको।” इङकोको चामिन्दि इङकोङ पहर एल्हि।
इसु द्याहाजार द्याङगेलाइहेङ चापाका
(मरकुस ७:३१; ८:१०)
29इसु इन्तासो ओल्हितेङ गालिल चावान्दिको काम्बे जेङतेङ हानिहि रो आरदाङर्हुता ताङतेङ इन्ता योम्हि। 30कालाउ द्याङगेलाइको जेर वाकोता लोहि। एम्बालाइ ताइमिदोफाङ चुमाका कुज्या नेङगारा, कान्हा, लाटा रो बो हेन्जाङहेङ वाकोता चुमातेङ ताअ्पिहि रो वा एम्बालाइ झाराङहेङ एल्पाहि। 31कालाउ इन्ता हिका लाटागेलाइ धुइका, कुज्या नेङगारागेलाइ एल्तेङ तेका रो कान्हागेलाइ तिङका तिङतेङ द्याङगेलाइ भारभुसाइहि कालाउ एम्बालाइ इस्राएलको परमेस्वरहेङ बाखिन्हि।
32कालाउ इसु ताइको चात्यागेलाइहेङ ताइकोता काइतेङ दोअ्हि, “का इदोइ द्याङगेलाइहेङ खाङतेङ दायाघा, हाइदोनु एबालाइ कादोफा हिका नानि सुम्नि जेङहोइ। एला एबालाइदोफा चालि हाइदोङ मान्थु। का एबालाइहेङ म्हितुपाङ दिङगिल्लि माभोखा। माकुनु एम्बालाइ दामाताङ झाका लोनावा।”
33चात्यागेलाइ इसुहेङ दोअ्हि, “इस्का बारका चेअ्सुहेङ इदोइ निरजन थामेता चापालि केलाइ हितासो चाका आनेमाने निङलि?” 34इसु एम्बालाइहेङ दोअ्हि, “नेलाइदोसा हेअ्लोङ तोले हि?” एम्बालाइ दोअ्हि, “न्हिअ्लोङ तोले रो आधे म्हुम्हुइका हाया खिनिङ हि।”
35इसु द्याङगेलाइहेङ चाउरता योम्लि हुकुम पिहि। 36इङकोन्हुअ्सो वा इङको न्हिअ्लोङ तोले रो हाया र्हुतेङ परमेस्वरहेङ च्याबास पिकान्हुअ्सो पेङतेङ चात्यागेलाइहेङ पिहि। कालाउ चात्यागेलाइ द्याङगेलाइहेङ बाखाराइपिहि। 37एम्बालाइ झाराङ घाइपाङ चाहि रो दाइका टुकारागेलाइ जोम्पालाउ न्हिअ् दाल्हो जेङहि। 38इन्ता चाकालाइ बेबाललाइ रो जामालाइ बाहेक वाबालाइ खिनिङ द्याहाजार हिघाखे। 39कालाउ द्याङगेलाइहेङ दिङगिल्कान्हुअ्सो इसु नाउता धोल्तेङ मगादानको माउजाभारि हानिहि।
المحددات الحالية:
मत्ति 15: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
