मत्‍ति 14

चिभुअ्‌लि पिका युहन्‍ना नासाका

(मरकुस ६:१४-२९; लुका ९:७-९)

1इङको पहर गालिल माउजाको राजा हेरोद इसुको नावाइ हिङहि। 2वा ताइको कामत्‍यागेलाइहेङ दोअ्‌हि, “वा चिभुअ्‌लि पिका युहन्‍ना। वा सिकासो सिन्‍हुका हि। एन्‍साङ या सरबङसो भारभुसाइका इस्‍का कामगेलाइ पादोङखे।”

3लाम्‍फा ताइको ओने फिलिपको बेअ्‌ हेरोदियासको भाअ्‌सिङ हेरोद युहन्‍नाहेङ रिम्‍तेङ धेउतेङ थुनाता ताअ्‌का हिघाखे।#लुका ३:१९-२० 4हाइदोनु युहन्‍ना हेरोदहेङ एसा दोअ्‌का हिघाखे, “ना वासेहेङ बेअ्‌ बान्‍हाइतेङ ताअ्‌लि ठिक माज्‍याङ।”#लेबि १८:१६; २०:२१ 5इदोङभाअ्‌सिङ हेरोद युहन्‍नाहेङ सेअ्‌लि इछा पाका हिघाखे। कालाउबुङ राइतिसो वा थिघाखे, हाइदोनु एम्‍बालाइ वासेहेङ परमेस्‍वर पाहासो धुइका द्‌याङ दोअ्‌तेङ मान पाघाखे।

6कालाउबुङ जेलाउ हेरोदको जोलोमदिना लोहि, कालाउ हेरोदियासको चामिन्‍दि एम्‍बालाइको माझाता न्‍हातेङ हेरोदहेङ लेङचापाहि। 7एन्‍साजेङलाउ वा इङकोहेङ हाइदोङ र्‍हेलाउ बुङ पिका केरा चाहि। 8कालाउबुङ इङकोको आमाइ धिरपाका हिनाङसिङ वा दोअ्‌हि, “चिभुअ्‌लि पिका युहन्‍नाको पुरिङ कासेहेङ इदोङ थालिता ताअ्‌तेङ पि।” 9इदोइ हिङतेङ हेरोद मन तु:पाहि कालाउबुङ बान्‍सालाइको आगाता केरा चानाङसिङ वा एन्‍साङ पालि हुकुम पिहि। 10वा थुनाता युहन्‍नाको पुरिङ पाल्‍लि हुकुम पिहि। 11कालाउ वाको पुरिङ थालिता चुमातेङ इङको बेजानहेङ पिलि लागाइहि। वा इङको ताइको आमाइकोता चुमाहि। 12इङकोन्हुअ्‌सो युहन्‍नाको चात्‍यागेलाइ लोतेङ वाको सिका जिउ चुमपुतेङ लिअ्‌हि। कालाउ एम्‍बालाइ हानितेङ इसुहेङ बानाल हिम्‍पाहि।

इसु नाहाजार द्‌याङगेलाइहेङ चापाका

(मरकुस ६:३०-४४; लुका ९:१०-१७; युहन्‍ना ६:१-१४)

13जेलाउ इसु इदोइ हिङहि, वा नाउता धोल्‍तेङ इन्‍तासो निचालाका थामेभारि एकालाङ हानिहि। इदोइ हिङतेङ द्‌याङगेलाइ पुरगेलाइसो ओल्‍हितेङ वासेहेङ पिताइहि। 14इसु नाउसो खुअ्लाउ काम्‍बेता हेन्‍जाङ द्‌याङगेलाइ वासेहेङ र्‍हुम्‍तेङ हिका तिङहि। इदोइ तिङतेङ वा एम्‍बालाइहेङ दायातेङ इन्‍ता हिका मासाअ्‌धेकालाइहेङ एल्‍पाहि।

15बेल्‍हालितोम्‍कान्‍हुअ्सो चात्‍यागेलाइ इसुकोता लोतेङ एसा दोअ्‌हि, “इदोइ निचालाका थामे हि, बेला बुङ दुबिहोइ। इदोइ द्‌याङगेलाइहेङ दिङगिल रो एबालाइ देरा देराता हानितेङ ताइको भाअ्‌सिङ चाका आनेमाने चोलाको।” 16कालाउबुङ इसु एम्‍बालाइहेङ दोअ्‌हि, “एम्‍बालाइ हानिलि मागोयाङ। नेलाइदोङ एबालाइहेङ चालि पिसु।” 17चात्‍यागेलाइ वासेहेङ दोअ्‌हि, “इता केलाइदोफा नालोङ तोले रो न्‍हेलोङ हाया खिनिङ हि।” 18कालाउ इसु दोअ्‌हि, “इङको काङकोता चुमासु।”

19इसु द्‌याङगेलाइहेङ चाउरता योम्‍लि लागाइहि। इङको नालोङ तोले रो न्‍हेलोङ हाया र्‍हुतेङ स्‍वरगभारि खाङतेङ परमेस्‍वरहेङ सहसाम्‍पा पिहि। कालाउ तोलेगेलाइ पेङतेङ चात्‍यागेलाइहेङ पिहि रो चात्‍यागेलाइ द्‌याङगेलाइहेङ बाखाराइपिहि। 20इङको झाराङ घाइपाङ चाहि रो दाइका टुकारागेलाइ जोम्‍पालाउ तेन्‍हे दाल्‍हो पोङघाहि। 21इन्‍ता चाकालाइ बेबालाइ रो जामालाइबिना वाबालाइ खिनिङ नाहाजार हिघाखे।

इसु चिर्‍हुता तेका

(मरकुस ६:४५-५६; युहन्‍ना ६:१५-२१)

22इदोइ काम पालिदोतेङसाङ इसु चात्‍यागेलाइहेङ “नाउता धोल्‍तेङ लाम्‍फादोङ चावान्‍दि ओदोइपार हानिसु” दोअ्‌तेङ आर्‍हाइहि। वा ताइमिचाहिँ द्‌याङगेलाइहेङ बेदाङगि पिलि हिन्‍दिहि। 23द्‌याङगेलाइहेङ बिदा पालि दोकान्‍हुअ्‌सो वा एकालाङ पारथाना पालि र्‍हुता आरदाङता हानिहि। बेल्‍हालाउ वा एकालाङ आरदाङता हिघाहि। 24कालाउबुङ नाउ इङको पहरथिकापा काम्‍बेसो जाहिदिता हेन्‍जाङ दुरे थुकालिदोका हिघाहि। कालाउ आगापाहा भेरमा लोनाङसिङ चिको छाल्‍काहोइ नाउ आगाइलिङ मादोहि। 25एअ्‌ र्‍हिमाङ मोचलमाचललाउ इसु चिर्‍हुता तेतेङ चात्‍यागेलाइकोता लोहि। 26जेलाउ एम्‍बालाइ वासेहेङ जाहिदिर्‍हुता तेतेङहिका तिङहि, कालाउ थितेङ एम्‍बालाइ दोअ्‌हि, “याते मासान कि नाउ!” दोअ्‌तेङ थितेङ र्‍हिकाइलि तेङहि। 27कालाउबुङ इसु ओदोङघरि एम्‍बालाइहेङ एसा दोअ्‌हि, “आट पासु, कादोङ हिघा, माथिसु।”

28पत्‍रुस वासेहेङ दोअ्‌हि, “प्रभु, नादोङ हिन्‍हा पानु कासेहेङ नाङकोता चिर्‍हुता लोलि हुकुम पि।” 29इसु दोअ्‌हि, “लोउ।” कालाउ पत्‍रुस नाउसो खुअ्‌तेङ वाकोता हानिलि चिर्‍हुता तेलि तेङहि। 30कालाउबुङ बारका भेरमा लोका तिङतेङ वा थिहि रो दुबिलि तोम्‍लाउ र्‍हिकाइतेङ दोअ्‌हि, “प्रभु, कासेहेङ बान्‍चिपा।” 31इसु ओदोङघरि वासेहेङ चा:तेङ दोअ्‌हि, “खोइ कुनु नाङको खान्‍धुर, हाइपालि साङखा पान्‍हा?” 32जेलाउ ओबालाइ नाउता ताङहि, कालाउ भेरमा बुङ गाङहि। 33नाउता हिकालाइ इसुहेङ तिर्‍हो थोतेङ बाखिन्‍हि रो दोअ्‌हि, “जातिङको ना परमेस्‍वरको चान हिन्‍हा।”

34ओदोइपार थुकाकान्‍हुअ्‌सो ओबालाइ गनेसरेतको माउजाता थुकालिलोहि। 35जेलाउ इङको थामेको द्‌याङगेलाइ इसुहेङ नाल्‍हि कालाउ एम्‍बालाइ कोरबितिङको माउजागेलाइता बानाल पिगिल्‍हि रो द्‌याङगेलाइ रोगाइकालाइ झाराङहेङ वाकोता चुमाहि। 36एम्‍बालाइ वाको धाबाको फेन्‍चा खिनिङ साइलि निनाको दोअ्‌तेङ बिम्‍ति पाहि। जाइजाइ साइहि एम्‍बालाइ झाराङ एल्‍हि।

المحددات الحالية:

मत्‍ति 14: DHIM

تمييز النص

نسخ