मत्ति 13
13
चालाइ बिअ्काको उदारन
(मरकुस ४:१-१२,२५; लुका ८:४-१०; १०:२३-२४)
1इङकोङ दिना इसु साअ्सो ओल्हितेङ चावान्दिको काम्बेता योम्हि। 2जेलाउ हेन्जाङ द्याङगेलाइ वाको भेरपा जोम्हि रो वा नाउता धोलतेङ योम्हि, कालाउबुङ झाराङ द्याङगेलाइ काम्बेता जाअ्हि।#लुका ५:१-३ 3इसु इङको द्याङगेलाइहेङ हेन्जाङ काथागेलाइ उदारनगेलाइता इस्का काथा दोअ्हि,
“एअ्मि चालाइ बिअ्का चालाइ बिअ्लि ओल्हिहि। 4कालाउ एसापा बिअ्लाउ आतुइसा चालाइ दामाभारि बिअ्न्हाहि रो जिह्याँ जुइल्हेङ लोतेङ इङको चापिहि। 5आतुइसा चालाइ उन्ठुइहिका भोनोता बिअ्न्हाहि, जेता हेन्जा भोनो मान्थुघाहि रो वाङखारापा भोनो मान्थुनाङसिङ इङको मारफाङ योहि। 6कालाउबुङ जेलाउ साने देहि इङको चुअ्हि रो लिअ्ताथिकापा जारिजोलि मादोनाङसिङ इङको सेङहि। 7हेथे चालाइचाहिँ चुइगेलाइको झालासता बिअ्न्हाहि, कालाउबुङ चुइगेलाइ धाङगातेङ लोहि रो चालाइहेङ बारालि मापिहि। 8आधे चालाइ रेम्का भोनोता बिअ्न्हाहि रो आधे नाकुरि, आधे सुमकुरि रो आधे एअ्कुरिते गुना उब्जा पिहि। 9जाइको न्हातोङ हि, वा हिनाको।”
10कालाउ चात्यागेलाइ लोतेङ इसुहेङ दोअ्हि, “ना एम्बालाइदोफा हाइपालि उदारनगेलाइता धुइखेना?” 11वा एम्बालाइहेङ दोअ्हि, “नेलाइहेङ ते स्वरग सारभिको लिअ्ताको काथा गिलि आकिल पिका हि, कालाउबुङ एम्बालाइहेङ चाहिँ पिका मान्थु। 12हाइपानु जाइदोफा गिका मन हि, इङकोहेङ आरोङ हेन्जाङ आकिल प्यावा रो इङकोदोफा हेन्जा ज्यावा। कालाउबुङ जाइदोफा गिका मन मान्थु इङकोदोफा हिका आकिल बुङ घिङन्हावा।#मत्ति २५:२९; मरकुस ४:२५; लुका ८:१८; १९:२६ 13इदोङभाअ्सिङ का एम्बालाइदोफा उदारनता धुइखा, हाइदोनु एम्बालाइ खाङनुते खाङखे कालाउबुङ मातिङखे, हिङनुते हिङखे कालाउबुङ हिङतेङ बुङ मागिखे। 14परमेस्वर पाहासो धुइका यासाइयाको दोअ्का काथा एसापा एम्बालाइता पोङघाहि:
‘हिङनुते नेलाइ हिङसुखेना, कालाउबुङ हेअ्लाउ मागिसुखेना,
खाङनुते खाङसुखेना, कालाउबुङ हेअ्लाउ मातिङसुखेना।
15 हाइपानु इदोइ द्याङगेलाइको कोन्धाङ बोधालाका हि,
एम्बालाइको न्हातोङ बाम्का हि,
एम्बालाइको मिँ तुअ्का हि,
माकुनुते एम्बालाइ मिँहोइ तिङधावा,
न्हातोङहोइ हिङधावा,
कोन्धाङहोइ गिधावा रो काभारि घुरिधावा,
कालाउ का एम्बालाइहेङ एल्पाधाङका।’ #
यासाइया ६:९,१०
16 “कालाउबुङ नेलाइहेङचाहिँ परमेस्वर आबा सहसाम्पा पिका हि, हाइपानु नेलाइको मिँ तिङका रो न्हातोङ हिङका जेङका हि। #
लुका १०:२३-२४
17जातिङको, का नेलाइहेङ दोअ्खा, नेलाइको तिङका काथा हेन्जाङ परमेस्वर पाहासो धुइका रो धरम द्याङगेलाइ खाङलि इछा पाघाखे, कालाउबुङ मातिङहि, कालाउ नेलाइ हिङका काथा हिङलि इछा पाघाखे, कालाउबुङ माहिङहि।
चालाइ बिअ्का उदारनको माने
(मरकुस ४:१३-२०; लुका ८:११-१५)
18 “चालाइ बिअ्काको उदारनको माने हिङसु। 19हेथे द्याङगेलाइ स्वरगको सारभिको बचन हिङनुते हिङखे कालाउबुङ मागिखे, कालाउ दुरजन लोखे रो इङकोको कोन्धाङता जेदोङ बिअ्का हिघाहि इङको कुर्हाइतेङ चुमपुखे। दामाभारि बिअ्न्हाका चालाइचाहिँ इङकोङ: 20उन्ठुइहिका भोनोता बिअ्न्हाका चालाइचाहिँ इङको द्याङभाइका, जाइ बचन हिङतेङसाङ लेङचातेङ ओदोङघरि मन्जुरि पाखे। 21कालाउबुङ इङकोको कोन्धाङ लिअ्ताथिकापा जारि माजोनाङसिङ इङको आतुइसा पहरथिकापा खिनिङ हिखे। कालाउ परमेस्वरको बचनता खान्धुर पानाङसिङ तु: रो सान्ताइका लोतेङसाङ इङको न्हुअ् पासाइखे। 22आरोङ हेअ्मि द्याङको कोन्धाङचाहिँ चुइको झालास्ता बिअ्न्हाका चालाइभाइकाङ। एम्बालाइ परमेस्वरको बचन हिङतेङ बुङ दुनियाको पिर रो टाका काउरिको इछाता फासिखे। एन्साङ एम्बालाइको हिङका बचनगेलाइ राम्तेङ हानिखे रो ताइको जिबनता हिदिङ बुङ फल मासेपाखे। 23कालाउबुङ हेअ्मि द्याङको कोन्धाङ रेम्का भोनोता बिअ्न्हाका चालाइ भाइका, जाइ बचन हिङखे, गिखे रो जातिङको उब्जनि सेपाखे। इङको बिअ्का चालाइसो नाकुरि गुना, सुमकुरि गुना रो एअ्कुरिते गुना उब्जनि सेपाखे।”
माइरिमाको उदारन
24इसु आरोङ एम्बालाइहेङ भेनेङ उदारन हिङपाहि, “स्वरगको सारभि एअ्मि द्याङभाइका, जाइ ताइको मिलिङता रेम्का चालाइ बिअ्हि। 25कालाउबुङ द्याङगेलाइ जिम्का पहर वाको दुस्मन लोहि रो गोहोमको माझा माझाता माइरिमागेलाइ बिअ्तेङ हानिहि। 26जेलाउ सिङ बारातेङ इङकोता सिह्याँ लागिहि, कालाउ माइरिमा बुङ देखाल पिहि।
27 “साअ् मालिकको कामत्यागेलाइ लोतेङ वासेहेङ दोअ्हि, ‘हाइ ना ताइको मिलिङता रेम्का चालाइ बिअ्का माको? इन्ता माइरिमा हितासो लोहि?’ 28साअ् धनि एम्बालाइहेङ दोअ्हि, ‘हिदिङ दुस्मन एसा पापिहि वाला।’ कामत्यागेलाइ वासेहेङ दोअ्हि, ‘हाइ केलाइ हानितेङ इङको उअ्ताङ?’
29 “कालाउबुङ वा दोअ्हि, ‘एन्सा मापासु’ माकुनुते नेलाइ माइरिमा उअ्लाउ गोहोमसुदाङ उअ्स्वाना। 30बालि चेका माजेङपाधाउ न्हेमिहेङ दोसादोसाङ बारालि पिसु। कालाउ का जनगेलाइहेङ दोअ्ताङका, ‘लाम्फा माइरिमा उअ्तेङ ओअ्पालि बोझा जिङसु, कालाउबुङ गोहोमचाहिँ काङको भाकारता ताअ्सु।’”
पासाइको चालाइ रो साउरिको उदारन
(मरकुस ४:३०-३४; लुका १३:१८-२१)
31इसु एम्बालाइहेङ भेनेङ उदारन दोअ्हि, “स्वरगको सारभि पासाइको चालाइ भाइका, जाइ एअ्मि द्याङ ताइको बारिता चुमपुतेङ बिअ्हि। 32इङको गोताङ चालाइगेलाइता म्हुइका जेङखे, कालाउबुङ जेलाउ बाराखे, कालाउ इङको गोताङ सारसिङगेलाइखान्तेङ बारका जेङखे रो जिह्याँ जुइल्हेङगेलाइ लोतेङ इङकोको दालेङगेलाइता भासा जोखे।”
33वा एम्बालाइहेङ भेनेङ उदारनता दोअ्हि, “स्वरगको सारभि साउरिभाइका, एअ्मि बेबाल ना पाथि झोको तोलेता आतुइसा साउरि मिसालाइहि रो इङको गोताङ तोले साउरिहोइ माफुलिपा धाउ इङकोहेङ एअ् थाने ताअ्हि।”
34इसु इदोइ गोताङ बचन द्याङगेलाइहेङ उदारनता दोअ्हि। एम्बालाइहेङ उदारनमाकोसिङ वा हाइदोङ मादोअ्हि। 35परमेस्वर पाहासो धुइकासो दोअ्का बचन एसापा पोङघाहि:
“का उदारनगेलाइता धुयाङका,
दुनियाको सिरजाइ जेङकासो मागिका बचनगेलाइ दोअ्ताङका।”#ले ७८:२
माइरिमाको उदारनको माने
36कालाउ इसु द्याङगेलाइहेङ लाअ्तेङ साअ्ता हानिहि रो वाको चात्यागेलाइ वाकोता लोतेङ दोअ्हि, “मिलिङको माइरिमाको उदारनको माने केलाइहेङ दोअ्पि।” 37वा एम्बालाइहेङ दोअ्हि, “रेम्का चालाइ बिअ्काचाहिँ का द्याङको चान। 38मिलिङचाहिँ दुनिया। रेम्का चालाइचाहिँ स्वरगको सारभिको खाल रो माइरिमा साइतानको खाल। 39माइरिमा बिअ्का दुस्मनचाहिँ साइतान। बालिको चेका पहरचाहिँ दुनियाको दोका। जनगेलाइ स्वरगदुतगेलाइ। 40जेसापा माइरिमा उअ्तेङ मेता दुकावा, दुनियाको न्हुअ्ता बुङ एन्साङ ज्यावा। 41का द्याङको चान ताइको स्वरगदुतगेलाइहेङ दिङगिलाङका। पाप पालि लागाइका गोताङ थोक रो दुरजन काम पाकालाइ झाराङहेङ एम्बालाइ काङको सारभिसो जोम्पावा, 42कालाउ ओबालाइहेङ मेको रापता थालपिगिलावा। इन्ता द्याङगेलाइ खारस्वावा रो तासिङ रेअ्तावा। 43कालाउ धरम द्याङगेलाइ ताइको परमेस्वर आबाको सारभिता बेलाभाइपा फाइसालाम्तेङ ह्यावा। जाइको न्हातोङ हि, इङको हिनाको।
लिअ्काटाका रो मोतिको उदारन
44 “स्वरगको सारभि हिदिङ एलोङ मिलिङता लिअ्तेङ ताअ्का लिअ्का टाकाभाइका। एअ्मि द्याङ निङतेङ म्होअ्तेङ ताअ्तावा। कालाउ लेङचातेङ वा हानावा रो ताइमिदोसा हिका गोताङ पिअ्तेङ इङको मिलिङ चोलावा।
45 “आरोङ स्वरगको सारभि रेम्का मोतिगेलाइ भोका एअ्मि पाइकारिभाइका। 46इङको एलोङ हेन्जा जाङका मोति निङकान्हुअ्सो हानितेङ ताइमिदोफा हिका गोताङ पिअ्तेङ इङको मोति चोल्हि।
हाया माङका जालेको उदारन
47 “स्वरगको सारभि चावान्दिता थाल्का एलोङ जालेभाइका बुङ, जाइता गोताङ खाल्को हायागेलाइ देखे। 48कालाउ जाले पोङघाकान्हुअ्सो जालेघाकालाइ इङकोहेङ काम्बेता तान्हितेङ ओल्हिपाखे। इङकोन्हुअ्सो योम्तेङ रेम्का हायागेलाइ दुङघ्रिता जोम्पाखे कालाउबुङ काम मालागिकालाइहेङ थालगिल्खे। 49दुनियाको न्हुअ्ता एन्साङ ज्यावा। परमेस्वरको काथा चुमाकालाइ लोतेङ दुरजनगेलाइहेङ धरमगेलाइको माझासो खेनावा। 50कालाउ एम्बालाइ मेको रापता थालन्हावा, इन्ता एम्बालाइ खारावा रो तासिङ रेअ्तावा।”
51इसु हिअ्हि, “हाइ नेलाइ इदोइ गोताङ काथा गिसुन्हा?” एम्बालाइ वासेहेङ जाबाफ पिहि, “गिन्हाहि।” 52कालाउ इसु एम्बालाइहेङ दोअ्हि, “इदोइभाअ्सिङ स्वरगको सारभिको बिद्या निङका झाराङ धरम मास्टर एअ्मि साअ्को मालिकभाइका। जाइ ताइको भाकारसो नावा रो पुरना जाङका आनेमानेगेलाइ बाहार ओल्हिपाखे।”
नासरतता इसुहेङ मामानिका
(मरकुस ६:१-६; लुका ४:१६-३०)
53इदोइ उदारनगेलाइ दोअ्लिदोकान्हुसो इसु इन्तासो हानिहि। 54कालाउ ताइमि हुर्किका पुरता लोतेङ वा एम्बालाइको कचहरिसाअ्ता एम्बालाइहेङ इस्का बिद्या पिलाउ एम्बालाइ भारभुसाइतेङ एम्बालाइ दोअ्हि, “यासेहेङ इदोइ आकिल रो भारभुसाइका काम पाका सरबङगेलाइ हितासो निङहि? 55हाइ या मिस्तिरिको चान माको? हाइ याको आमाइको मिङ मरियम रो याको ओनेगेलाइ याकुब, योसेफ, सिमोन रो यहुदा माको कुनु? 56हाइ याको बेजान ओनेगेलाइ झाराङ केलाइदोफाङ माहि कुनु? या इदोइ गोताङ काथा हितासो निङहि?”
57कालाउ एम्बालाइ वाकोदोफा चेरताम्पाहि। कालाउबुङ इसु एम्बालाइहेङ दोअ्हि, “परमेस्वर पाहासो धुइकाहेङ ताइकोङ मुलुक रो ताइकोङ देराता बिना बोमिसो गोताङ थामेता मान जेङखे।”#युहन्ना ४:४४ 58कालाउ एम्बालाइको खान्धुर मापानाङसिङ वा इन्ता भारभुसाइका हेन्जा कामगेलाइ मापाहि।
المحددات الحالية:
मत्ति 13: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
