मत्ति 12
12
माइसाका दिनाको प्रभु
(मरकुस २:२३-२८; ३:१-६; लुका ६:१-११)
1इङको पहर इसु माइसाका#१२:१ माइसाका जाइको माने “आरेका” जेङखे। दिनाता गोहोमको मिलिङ पाहासो हानिदोङघाहि। वाको चात्यागेलाइ म्हितुका हिघाखे रो गोहोमको सिसा पेङतेङ चालि तेङहि।#न्याम २३:२५ 2कालाउबुङ फरिसिगेलाइ इदोइ तिङतेङ वासेहेङ दोअ्हि, “खाङ, नाङको चात्यागेलाइ पुनित माइसाका दिनाता न्यामता जेदोङ पालि ठिक मान्थु, इङकोङ पाखे।”
3कालाउबुङ इसु एम्बालाइहेङ दोअ्हि, “दाउद रो वाकोदोसा हिकालाइ म्हितुलाउ हाइ पाका हिघाहि, हाइ नेलाइ धरमकिताबता पर्हिका मान्थुसुन्हा? 4दाउद परमेस्वरको थानलिअ्ता दुल्तेङ परमेस्वरहेङ चार्हाइका तोले वा रो वाको सानाइतिगेलाइ चाका हिघाहि। इङको तोले मोसाको न्याम आन्सार धामिगेलाइ खिनिङ चालि दोघाहि।#१ सामुएल २१:१-६; लेबि २४:९ 5आरोङ हाइ नेलाइ धरमकिताबता पर्हिका मान्थुसुन्हा? थानता धामिगेलाइ माइसाका दिनाता दिनाङ काम पाखे रो एसापा एम्बालाइ माइसाका दिनाको न्यामहेङ बितुल पाखे। कालाउबुङ एम्बालाइ दुसि माजेङखे।#गान्देका २८:९-१० 6कालाउबुङ का नेलाइहेङ दोअ्खा, थानखान्तेङ बारका हासु इता हि। 7कालाउ ‘का नेलाइको चार्हाइका भोक माको, भुरुङ नेलाइ दायासु दोअ्तेङ का इछा पाखा’ दोअ्का माने नेलाइ गिका हिनु नेलाइ दुस मान्थुकाहेङ मादुसिसुधाना।#मत्ति ९:१३; होसे ६:६ 8हाइपानु का द्याङको चान माइसाका दिनाको बुङ प्रभु हिघा।”
9इन्तासो ओल्हितेङ इसु एम्बालाइको कचहरिसाअ्ता हानिहि। 10इन्ता एअ्मि खुर सेङका द्याङ हिघाहि। फरिसिगेलाइ इसुहेङ दुसिलि बिचार पातेङ वासेहेङ हिअ्हि, “हाइ माइसाका दिनाता रोगाइका द्याङहेङ एल्पालि ठिक ज्याङ?” 11इसु एम्बालाइहेङ दोअ्हि, “नेलाइता हासुको एलोङ भेरा हि, माइसाका दिनाता इङको खाराता वालानु, हाइ ना इङकोहेङ बाहार माओल्हेपाना कुनु?#लुका १४:५ 12भेराखान्तेङ द्याङ हेथे हेन्जा मोलहिका मान्थु कुनु? इदोङभाअ्सिङ माइसाका दिनाता भालाइ पालि ठिक हि।” 13कालाउ इसु इङको द्याङहेङ दोअ्हि, “नाङको खुर सोझापा।” इङको खुर सोझापाहि रो इङकोको खुर भेनेङ भाइपा रेम्का जेङहि। 14कालाउबुङ फरिसिगेलाइ बाहार हानितेङ इसुहेङ हेसापा सेअ्लि द्वाङ दोअ्तेङ साल्हा पालि तेङहि।
परमेस्वरको साल्का सेबक
(मरकुस ३:७-१२; लुका ६:१७-१९)
15कालाउबुङ इसु इङको काथा गितेङ वा इन्तासो हानिहि। हेन्जाङ द्याङगेलाइ वासेहेङ पिताइहि रो वा मासाअ्धेका झाराङहेङ एल्पाहि। 16कालाउबुङ वा एम्बालाइहेङ, इदोइ बारेता हासुहेङ हाइदोङ मादोअ्सु दोअ्तेङ चेतानि पिहि। 17यासाइया परमेस्वर पाहासो धुइका बचन पोङघालि दोङ इदोइ जेङका:
18“खाङसु, का साल्का काङको मोन्दाताका सेबक या दोङ हि।
वासेहेङ का हेन्जाङ माया पाखा रो वादोफा का हेन्जा लेङचाका हिघा,
का ताइको हाङसा वासेहेङ प्याङका
कालाउ वा जात्या जात्याको द्याङगेलाइहेङ नियाको पारचार पावा।#यासाइया ४२:१-४
19वा ना चेरस्वावा ना हेन्जा चिय्हास्वावा, ना हासुङ इङकोको गाला दामागेलाइता हिनावा।
20भोइका नाले वा माथुरावा,
सिलि तोम्का गेसा वा मासेअ्तावा,
रो न्हुअ्सो नियाहेङ जितिकाथिकापा थुकापावा।
21इङकोकोङ मिङता जात्या जात्यागेलाइ आस ताअ्तावा।”
इसु रो साइतान
(मरकुस ३:२०-३०; लुका ११:१४-२३)
22कालाउ द्याङगेलाइ मासान खोअ्तेङ कान्हा रो लाता जेङका एअ्मि द्याङहेङ इसुकोता चुमाहि। इसु इङकोहेङ एल्पाहि, कालाउ इङको कान्हा रो लाटा द्याङ धुइका रो तिङका जेङहि। 23कालाउ झाराङ द्याङगेलाइ भारभुसाइतेङ दोअ्हि, “हाइ या दोङ दाउदको खाल कुनु?” 24कालाउबुङ इदोइ हिङतेङ फरिसिगेलाइ दोअ्हि, “इदोइ द्याङ मासानको मालिक साइतान#१२:२४ साइतान जाइहेङ “मासानको मालिक” “साइतान” रो “बालजिबुल” दोअ्खे।सो खिनिङ मासानगेलाइहेङ ओल्हिपाखे।”#मत्ति ९:३४; १०:२५
25कालाउबुङ इसु एम्बालाइको बिचार गितेङ एम्बालाइहेङ दोअ्हि, “हिदि बुङ मुलुकता मामिलिसुका हिनु इङको मुलुक ताइमिङ मुअ्तावा। एन्साङपातेङ जेदोङ पुर माकुनु खालता मामिलिसुतेङ पाल्सुनु इङको बुङ मुअ्तावा। 26एन्सा दोङ साइतान साइतानहेङ ओल्हिपानु, इङको ताइमिङ खेङन्हावा रो एन्सानु इङकोको सारभि हेसापा आरेलि द्वावा कुनु? 27एन्सा दोङ का साइतानसो मासानगेलाइ ओल्हिपाखा पानु, नेलाइको चात्यागेलाइ चाहिँ हासुसो इङको ओल्हिपाखे? एन्सानु नेलाइको ताइको चात्यागेलाइ दोङ नेलाइहेङ दुस्यावा। 28कालाउबुङ परमेस्वरको हाङसासो का मासान ओल्हिपाखा पानु, परमेस्वर राज पाका पहर नेलाइको माझाता लोलि दोका हि।
29 “हिङसु, लाम्फा बोल्याका द्याङहेङ माधेउसिङ, इङकोको साअ्लिअ्ता दुल्तेङ हासु इङकोको आनेमाने चुमपुतेङ हानिलि द्वावा? आरोङ इङको बोल्याका द्याङहेङ धेउकान्हुअ्सो खिनिङ इङकोको साअ् घिङलि द्वावा।
30 “जाइ कादोफा मामिलिखे, इङको काङको बिरुद्धता हि। जाइ कादोफा माजोम्पाखे, इङको राइन्हा पाखे। #
मरकुस ९:४०
31एन्साङ का नेलाइहेङ दोअ्खा, द्याङगेलाइको पाका गोताङ पाप रो बादानामि माफ ज्यावा, कालाउबुङ पुनित हाङसाको खिलापता पाका बादानामि हेअ्लाउ माफ माज्यावा। 32जाइ का द्याङको खिलापता हाइदोङ दोअ्हि पानु इङकोहेङ माफ ज्यावा, कालाउबुङ जाइ पुनित हाङसाको बादानामि पानु इङकोहेङ इदोइ जुगता रो लोका जुगता बुङ माफ माज्यावा।#लुका १२:१०
सिङहेङ वाको फलसोङ नाल्खे
(लुका ६:४३-४५)
33 “साअ्धेका सिङ साअ्धेकाङ फल सेपाखे। मासाअ्धेका सिङ मासाअ्धेकाङ फल सेपाखे। सिङ हिसिका हि दोअ्तेङ वाको फलसो दोङ नाल्खे। #
मत्ति ७:२०; लुका ६:४४ 34ओइ बिसहिका पुह्याँको जामालाइ! नेलाइ ताइमिङ दुरजन हिसुन्हा, रेम्का काथा हेसापा धुइलि दोस्वाना? हाइदोनु जेदोङ काथा लिअ्ता पोङघाका हिखे इङको दोङ बाहार ओल्हिखे।#मत्ति ३:७; १५:१८; २३:३३; लुका ३:७; ६:४५ 35रेम्का द्याङ ताइमि लिअ्ता पोङघाका रेम्का काथासो रेम्काङ काथा ओल्हिपाखे, कालाउबुङ दुरजन द्याङ ताइमिता पोङघाका दुरजनसो दुरजन काथा दोङ ओल्हिपाखे। 36का नेलाइहेङ दोअ्खा, ‘जाइ माजेङका काथा धुइखे, नियाको दिनाता एम्बालाइ इङकोको हिसाब पिलिगोयावा।’ 37हाइपानु नेलाइ धुइका काथासो दोङ नेलाइ नियाको दिनाता दुस माकुनु दुस मान्थुका जेङस्वाना।”
भारभुसाइका काम खाङलि भोका
(मरकुस ८:११-१२; लुका ११:२९-३२)
38कालाउ धरम मास्टर रो फरिसिगेलाइता आधिमि इसुहेङ दोअ्हि, “मास्टर, केलाइ नासो एलोङ भारभुसाइका काम खाङलि भोन्हाखे।”#मत्ति १६:१; मरकुस ८:११; लुका ११:१६ 39इसु एम्बालाइहेङ दोअ्हि, “दुरजन रो कासबिरि खाल चिन्हो भोखे। कालाउबुङ इदोइ खालहेङ योना परमेस्वर पाहासो धुइकाको चिन्होबाहेक बो चिन्हो माप्यावा।#युहन्ना १:१७-२:१०; मत्ति १६:४; मरकुस ८:१२; योना १:१-४:११ 40हाइपानु जेसापा योना बारका हायाको हेमुङलिअ्ता सुम दिना रो सुम न्हिसिङ हिघाखे, एन्सा दोङ का द्याङको चान बुङ भोनो लेता सुम दिना रो सुम न्हिसिङ ह्यावा।#योना १:१७ 41नियाको दिनाता निनबेको द्याङगेलाइ इदोइ खालको द्याङगेलाइदोफाङ जाअ्तेङ दुस्यावा, हाइपानु योना पारचार पालाउ एम्बालाइ पास्ताइघाखे। कालाउबुङ खाङसु, योनाखान्तेङ बारका एअ्मि इता हि।#योना ३:५ 42माहेँको रानि नियाको दिनाता इदोइ खालको द्याङगेलाइदोफाङ जाअ्तेङ वासेहेङ दुस्यावा, हाइपानु वा दुनियाको ओदोइ कोन्हासो सोलोमनको आकिलको काथा हिङलि लोहि। कालाउबुङ खाङसु, सोलोमनखान्तेङ बारका एअ्मि इता हि।#१ राजा १०:१-१०; २ इतिहास ९:१-१२
मासान हाङसा घुरितेङ लोखे
(लुका ११:२४-२६)
43 “जेलाउ मासान हाङसा द्याङसो ओल्हितेङ हानिखे, इङको माइसालि भोतेङ सेङका थामेभारि हिगिल्खे, कालाउबुङ हिसोङ मानिङखे। 44कालाउ इङको दोअ्खे, ‘जेतासो का ओल्हितेङ लोघा, इङकोङ थामेता घुरितेङ हानाङका।’ घुरितेङ लोलाउ इङको थामे खालि, थाइथाइका रो साजाइतेङ ताअ्का निङखे। 45कालाउ इङको हानिखे रो ताइमिखान्तेङ हेन्जा दुरजन बो न्हिअ्लोङ मासान हाङसा ताइमिदोफा चुमाखे रो लिअ्ता दुल्तेङ एम्बालाइ इन्ता बासा हिखे। कालाउ इङको द्याङको न्हुअ् दासा लाम्फाखान्तेङ मारेम्का जेङखे। इदोइ दुरजन खालको द्याङगेलाइहेङ बुङ इन्सिकाङ ज्यावा।”
इसुको आमाइ रो ओनेगेलाइ
(मरकुस ३:३१-३५; लुका ८:१९-२१)
46इसु जोम्कालाइदोफा धुइकाताङ पालाउ, वाको आमाइ रो ओनेगेलाइ बाहार जाअ्तेङ हिघाखे रो वाकोदोफा काथा पालि भोघाखे। 47कालाउ एअ्मि इसुहेङ दोअ्हि, “खाङ, नाङको आमाइ, नाङको ओनेगेलाइ बाहार जाअ्तेङ हि रो नाङकोदोफा काथा पालि भोदोङखे।” 48वाकोदोफा धुइकाहेङ इसु दोअ्हि, “काङको आमाइ हासु हि? काङको ओनेगेलाइ हासु हि?” 49कालाउ वा ताइको खुरहोइ चात्यागेलाइहेङ तिम्पातेङ दोअ्हि, “खाङसु काङको आमाइ रो ओनेगेलाइ। 50हाइदोनु जाइ स्वरगता हितेङ हिका काङको परमेस्वर आबाको काथा मानिखे, एम्बालाइ दोङ काङको दादाओने, बाइओने रो काङको आमाइ।”
المحددات الحالية:
मत्ति 12: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
