मत्ति 11
11
इसु रो चिभुअ्लि पिका युहन्ना
(लुका ७:१८-३५)
1इसु ताइको तेन्हे चात्यागेलाइहेङ इदोइ काथा दोअ्कान्हुअ्सो वा भेरपाको देरागेलाइता द्याङगेलाइहेङ धिरपालि रो रेम्काबानाल हिङपालि हानिहि।
2जेलाउ चिभुअ्लि पिका युहन्ना झ्यालखानाता हिलाउ ख्रिस्टको पाका कामगेलाइको बारेता हिङहि। कालाउ वा ताइको चात्यागेलाइहेङ इसुकोता हिअ्लि दिङगिल्हि। 3एम्बालाइ लोतेङ इसुहेङ हिअ्हि, “केलाइ आस पाका ख्रिस्ट नादोङ हिन्हा? ना केलाइ भेनेङ द्याङको दामा खाङलि?” 4इसु एम्बालाइहेङ दोअ्हि, “नेलाइ हिङका रो तिङका काथागेलाइ युहन्नाहेङ दोअ्पिसु, 5कान्हागेलाइ तिनावा रो नेङगारागेलाइ त्यावा। रोग्याखोअ्कालाइ एलावा। न्हातोङ माहिङकालाइ हिङलि दोका जेङका हि। सिकालाइ सिन्हुतेङ ल्होका हि रो गरिबगेलाइहेङ रेम्काबानाल हिङपादोङखे।#यासाइया ३५:५-६; ६१:१ 6काङको भाअ्सिङ साङखा मापाकालाइ सहसाम्पा निङकालाइ जेनावा।”
7जेलाउ चिभुअ्लि पिका युहन्नाको चात्यागेलाइ हानिकान्हुअ्सो इसु चिभुअ्लि पिका युहन्नाको बारेता इन्ता जोम्कालाइहेङ दोअ्लि तेङहि, “नेलाइ उदादाङका थामेता हाइ खाङलि ओल्हिसुन्हा? हाइ भेरमाता हेङगालाइन्हातेङ हिका नालेहेङ? 8एन्सानु नेलाइ हाइपालि ओल्हिसुन्हा? हाइ जाङका धाबा लागाइका द्याङगेलाइहेङ खाङलि? जाङका धाबा लागाइकालाइ ते राजाको महलता कि हिखे। 9नेलाइ हाइपालि ओल्हिसुन्हा कुनु? हाइ परमेस्वर पाहासो धुइकाहेङ खाङलि? एइ, का नेलाइहेङ दोअ्खा, परमेस्वर पाहासो धुइकाखान्तेङ बुङ बारका एअ्मिहेङ तिङका हिसुन्हा। 10या इङकोङ जाइको बारेता धरमकिताबता लेखिका हि:
‘खाङ, का ताइको स्वरगदुतहेङ नाङको आगाआगा दिङगिलाङका,
जाइ नाङको आगाता नाङको दामा त्यार पावा।’ #
मलाकि ३:१
11 “जातिङको, का नेलाइहेङ दोअ्खा, चिभुअ्लि पिका युहन्नाखान्तेङ मान हिका बो हासुङ जोलोम र्हुका मान्थु। कालाउबुङ स्वरगको सारभिता जाइ झाराङखान्तेङ म्हुइका हि, इङको याखान्तेङ मान हिका ज्यावा। 12चिभुअ्लि पिका युहन्नाको पहरसो एलाथिकापा स्वरगको सारभि रेम्फा आगाइदोङखे, कालाउ चेरफेअ्का द्याङगेलाइ बोलधाकाङ यासेहेङ रिम्खे।#लुका १६:१६ 13हाइपानु युहन्नाको पहरथिकापा झाराङ परमेस्वर पाहासो धुइकालाइ रो न्याम#११:१३न्याम इदोइ न्याम परमेस्वर मोसासो यहुदिगेलाइहेङ पिका हिघाखे।सो स्वरगको सारभिको बारेता धुइका हिघाखे। 14नेलाइ काङको दोअ्का काथाता राजि जेङसुन्हा पानु, लोलिगोइका एलिया युहन्ना दोङ।#मलाकि ४:५; मत्ति १७:१०-१३; मरकुस ९:११-१३ 15जाइको हिङका न्हातोङ हि, इङको हिनाको।
16 “एला इदोइ एलाको द्याङगेलाइहेङ का हाइदोफा दाज्याङका? इदोइ ते हातेता घाका म्हुम्हइका जामालाइ भाइका, जाइ एम्बालाइको सानाइतिगेलाइहेङ काइखे रो दोअ्खे:
17 ‘केलाइ नेलाइको भाअ्सिङ बासुलि म्होअ्न्हाहि, कालाउबुङ नेलाइ मान्हासुन्हा।
केलाइ बिलाप पान्हाहि, कालाउबुङ नेलाइ सुरता मापासुन्हा।’
18 “कालाउ युहन्ना चातेङ रो आम्तेङ मालोहि, एम्बालाइ वासेहेङ मासान खोअ्का हि दोअ्तेङ दोअ्खे। 19का द्याङको चान चातेङ रो आम्तेङ लोघा, कालाउ एम्बालाइ कासेहेङ दोअ्खे, ‘खाङसु, जिहुका, हेन्जा गोरा आम्का, तिरो ल्होपाका रो पापिगेलाइको सानाइति!’ कालाउबुङ परमेस्वरको आकिलहेङ ठिक हि दोअ्तेङ वाको कामगेलाइसोङ दासि पिखे।”
खान्धुर मापाकालाइहेङ चेतानि
(लुका १०:१३-१५)
20जेदोङ जेदोङ पुरता इसु हेन्जाङ भारभुसाइका कामगेलाइ पाका हिघाहि। इङको पुरको द्याङगेलाइ पास्ताइलि माकिअ्नाङसिङ वा एम्बालाइहेङ हाकाराइतेङ दोअ्लि तेङहि,
21 “धिकार खोराजिन रो बेथसेदा पुरको द्याङगेलाइहेङ! हाइपानु नेलाइता पाका सरबङ हिका कामगेलाइ टुरोस रो सिदोन पुरता पानु एम्बालाइ लाम्फादोङ बोराको धाबा लागाइतेङ रो बुअ्सुरि लाइतेङ पास्ताइधावा। #
यासाइया २३:१-१८; इजकिएल २६:१-६; योएल ३:४-८; आमोस १:९-१०; जकरिया ९:२-४ 22कालाउबुङ का नेलाइहेङ दोअ्खा, नियाको दिनाता नेलाइको खान्तेङ ते टुरोस रो सिदोन पुरको द्याङगेलाइको दासा हेन्जा सहेलि दोका ज्यावा।
23 “ओइ कफरनहुम पुरको द्याङगेलाइ, हाइ ना स्वरगथिकापाङ तोल्हेन्हाना कुनु? ना नरकथिकापा हुलन्हाना। हाइपानु नाता पाका सरबङ हिका कामगेलाइ सदोम पुरता पाका हिनु इङको नानिको दिनाथिकापा हितेङहिधावा। #
यासाइया १४:१३-१५; सिरजाइ १९:२४-२८ 24कालाउबुङ का नेलाइहेङ दोअ्खा, नियाको दिनाता नाङको खान्तेङ ते सदोम पुरको दासा हेन्जा सहेलि दोका ज्यावा।”#मत्ति १०:१५; लुका १०:१२
माइकालाइहेङ माइसापाका
(लुका १०:२१-२२)
25इङको पहर इसु दोअ्हि, “ओइ आबा, स्वरग रो सुमिङको प्रभु, का नासेहेङ च्याबास पिखा, हाइपानु ना इदोइ काथा आकिल हिका रो आकिलहिकालाइसो म्होअ्तेङ ताअ्न्हा, कालाउबुङ जामालाइहेङ इदोइ तिङपान्हा। 26एइ, आबा, हाइपानु नासेहेङ एसाङ पालि रेम्का लागिहि।
27 “काङको आबा गोताङ काथाको जिम्मा कासेहेङ पिका हि। आबाबिना चानहेङ हासुङ मानाल्खे रो चानबिना आबाहेङ हासुङ मानाल्खे। कालाउबुङ चान जाइहेङ आबा नाल्पालि भोखे, एम्बालाइ खिनिङ आबाहेङ नाल्खे।” #
युहन्ना १:१८; ३:३५; १०:१५
28 “ओइ झाराङ माइका रो ल्हिकाहोइ एरेन्हाकागेलाइ काङकोता लोसु, का नेलाइहेङ माइसा चापाङका। 29काङको जुङगेले फासु रो कासो धिरसु, हाइदोनु का नोइका रो काङको कोन्धाङ नोमका हि, कालाउ नेलाइ माइसालि निङस्वाना।#यरमिया ६:१६ 30हाइपानु काङको जुङगेले सुकाका हि रो काङको बोकाना होम्का हि।”
المحددات الحالية:
मत्ति 11: DHIM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
