युहन्ना 4
4
इसु रो सामरि बेबाल
1युहन्नाखान्तेङ इसु हेन्जा चात्यागेलाइ बान्हाइदोङखे रो चिभुअ्लि बुङ पिदोङखे दोअ्का फरिसिगेलाइ हिङहि। 2(इसु ताइमिङ ते माको, कालाउबुङ वाको चात्यागेलाइ चिभुअ्लि पिघाखे।) 3जेलाउ इसु इदोइ काथा हिङहि, वा यहुदिया लाअ्तेङ आरोङ गालिलता घुरिहि।
4गालिल हानिलाउ सामरिया जेङतेङ हानिलि गोइघाहि। 5वा सामरियाको सुखार दोअ्का पुरता थुकालिलोहि। इदोइ पुरचाहिँ याकुब ताइको चान योसेफहेङ पिका भोनोको भेरपाङ हिघाहि।#सिरजाइ ३३:१९; यहोसु २४:३२ 6इन्ता याकुबको च्वा हिघाहि। इसु तेकाताङ माइका हिनाङसिङ इङको च्वाको भेरपा योम्तेङ हिघाहि। इङको पहर तेन्हे बजिका हिघाहि।
7इङको पहर एअ्मि सामरि बेबाल चि नानि इन्ता लोहि। इसु इङकोहेङ दोअ्हि, “कासेहेङ चि आम्लि पि।” 8वाको चात्यागेलाइ पुरता चाका आनेमाने चोल्लि हानिका हिघाखे।
9कालाउ सामरि बेबाल वासेहेङ दोअ्हि, “ना यहुदि जेङतेङ का सामरिको खुरसो हेसापा चि आमाना?” (हाइपानु यहुदिगेलाइ सामरिगेलाइदोफा हिदिङ सामान्दा माताअ्घाखे।)#एज्रा ४:१-५; नहेम्याह ४:१,२
10इसु इङकोहेङ दोअ्हि, “ना परमेस्वरको बर रो नादोफा चि र्हेका खामालहेङ नाल्का हिनु, ना वाकोदोफा र्हेधाना रो वा नासेहेङ सिन्हुका चि पिधावा।”
11इङको सामरि बेबाल वासेहेङ दोअ्हि, “मास्टर, नादोफा वाका भान्दा बुङ मान्थु, च्वा बुङ वाङखाराका हि। कालाउ ना हितासो इङको सिन्हुका चि चुमाना? 12हाइ ना केलाइको खाल याकुबखान्तेङ बारका हिन्हा? वा केलाइहेङ इदोइ च्वा तोपापिहि, वाको चानचामिन्दि रो गाइपियागेलाइ इदोङ च्वाको चि आम्हि।”
13इसु इङकोहेङ दोअ्हि, “इदोइ चि आम्का आरोङ आम्लिकिअ्तावा। 14कालाउबुङ जाइ काङको पिका चि आमावा इङको हेअ्लाउ आम्लि माकिअ्तावा। जेदोङ चि का इङकोहेङ प्याङका, इङको इङकोता हेअ्लाउ मामुअ्का जिबनको भाअ्सिङ मुरतेङहिका चिको मुल जेनावा।”
15इङको बेबाल वासेहेङ दोअ्हि, “मास्टर, कासेहेङ इङकोङ चि पि, का आम्लिमाकिअ्ताङका रो इता चि नानि बुङ लोतेङहिलि मागोइधावा।”
16इसु इङकोहेङ दोअ्हि, “हाने, नाङको केअ्हेङ काइतेङ चुमा।”
17इङको बेबाल दोअ्हि, “काङकोते केअ् दोङ मान्थु।”
इसु इङकोहेङ दोअ्हि, “नाङको केअ् मान्थु दोअ्तेङ ना उचितदोङ दोअ्न्हा। 18हाइदोनु नाङको नामि केअ् जेङहोइ रो जाइ एला नादोफा हि, इङको नाङको केअ् माको। ना इदोइ काथा जातिङको दोअ्का हिन्हा।”
19इङको बेबाल वासेहेङ दोअ्हि, “मास्टर, ना परमेस्वर पाहासो धुइका हिन्हा दोअ्तेङ का गिखा। 20केलाइको सामरि आजुखालगेलाइ इदोइ गिरिज्जिम आरदाङता उपासाना पाहि। कालाउबुङ नेलाइ यहुदिगेलाइ दोअ्सुखेना, उपासाना पाका थामे यरुसलेम दोङ।”
21इसु इङकोहेङ दोअ्हि, “आनाउ, कासेहेङ खान्धुर पा, इङको पहर लोदोङखे, जेलाउ नेलाइ ना गिरिज्जिम आरदाङता ना यरुसलेमता आबाको उपासाना पास्वाना। 22नेलाइ सामरिगेलाइ जेदोङ उपासाना पासुखेना इङको मागिसुखेना। केलाइ यहुदिगेलाइ जेदोङ उपासाना पान्हाखे इङको गिन्हाखे। हाइदोनु छुटकाराचाहिँ यहुदिगेलाइसो ल्वाङ। 23कालाउबुङ पहर लोदोङखे रो इङको पहर एलाङ। जेलाउ जातिङको उपासकगेलाइ आबाहेङ हाङसा रो सत्तेता उपासाना पावा। हाइपानु उपासाना पाका इस्काङ उपासकगेलाइहेङ दोङ आबा भोखे। 24परमेस्वर हाङसा हि रो वाको उपासकगेलाइ हाङसा रो सत्तेता उपासाना पालिगोइखे।”
25इङको बेबाल वासेहेङ दोअ्हि, “का गिखा, जेलाउ मसिह (जाइहेङ ख्रिस्ट दोअ्खे) ल्वावा रो, वादोङ केलाइहेङ गोताङ काथा दोअ्प्यावा।”
26इसु इङकोहेङ दोअ्हि, “नादोफा धुइका, का वाआङ।”
27इङको दोङ पहर वाको चात्यागेलाइ इन्ता थुकालिलोहि रो वासेहेङ एअ्मि बेबालदोफा काथापातेङ हिका तिङतेङ भारभुसाइहि। कालाउबुङ एम्बालाइ “ना हाइ भोखेना” रो “ना इङको बेबालदोफा हाइपालि काथा पादोङखेना?” दोअ्तेङ हासुङ माहिअ्हि।
28कालाउ इङको बेबाल ताइको घाइला इन्ताङ लाअ्धितेङ साअ्भारि हानिहि रो द्याङगेलाइहेङ दोअ्हि, 29“लोसु, एअ्मि द्याङहेङ खाङसु, जाइ काङको पाका गोताङ काम कासेहेङ दोअ्पिहि। हाइ वादोङ ख्रिस्ट ते माको?” 30कालाउ देराको द्याङगेलाइ ओल्हितेङ वाकोता लोहि।
31इदोङ माझाता चात्यागेलाइ इसुहेङ एसा दोअ्तेङ बिम्ति पाहि, “मास्टर, चाका आनेमाने चा।”
32कालाउबुङ वा एम्बालाइहेङ दोअ्हि, “कादोफा चालि चाका आनेमाने हि, जाइ नेलाइ मागेस्वाना।”
33इदोइ काथा हिङतेङ चात्यागेलाइ ताताइमिता दोअ्हि, “हाइ हासुङ वासेहेङ चाका आनेमाने चुमापिहि ना हाइको?”
34इसु एम्बालाइहेङ दोअ्हि, “कासेहेङ दिङगिल्काको इछा आन्सार पालि रो वाको काम पोङघापालि दोङ काङको चाका आनेमाने। 35नेलाइ दोअ्सुखेना, ‘बालि मिङलि आरोङ द्या माहिन्हा लाग्याङ’ कालाउबुङ का दोअ्खा, मिलिङ रेसेतेङ खाङसु, बालि मिङलिदोहोइ रो चेका पहर जेङहोइ। 36जाइ बालि चेकावा इङको जेला निनाङ रो हेअ्लाउ मामुअ्का जिबनको भाअ्सिङ सेका जोम्पाङ। कालाउ बिअ्का रो चेका न्हेमिङ दोसादोसाङ लेङचाङ। 37हाइपानु ‘एअ्मि बिअ्तावा रो भेनेङ चेकावा’ दोअ्का बचन इदोइताङ सत्ते ज्यावा। 38का नेलाइहेङ इन्ता चेलि दिङगिल्घा, जेता नेलाइ मिनेत पाका मान्थुसुन्हा। बोगेलाइ मिनेत पाका हि रो एम्बालाइको मिनेतको फल नेलाइ निङका हिसुन्हा।”
39“का जेदोङ पाघा वा कासेहेङ गोताङ दोअ्पिहि” दोअ्का इङको सामरि बेबालको दासिहोइ पातेङ इङको देराको सामरिगेलाइता हेन्जाङ इसुहेङ खान्धुर पाहि। 40इदोइभाअ्सिङ जेलाउ सामरिगेलाइ इसुकोता लोहि, कालाउ एम्बालाइ वासेहेङ एम्बालाइदोफा हिलि बिम्ति पाहि रो वा न्हेनि इन्ता हि। 41कालाउ वाको बचनको भाअ्सिङ बो हेन्जाङ द्याङगेलाइ वासेहेङ खान्धुर पाहि।
42इङको बेबालहेङ एम्बालाइ दोअ्हि, “एला नाङको दोअ्का काथाहोइ खिनिङ केलाइ खान्धुर पाका माको, कालाउबुङ केलाइ ताइमिङ हिङका काथाहोइ जातिङको वा दुनियाको छुटकारा पिका हि दोअ्तेङ केलाइ गिका हिन्हाहि।”
इसु हाकिमको चानहेङ एल्पाका
43इसु इङको थामेता न्हेनिथिकापा हिकान्हुअ्सो गालिल माउजाभारि हानिहि। 44(इसु ताइमिङ दासि पिहि, ताइको मुलुकता परमेस्वर पाहासो धुइकाको मान माजेङखे।)#मत्ति १३:५७; मरकुस ६:४; लुका ४:२४ 45जेलाउ इसु गालिलता लोहि, कालाउ इन्ताको द्याङगेलाइ वासेहेङ मानभाउ पाहि। हाइदोनु यरुसलेमता लाअ्पिका पारबा मानिलि हानिलाउ इसुको पाका भारभुसाइका कामगेलाइ एम्बालाइ तिङका हिघाखे।#युहन्ना २:२३
46इङकोन्हुअ्सो इसु आरोङ गालिलको काना पुरता लोहि। जेता वा चिहेङ आङगुरको निघार बान्हाइका हिघाहि। इसु इदोइ पुरता हिलाउ कफरनहुमता एअ्मि सारकारि हाकिम हिघाखे, जाइको चान मेसाधुअ्का हिघाहि।#युहन्ना २:१-११ 47इसु यहुदियासो गालिलता लोका हि दोअ्का हिङतेङ इङको वाकोता हानिहि, कालाउ इङकोको चानहेङ लोतेङ एल्पापिलि दोअ्तेङ वासेहेङ बिम्ति पाहि। हाइपानु इङकोको चान सिलि तोम्का हिघाहि। 48इसु इङकोहेङ दोअ्हि, “नेलाइ चिनो रो भारभुसाइका कामगेलाइ मातिम्पाधाउ हिदिङ रितहोइ खान्धुर मापास्वाना।”
49इङको हाकिम वासेहेङ दोअ्हि, “दायातेङ, काङको चान सिकाखान्तेङ लाम्फादोङ लोपि।” 50इसु इङकोहेङ दोअ्हि, “हाने, नाङको चान सिन्हुताङ।” कालाउ इसुको दोअ्का बचनता खान्धुर पाहि रो इङको हाकिम ताइको दामा लाअ्हि।
51इङको हानिकाताङ पालाउ दामाता दोङ कामत्यागेलाइ वासेहेङ दुसुतेङ नाङको चान एल्होइ दोअ्तेङ इङकोहेङ दोअ्पिहि। 52हिदोइ पहरसो इङको एल्हि दोअ्तेङ ताइको कामत्यागेलाइहेङ हिअ्लाउ एम्बालाइ दोअ्हि, “आन्जि नितिमा एअ् बजेसो इङकोहेङ मेसा लाअ्हि।” 53कालाउ इसु इङकोहेङ, “नाङको चान सिन्हुताङ” दोअ्का पहरसो दोङ एल्का हिघाहि दोअ्तेङ वा गिहि। कालाउ इङको ताइमिङ रो इङकोको झाराङ चानचामिन्दि इसुता खान्धुर पाहि।
54इदोइचाहिँ यहुदियासो गालिलता लोतेङ इसुको पाका न्हे चिनो हिघाहि।
المحددات الحالية:
युहन्ना 4: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
