युहन्ना 3
3
निकोदेमसहेङ इसुको बिद्या
1फरिसिगेलाइता निकोदेमस मिङ हिका एअ्मि द्याङ हिघाखे। इङको यहुदिगेलाइको बाराकचहरिको एअ्मि सदसे हिघाखे। 2वा न्हिसिङता इसुकोता लोहि रो वासेहेङ दोअ्हि, “मास्टर, केलाइ गिन्हाखे ना परमेस्वरसो लोका मास्टर हिन्हा। हाइपानु परमेस्वर दोसा माहिना पानु नाङको पाका इदोइ चिनोगेलाइ हासुङ पालि माद्वावा।”
3इसु इङकोहेङ दोअ्हि, “जातिङको का नासेहेङ दोअ्खा, हासुङ नावा जेङतेङ जोलोम माजेङनु वा परमेस्वरको सारभि तिङलि माद्वावा।”
4निकोदेमस वासेहेङ दोअ्हि, “द्याङ वाराङ जेङकान्हुअ्सो हेसापा जोन्मिलि द्वावा कुनु? हाइ इङको ताइको आमाइको कोखेता न्हेखे जोन्मिलि द्वावा?”
5इसु इङकोहेङ दोअ्हि, “जातिङको का नासेहेङ दोअ्खा, हासुङ चि रो हाङसासो माजोन्मेहि पानु परमेस्वरको सारभिता दुल्लि माद्वावा। 6जिउसो जोन्मिका जिउ रो हाङसासो जोन्मिका हाङसा। 7का नासेहेङ नावा पातेङ जोन्मिलिगोयाङ दोअ्लाउ माभारभुसाइ। 8भेरमा जेसोङ मन पाखे इन्सोङ फोअ्खे। ना भेरमाको गाला हिङखेना, कालाउबुङ इङको हितासो लोखे रो हिसो हानिखे, इङको माग्याना। हाङसासो जोन्मिका झाराङ खामाल इन्सिकाङ जेङखे।”
9निकोदेमस वासेहेङ दोअ्हि, “इदोइ हेसापा जेङलि द्वावा?”
10इसु इङकोहेङ दोअ्हि, “ना इस्राएलको मास्टर जेङतेङ बुङ इदोइ काथा मागिखेना? 11जातिङको का नासेहेङ दोअ्खा, केलाइ जेदोङ गिन्हाखे इङको दोअ्न्हाखे रो केलाइ जेदोङ तिङका हिन्हाहि इङको दासि पिन्हाखे। कालाउबुङ नेलाइ केलाइको दासि मासाअ्सुखेना। 12का नेलाइहेङ दुनियाको काथा दोअ्घा, कालाउबुङ नेलाइ खान्धुर मापासुखेना। नेलाइहेङ स्वरगको काथा दोअ्पिघा पानु हेसापा खान्धुर पालि दोस्वाना? 13स्वरगसो खुअ्तेङ लोका का द्याङको चान बाहेक हासु बुङ स्वरगता हानिका मान्थु। 14जेसापा मोसा उदादाङका थामेता पुह्याँहेङ तोल्हेहि, एन्सा दोङ का द्याङको चान तोल्हेन्हालि गोयाङ।#गान्देका २१:९ 15एसापा जाइ वासेहेङ खान्धुर पावा, इङको हेअ्लाउ मामुअ्का जिबन निनावा।
16 “हाइदोनु परमेस्वर दुनियाहेङ इस्का माया पाहि, वा ताइको एअ्मिखिनिङ हिका चान बुङ पिहि, इङकोभाअ्सिङ वासेहेङ खान्धुर पाका हासु बुङ मामुअ्ताको, कालाउबुङ इङको हेअ्लाउ मामुअ्का जिबन निनाको। 17हाइपानु परमेस्वर दुनियाहेङ दुसि ठार्हाइलि दोअ्तेङ चानहेङ दुनियाता दिङगिल्का माको, कालाउ दुनिया वासो सिन्हुताको दोअ्तेङ दिङगिल्हि। 18जाइ वासेहेङ खान्धुर पावा, इङको दुसि माठर्हेन्हावा, कालाउ खान्धुर मापाकालाइचाहिँ लाम्फादोङ दुसि ठर्हिन्हाका हि। हाइदोनु वा परमेस्वरको एअ्मिखिनिङ चानको मिङता खान्धुर पाका मान्थु। 19परमेस्वरको फाइसालाचाहिँ नेलाइहेङ इदोङदोङ, फाइसालाम्का दुनियाता लोका हि रो कालाउबुङ द्याङगेलाइ फाइसालाम्काखान्तेङ कितिकितिकाहेङ मोन्दाताहि, हाइपानु एम्बालाइको काम दुरजन हिघाखे। 20हाइदोनु दुरजन काम पाका झाराङ फाइसालाम्काहेङ दिगमिग पाखे रो फाइसालाम्काता मालोखे, माकुनुते इङकोको काम तिनावा। 21सत्तेता सिन्हुका द्याङ फाइसालाम्काता लोखे रो एसापा वाको पाका कामगेलाइ परमेस्वरता पाका दोअ्का रेम्फा तिङखे।”
चिभुअ्लि पिका युहन्नाको न्हुअ् दासि
22इङकोन्हुअ्सो इसु रो वाको चात्यागेलाइ यहुदिया माउजाता हानिहि। इन्ता एम्बालाइदोफा आतुइसा दिना हि रो चिभुअ्लि पिहि। 23युहन्ना बुङ सालिमको भेरपा एनोनता चिभुअ्लि पिघाखे, हाइपानु इन्ता हेन्जा चि हिघाहि। इन्ता द्याङगेलाइ लोघाखे रो चिभुअ्लि र्हुघाखे। 24(इङको पहरथिकापा युहन्ना थुना निङचाका मान्थुघाखे।)#मत्ति १४:३; मरकुस ६:१७; लुका ३:१९,२०
25इङकोङ पहर युहन्नाको चात्यागेलाइको एअ्मि यहुदिदोफा पुनित जेङका बारेता गालाबाजि जेङहि। 26एम्बालाइ युहन्नाकोता लोतेङ दोअ्हि, “मास्टर, यरदन ओदोइपार जाइ नाङकोदोफा हिघाहि, जाइको बारेता ना दासि पिन्हा। खाङ, वा चिभुअ्लि पिदोङखे रो झाराङ वाकोता हानिदोङखे।”
27युहन्ना दोअ्हि, “द्याङहेङ स्वरगसो मापिपाधाउ इङको हिदिङ काथा निङलि माद्वावा। 28‘का ख्रिस्ट माको, कालाउबुङ का वाखान्तेङ लाम्फा दिङगिलन्हाका’ दोअ्का काङको दासि नेलाइ ताइमिङ पिसुखेना।#युहन्ना १:२० 29जाइदोफा कान्या हि, दारुवा इङकोङ। दार्वाको सानाइति जाइ वाको भेरपा जाअ्खे, वाको गाला हिङतेङ हेन्जाङ लेङचाखे। इदोङभाअ्सिङ काङको इदोइ लेङ एला पोङघाका हि। 30वा बारालि, कालाउबुङ काचाहिँ म्हुइलि जरुरि हि।”
स्वरगसो लोका चान
31र्हुतासो लोकाचाहिँ झाराङखान्तेङ बारका हि। दुनियाता हिका दुनियाकोङ जेङखे रो दुनियाकोङ काथा पाखे। स्वरगसो लोका झाराङखान्तेङ बारका हि। 32वा जेदोङ तिङका रो हिङका हि, इङकोको दासि वा पिखे। कालाउबुङ, वाको दासि हासुङ मार्हुखे। 33जाइ वाको दासि र्हुका हि, इङको परमेस्वर सत्ते हि दोअ्का काथाको दासि पिखे। 34हाइदोनु जाइहेङ परमेस्वर दिङगिल्हि, इङको परमेस्वरको बचन धुइखे। हाइपानु परमेस्वर मादोङसिङ पुनित हाङसा पिखे। 35आबा चानहेङ माया पाखे रो गोताङ थोक वाकोङ खुरता पिका हि#मत्ति ११:२७; लुका १०:२२। 36जाइ चानहेङ खान्धुर पाखे, इङकोदोसा हेअ्लाउ मामुअ्का जिबन हि। जाइ चानको हुकुम मासाअ्खे, इङको जिबन मातिनावा, कालाउबुङ परमेस्वरको चेर इङकोर्हुता हितेङह्यावा।
المحددات الحالية:
युहन्ना 3: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
