युहन्ना 5
5
पोखरिता गाहिलि एल्का
1इङकोन्हुअ्सो यहुदिगेलाइको पारबा हिघाहि रो इसु यरुसलेम हानिहि। 2यरुसलेमता भेरा दोअ्का फिनुको भेरपा नालोङ धाअ् हिका एलोङ पोखरि हि, जाइहेङ हिब्रु राउता बेथस्दा दोअ्खे। 3इन्ता हेथे मासाअ्धेकालाइ, मिमातिङका, नेङगारा, गाहिलिगेलाइ साल्हालाङतेङ हिघाखे। [एम्बालाइ चि हेथे पहर हेङगालाइन्हाखे दोअ्तेङ र्हुमघाखे। 4हाइदोनु परमप्रभुको एलोङ दुत पहरपहरता पोखरिता खुअ्तेङ चि हेङगालाइपिघाखे रो चि हेङगालाइन्हाकान्हुअ्सो जाइ लाम्फा चि लिअ्ता दुल्घाखे, जिसिकाङ रोगाइका हिलाउ बुङ इङको एल्घाखे।]#५:४ इदोइ पद लाम्फाको हेन्जाङ बाइबलता मान्थु।
5इन्ता एअ्कुरितेयेअ् बाअ्सारसो मासाअ्धेका एअ्मि द्याङ हिघाहि। 6इसु इङकोहेङ इन्ता साल्हालाङतेङहिका तिङहि, कालाउ र्हिङका पहरसो इङको इदोइ हालतता हिघाहि दोअ्तेङ गितेङ इसु इङकोहेङ दोअ्हि, “हाइ ना एल्लि भोखेना?”
7मासाअ्धेका इसुहेङ दोअ्हि, “मास्टर, जेदोङ पहर चि हेङगालाइन्हापाखे इङको पहर कासेहेङ पोखरिता दुल्पापिका काङको हासुङ द्याङ मान्थु, का हानिकाहानिकाताङ काखान्तेङ लाम्फा भेनेङ द्याङ चिता धासेखे।”
8इसु इङकोहेङ दोअ्हि, “जाअ्, ताइको सिदाउ तोल्हे रो ते।” 9कालाउ ओदोङघरि इङको द्याङ एल्हि रो ताइको सिदाउ फातेङ वा हानिहि।
इङको दिना माइसाका दिना हिघाहि। 10एन्साजेङलाउ एल्पापिका इङको एल्का द्याङहेङ यहुदि आगुवागेलाइ दोअ्हि, “नानि ते माइसाका दिना, नासेहेङ सिदाउ फालि उचित मान्थु।”#नहेम्याह १३:१९; यरमिया १७:२१
11इङको एम्बालाइहेङ दोअ्हि, “जाइ कासेहेङ एल्पाहि, वादोङ दोअ्हि, ‘ताइको सिदाउ फातेङ ते।’”
12एम्बालाइ इङकोहेङ हिअ्हि, “नासेहेङ सिदाउ फातेङ ते दोअ्का द्याङ हासु?”
13ताइमिहेङ एल्पाका इङको द्याङ हासु हिघाहि दोअ्तेङ वा नाल्का मान्थुघाहि। हाइदोनु इङको थामेता चेअ्सुमेअ्सुका हिनाङ इसु इन्तासो हानिलि दोका हिघाहि।
14इङकोन्हुअ्सो इसु वासेहेङ थानता दुसुतेङ दोअ्हि, “खाङ, ना एल्का हिन्हा। आरोङ पाप मापा रो नार्हुता आरोङ मारेम्का माल्वाको।” 15ताइमिहेङ एल्पाका ते इसु हिघाहि दोअ्तेङ इङको द्याङ यहुदि आगुवागेलाइहेङ हिम्पाहि।
परमेस्वरको चानसो जिबन
16कालाउ यहुदि आगुवागेलाइ इसुहेङ सान्ताइलि तेङहि, हाइदोनु वा इदोइ काम माइसाका दिनाता पाका हिघाहि। 17कालाउ इसु एम्बालाइहेङ दोअ्हि, “काङको आबा एलाथिकापा काम पादोङखे रो का बुङ काम पादोङखा।” 18इदोइभाअ्सिङ यहुदि आगुवागेलाइ इसुहेङ सेअ्लि आरोङ हेन्जा बलपातेङ दोअ्हि, “हाइपानु वा माइसाका दिना बाधा पिका काम खिनिङ माको, कालाउबुङ ताइमिहेङ परमेस्वरको एअ्नास बान्हाइतेङ वा परमेस्वरहेङ ताइकोङ आबा दोअ्का हिघाहि।”
19इसु एम्बालाइहेङ दोअ्हि, “जातिङको का नेलाइहेङ दोअ्खा, चान ताइमिङ हाइदोङ पालि माद्वावा, कालाउबुङ आबा जेदोङ पाका तिङखे इङकोङ खिनिङ पाखे, हाइपानु आबा जेदोङ पाखे, चान एन्साङ पाखे। 20हाइदोनु आबा चानहेङ दायाखे रो वा ताइमि पातेङहिका गोताङ काम चानहेङ तिम्पाखे। इदोइखान्तेङ बारका काम वा चानहेङ तिम्पावा रो नेलाइ भारभुसाइ स्वाना। 21हाइदोनु जेसापा आबा सिकालाइहेङ सिन्हुपाखे रो एम्बालाइहेङ जिबन पिखे। एन्सा दोङ चान बुङ जाइहेङ इछा पाखे, इङकोहेङ जिबन पिखे। 22हाइपानु आबा हासुकोङ निया मापाखे, कालाउबुङ गोताङ निया पाका काम चानहेङ पिका हि, 23कालाउ झाराङ चानहेङ मान पाको, जेसापा एम्बालाइ आबाहेङ मान पाखे। चानहेङ मान मापाकालाइ वासेहेङ दिङगिल्का आबाहेङ बुङ मान मापाखे।
24 “जातिङको, का नेलाइहेङ दोअ्ताङका, जाइ काङको बचन हिङखे रो कासेहेङ दिङगिल्काहेङ खान्धुर पाखे, इङकोदोफा हेअ्लाउ मामुअ्का जिबन हि। इङको नियाता मालोखे, कालाउबुङ सिकासो इङको जिबनता दुल्का हि। 25जातिङको, का नेलाइहेङ दोअ्खा, इङको पहर लोदोङखे रो इङको पहर एलाङ, जेलाउ सिकालाइ परमेस्वरको चानको गाला हिनावा रो हिङकालाइ सिन्हुतावा। 26हाइदोनु जेसापा आबा ताइमिङता जिबन हि, एन्सा दोङ वा चानहेङ बुङ ताइमिङता जिबनको मुल जेङका खाबारा पिका हि। 27कालाउ वासेहेङ नियाको बिचार पाका खाबारा पिका हि, हाइदोनु वा द्याङको चान।
28 “इदोइता माभारभुसाइसु, हाइदोनु इङको पहर लोदोङखे, जेलाउ तोमता हिकालाइ झाराङ द्याङको चानको गाला हिनावा, 29कालाउ सिन्हुतेङ बाहार ओलह्यावा। रेम्का काम पाकालाइचाहिँ सिकासो सिन्हुतेङ हेअ्लाउ मामुअ्का जिबन निनावा रो मारेम्का काम पाकालाइचाहिँ दार भोग्यावा।#दानिएल १२:२
30 “का ताइमिङ हाइदोङ पालि मादोखा। जिसिका का हिङखा, इन्सिकाङ निया का पाखा रो काङको निया ठिक जेङखे, हाइपानु का ताइको इछा माभोखा, कालाउबुङ कासेहेङ दिङगिल्काको इछा भोखा।
31 “एदि का ताइको बारेता ताइमिङ दासि पिघा पानु काङको दासि सत्ते माज्यावा। 32काङको बारेता दासि पिका परमेस्वर आबा हि रो वा काङको बारेता जेदोङ दासि पिखे, इङको दासि सत्ते ठर्ह्यावा।
33 “नेलाइ चिभुअ्लि पिका युहन्नाकोता हिअ्लि दिङगिलसुन्हा, कालाउ वा सत्तेको दासि पिका हि। #
युहन्ना १:१९-२७; ३:२७-३० 34काङको भाअ्सिङ द्याङको दासि मागोयाङ, कालाउबुङ नेलाइको छुटकारा ज्याको दोअ्तेङ का इदोइ काथा दोअ्खा। 35युहन्ना फाइसालाम्का रो चिल्काका गेसा हिघाखे रो नेलाइ वाको फाइसालाम्काता आतुइसा पहर खिनिङ लेङचालि राजि जेङसुन्हा।
36 “कादोफा जेदोङ दासि हि, इङको युहन्नाको खान्तेङ बारका हि। हाइपानु जेदोङ कामगेलाइ आबा कासेहेङ पिका हि, इङको काम का पादोङखा। कालाउ वाआङ काङको बारेता दासि पिदोङखे, आबा कासेहेङ दिङगिल्का। 37कासेहेङ दिङगिल्का आबा ताइमिङ काङको बारेता दासि पिका हि। वाको गाला नेलाइ हेअ्लाउ हिङका मान्थुसुन्हा रो वाको रुप बुङ हेअ्लाउ तिङका मान्थुसुन्हा।#मत्ति ३:१७; मरकुस १:११; लुका ३:२२ 38वाको बचन नेलाइता माहिखे, हाइदोनु जाइहेङ वा दिङगिल्हि, नेलाइ वासेहेङ खान्धुर मापासुखेना। 39नेलाइ धरमकिताबता हेअ्लाउ मामुअ्का जिबन निङखे दोअ्तेङ इन्ता भोसुखेना रो इङकोङ किताब दोङ काङको बारेता दोअ्पिखे। 40काङको बारेता दासि पिका इङकोङ धरमकिताब, कालाउबुङ नेलाइ जिबन निङलि काङकोता लोलि इन्कार पासुखेना।
41 “का द्याङगेलाइसो बाखिन्का भोका माको। 42कालाउबुङ परमेस्वरको माया नेलाइता मान्थु दोअ्तेङ का गिखा। 43का ताइको आबाको मिङता लोका हिघा, कालाउबुङ नेलाइ कासेहेङ मार्हुसुखेना। भेनेङ हासुङ ताइकोङ मिङता लोहि पानु इङकोहेङ र्हुस्वाना। 44नेलाइ हेसापा खान्धुर पालि दोस्वाना, नेलाइ मान भोसुखेना। कालाउ इङको मानको माभोसुखेना, जाइ एअ्मिखिनिङ परमेस्वरसो लोखे।
45 “का नेलाइहेङ आबाको आगाता दुस्याङका दोअ्तेङ फोम मापासु। नेलाइहेङ दुसिका ते मोसा हि, जाइता नेलाइ ताइको आस ताअ्का हिसुन्हा। 46हाइदोनु नेलाइ मोसाहेङ खान्धुर पाका हिनु कासेहेङ बुङ खान्धुर पासुधाना, हाइपानु वा काङको बारेता लेखिका हिघाखे। 47कालाउबुङ नेलाइ वाको लेखिका काथागेलाइ खान्धुर मापासुन्हा पानु, काङको दोअ्का हेसापा खान्धुर पास्वाना?”
المحددات الحالية:
युहन्ना 5: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
