युहन्ना 2
2
काना पुरता बिहु जेङका
1सुम दिनाता गालिल माउजाको काना पुरता एलोङ साअ्ता बिहु हिघाहि। इङको बिहुता इसुको आमाइ बुङ लोका हिघाहि। 2इसु रो वाको चात्यागेलाइहेङ बुङ बिहुता नेउता पिका हिघाखे। 3आङगुरको निघार दोकान्हुअ्सो इसुको आमाइ वासेहेङ दोअ्हि, “एम्बालाइदोसा हिका आङगुरको निघार दोहोइ।”
4इसु दोअ्हि, “आमाइ, का हाइपालि गोयाङका कासेहेङ मादोअ्। काङको पहर एलाथिकापा लोनाङ मान्थु।” 5वाको आमाइ कामत्यागेलाइहेङ दोअ्हि, “इसु जेदोङ दोअ्खे, इङकोङ पासु।”
6इन्ता उन्ठुइ खोपाइतेङ ताअ्का तुलोङ घाइलागेलाइ हिघाखे। इङको घाइलागेलाइता साइसाइ लिटर चि चाघाखे। इस्का घाइलागेलाइचाहिँ यहुदिगेलाइ ताइमिहेङ सुदो पालिभाअ्सिङ चालाइगाइघाखे। 7इसु एम्बालाइहेङ दोअ्हि, “घ्याम्पागेलाइता चिहोइ पोङघापासु।” एम्बालाइ घ्याम्पाको नुइथिकापाङ चि पोङघापापिहि।
8इङकोन्हुअ्सो इसु एम्बालाइहेङ दोअ्हि, “एला आतुइसा सारितेङ देराको माझिकोता चुम्पुसु।” एम्बालाइ एन्साङ पाहि। 9जेलाउ देराको माझि इङको चि चाखेहि कालाउ इङको आङगुरको निघार जेङका हिघाहि। इङको आङगुरको निघार हितासो लोहि, इङको हासुङ गिका मान्थुघाहि। कालाउबुङ चि पोङघापाका कामत्यागेलाइ खिनिङ गिघाखे।
कालाउ देराको माझि दारुवाहेङ काइतेङ दोअ्हि, 10“बोमि ते लाम्फा ताका आङगुरको निघार आम्लि पिखे कालाउ बान्सालाइ हेन्जाङ आम्लिदोकान्हुअ्सो खिनिङ माताका आङगुरको निघार पिखे। नाते एलाथिकापा ताका आङगुरको निघार ताअ्का हिना।”
11वाको चिनोगेलाइता इदोइ लाङ चिनो इसु गालिलको काना पुरता पाहि। एसापा वा ताइको पारताप तिङपाहि, कालाउ वाको चात्यागेलाइ वासेहेङ खान्धुर पाहि।
12इङकोन्हुअ्सो वा ताइको आमाइ, ओनेगेलाइ रो चात्यागेलाइदोफा कफरनहुमता हानिहि रो आसा दिना इन्ताङ हि।
इसु थानता बेपार पाकालाइहेङ बाहार ओल्हिपाका
(मत्ति २१:१२-१३; मरकुस ११:१५-१७; लुका १९:४५-४६)
13यहुदिगेलाइको लाअ्पिका पारबा लोलि तोम्का हिघाहि रो इसु यरुसलेमता हानिहि।#दामालाअ्का १२:१-२७ 14वा थानता पिया, भेरा, पारेउ पिअ्कालाइहेङ रो टाका सोकालाइ चोल्तेङपिअ्तेङ हिका दुसुहि। 15कालाउ दिह्यामको एलोङ छरि बान्हाइतेङ वा इङको झाराङहेङ, इङकोको भेरागेलाइ रो पियागेलाइहेङ सुदाङ थानसो बाहार गिल्गिल्हि रो टाका सोकालाइको टाका राइपितेङ एम्बालाइको टेबुल सुदाङ उन्धिपापिहि। 16पारेउ पिअ्कालाइहेङ वा दोअ्हि, “इतासो इदोइ गोताङ थोक चुमपुसु। काङको आबाको साअ्हेङ चोल्कापिअ्का थामे माबान्हाइसु!”
17इङको पहर वाको चात्यागेलाइ धरमकिताबता लेखिका इदोइ काथा फोमपाहि, “नाङको साअ्को भाअ्सिङ काङको हाउसाहोइ काङको कोन्धाङता मेभाइपा तिकावा।”#ले ६९:९
18यहुदि आगुवागेलाइ इसुहेङ दोअ्हि, “ना इदोइ काम पाखेना पानु, याको भाअ्सिङ केलाइहेङ हाइ चिनो तिङपाना?”
19इसु एम्बालाइहेङ दोअ्हि, “इदोइ थानहेङ र्हाअ्पिसु रो का सुमनिता यासेहेङ बान्हायाङका।”#मत्ति २६:६१; २७:४०; मरकुस १४:५८; १५:२९
20कालाउ यहुदिगेलाइ दोअ्हि, “इदोइ थानहेङ बान्हाइलि न्हेकुरितु बाअ्सार लागिका हिघाहि। हाइ ना यासेहेङ सुमनिता बान्हाइलि द्वाना कुनु?” 21कालाउबुङ जेदोङ थानको बारेता इसु धुइका हिघाहि, इङको वाको जिउ हिघाहि। 22जेलाउ वा सिकासो सिन्हुहि, कालाउ इसुको दोअ्का इदोइ काथा चात्यागेलाइ फोमपाहि। कालाउ एम्बालाइ धरमकिताब रो इसुको धुइका काथाता खान्धुर पाहि।
23जेलाउ वा लाअ्पिका पारबाको भतेरको पहर यरुसलेमता हिघाहि, कालाउ वाको पाका चिनोगेलाइ तिङतेङ हेन्जाङ द्याङगेलाइ वाको मिङता खान्धुर पाहि। 24कालाउबुङ इसु ताइमिङ एम्बालाइको भरता मालाअ्हि, हाइदोनु वा झाराङ द्याङगेलाइहेङ रेम्फा नाल्खे। 25वा द्याङको लिअ्ताको कोन्धाङहेङ गिनाङसिङ हासु बुङ वासेहेङ हिदिङ द्याङको बारेता दोअ्लि मागोइघाहि।
المحددات الحالية:
युहन्ना 2: DHIM
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Nepal Bible Society and Wycliffe Bible Translators, Inc.
