लूका 21
21
विधवै याछ भेटी
(मर्कूस १२:४१-४४)
1धनी भर्मीकै लाहा लहो भेटी मन्दिरौ दान बाकसाङ कामन लेच येशूये डाङा। 2होटै काट गरीब विधवै र तामौ नीस सिक्का कामन लेच येशूये डाङा। 3इसे डाङार येशूये डेया, “साँच्ची न ङा नाखुरीककी डेले, इसे गरीब विधवै पट्टकै डेनाङ वास्टै भेटी कामने। 4हीजैडेनाङ अरुकै चहिँ लहो प्रशस्त धन लकीङ भेटी कामने, तर इसे गरीब विधवै च मेल्हौ जीविका क्योट्की पर्च पट्ट न याम्हने।”
संसारौ अन्तिमाङ डाङ्च चिन्हको
(मत्ती २४:१-१४; मर्कूस १३:१-१३)
5कुडीक चेलाकै, सेछ-सेछ ल्हुङै खास्च र चढडीच सामानकै सिङ्गारीच परमेश्वरौ मन्दिरौ बारेयाङ कुरा जाट्न न लेया। येशूये डेया, 6“नाखुरीकै चाहाँ ही डाङ्ङ ङुमने, कायाक याङ्च समय राल्हे काट ल्हुङ टकी अर्को ल्हुङ माछान्ने, होसे पट्ट न भत्कडीले।”
7होखुरीकै गीना, “गुरु ज्यु, याङ्च सेन छान्ने? अनि याङ्च कुरा छान्की पानाङ ही चिन्ह छान्ने?” 8होटै येशूये डेया, “होशियार छान्नी, नाखुरीककी सुयेर माढाँट्डीख्यो। ङौ म्यार्मीनाङ वास्टै जना ‘मुक्ति याछ ख्रीष्ट ङा न हो’ डेम राल्हे र ‘होसे समय खेरेप राम्हने’ डेले, तर नाखुरीक होखुरीकुङ न्हुङ-न्हुङ मानुङ्नी। 9नाखुरीकै जब लडाइँ र झगडा छान्च कुराको सेले होडीक बेला माबीह्रीखी। हीजैडेनाङ पहिला इसे घटनाको छान्की न पर्ले। तर होडीक न बेला संसारौ अन्त्य चहिँ माछान्ने।”
10होटै येशूये फेरि होखुरीककी डेया, “जातियो विरुद्धाङ जाति, राज्यौ विरुद्धाङ राज्य सोले। 11बा-बाड्सो भूइँचालो नुङ्ले। अनिकाल र विपत्तिको राल्हे। मासेछ रुढीको राल्हे र सर्घाङ बीह्रीमसेच कुराको छान्ने। होला बा-बाड्सो चिन्हको डाङ्ले।
12 “तर इसे पट्ट कुराको छान्की डेनाङ अगाडि भर्मीकै नाखुरीककी ङाकी विश्वास जाट्च बाटै घोले, सतडीयार होटै यहूदीकुङ सभा ङुच इमाङ जिम्मा याल्हे। झ्यालखानाङ आल्हार ठुन्ले। नाखुरीककी होखुरीकै राजा र शासककुङ अगाडि आल्हे। 13तर होडीक बेला नाखुरीकुङ लागि चहिँ ङौ बारेयाङ गवाही याछ सेछ मौका छान्ने। 14होटबाटै लाहाकी जोगडीकी ही ङाक्की पर्ले डेम चिन्ता माजाट्नी। 15हीजैडेनाङ ङा नाखुरीककी ही ङाक्की पर्च शब्दको र बुद्धि याल्हे। होटबाटै नाखुरीकै डेच कुरौ जवाफ नाखुरीकुङ विरोधीकै याखी माह्योक्ले। 16तर नाखुरीकुङ बोइ-मोइ, डाजेभाइकै, लहो भर्मीकै, लाफाकै न नाखुरीककी घोवाक्ले। नाखुरीक मध्याङ कुडीक जनाकी चहिँ होखुरीकै साट्ले। 17ङाकी विश्वास जाट्च बाटै नाखुरीककी पट्ट भर्मीकै माजाक्ले। 18तर नाखुरीकुङ मीटालुङ काट मीछाम र नाश माछान्ने। 19सहडीयार ङुनी, होटजाट्न नाखुरीकै जीवन डुप्ले।
यरूशलेमकी डाङार येशूये दु:ख मन जाट्च
(मत्ती २४:१५-२१; मर्कूस १३:१४-१९)
20 “जब यरूशलेम सहरकी सेनाकै घेरीच डाङ्ले। तब यरूशलेमौ नाश छान्च बेला खेरेप टाह्रामे डेम नाखुरीकै वार्न्ही। 21होडीक बेला यहूदियाङ लेचको पहाड पट्टी अट भोग्डीस्ख्यो। सहर भित्री लेचको सहर अट डासै र लाङ्घाङ लेचको सहराङ माह्राख्यो। 22हीजैडेनाङ रीक्च कुरा पट्ट न ओल्खी डेम इसे सजायो दिन छान्ने। 23होसे दिनाङ गर्भवतीको र मीकुह्वाङ दुध कास्न ङुच मोइकुङ लागि कुडीक बीह्रीम सेम छान्ने औला! हीजैडेनाङ पृथ्वीयाङ बाड्को सङ्कष्ट राल्हे। इसे जाति मीटाक परमेश्वरौ दण्ड पर्ले। 24होखुरीक कुडीककी तरवारै डठ्याकार साट्ले। कुडीककी चहिँ देश-देशाङ कैदी खासार आल्हे। अन्यजातिकुङ समय माओल्ठर होखुरीकै यरूशलेमकी मीकु म्होकी फेटार डाले।
भर्मीयो मीजा राछ दिनौ चिन्ह
(मत्ती २४:२९-३१; मर्कूस १३:२४-२७)
25 “नाखान, ग्याहोट र टुगाकोवाङ अचम्मौ चिन्हको डाङ्ले। समुद्र गर्जडीस्च र डीयौ बीह्रीमसेच छालै जाट्न पृथ्वीयाङ पट्ट जातियो भर्मीको बीह्रीयार आलाप-विलाप छान्ने। 26संसाराङ छान्च घटनाकै जाट्नाङ भर्मीको बीह्रीयार मुर्छा पर्ले। हीजैडेनाङ सर्घुङ शक्तिको र होयोले। 27होटै न्हुइङ भर्मीयो मीजाकी बाड्को शक्ति र महिमाखाटा डेबुवाङ राछै जाट्च होखुरीकै डाङ्ले। 28जब इसे कुरा छान्की ठाल्ले, होटै नाखुरीक साहसी छानार लहो मीटालु सोटार ढेम्लाक ङोस्नी। हीजैडेनाङ नाखुरीकुङ उद्धार खेरेप छान्ने।”
अञ्जीरौ म्यार्टुङ लकीङ शिक्षा
(मत्ती २४:३२-३५; मर्कूस १३:२८-३१)
29होटै न्हुइङ येशूये होखुरीककी उदाहरण सेटाका, “अञ्जीरौ म्यार्टुङ्की र पट्ट न सीङौ म्यार्टुङकोलाक ङोस्नी। 30होखुरीकुङ मुनाको म्हेर्च डाङार नाखुरीकै थाहा डीन्ल्हे, अब खान्छ याम राहा। 31होटजाट्न न नाखुरीकै र जब इसे कुराको छान्न राछ डाङ्ले, होटै परमेश्वरौ राज्य खेरेप टाह्रामे डेम वार्न्ही। 32साँच्ची न ङा नाखुरीककी डेले, इसे पट्ट न कुरा पूरा माछान्ठर इसे पुस्ता नाश माछान्ने। 33सर्घा र पृथ्वी म्हाटार नुङ्ले, तर ङौ वचन सेन र माम्हाट्ले।
होशियार छान्की
34 “नाखुरीक लहो बारेयाङ होशियार छान्नी। वास्टै भोज-भत्याराङ नुङार म्होर्न माह्वानी। लहो जीवनौ चिन्ता माजाट्नी। नभा च नाखुरीकुङ मीमन बोधो छान्ने र होसनीक नाखुरीकै माचीतडीच बेलाङ पासो लेखा न आरहे। 35हीजैडेनाङ इटजाट्न न पट्ट पृथ्वीयाङ ङुच भर्मीको मीटाक इसे आइपर्ले। 36तर होशियार छानार ङुनी। बीह्रीमसेच पट्ट कुरा लकीङ भीस्की र भर्मीयो मीजौ म्याहासाङ खडा छान्की शक्ति यान्ही डेयार परमेश्वरखाटा सधैँ न प्रार्थना जाट्न न ङुनी।” 37होडीक बेला येशूये नाम्सीन चहिँ परमेश्वरौ मन्दिराङ शिक्षा पाहाक्ङन्या। नाबीक चहिँ जैतून डाँडाङ नुङार बास ङुमन्या। 38होटै भर्मीको गोराक न होसकुङ शिक्षा सेकी डेम परमेश्वरौ मन्दिराङ राम्हन्या।
المحددات الحالية:
लूका 21: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
