लूका 20
20
येशूओ अधिकारौ बारेयाङ गीन्च
(मत्ती २१:२३-२७; मर्कूस ११:२७-३३)
1कायाक परमेश्वरौ मन्दिराङ येशूये भर्मीकोलाक शिक्षा याम्हन लेया। होखुरीककी सेछ समाचार सेटाक्न न लेया। होडीक न बेला मुख्य पूजाहारीको, धर्मगुरुको र अगुवाको होसको लेठाङ राहा। 2अनि होसकोकी इट डेम गीना, “कानकी डेनी, नाकै इसे काम कुसे अधिकारै जाट्नन ले? नाकोकी इसे अधिकार सुये याहा?”
3होसकै होखुरीककी याङ्च जवाफ याहा, “ङा र नाखुरीककी काट कुरा गीन्ने, ङाकी डेनी। 4यूहन्नै याछ बप्तिस्मौ अधिकार स्वर्ग लकीङ लेया, की भर्मी लकीङ लेया?” 5होखुरीक मेखुरी-मेखुरीक कुरा जाट्की ठाला, “स्वर्ग, लकीङ डेया डेनाङ, ‘नाखुरीकै यूहन्नाकी हीजै विश्वास माजाटा ट?’ डेयार होचे डेले। 6‘भर्मी लकीङ’ डेइङ डेनाङ, पट्ट भर्मीकै कानकी ल्हुङै ङाप्ले। हीजैडेनाङ यूहन्ना अगमवक्ता हो डेच होखुरीककी पक्का विश्वास ले।” 7होटबाटै होखुरीकै होसकोकी इट डेया, “खोइ, कान हीर माह्वार्ले।” 8होटै येशूये होखुरीककी डेया, “होटडेनाङ ङा कुसे अधिकारै इसे काम जाट्ले, ङा र नाखुरीककी माडेले।”
अधिया जाट्चको
(मत्ती २१:३३-४६; मर्कूस १२:१-१२)
9होटै न्हुइङ येशूये भर्मीकोलाक उदाहरण याछै डेया, “काट भर्मीये ह्याङ अङ्गुर रोप्डीया। होचे भर्मीकोलाक अधिया जाट्की याहार मेल्हा चहिँ वास्टै याकौ लागि लोस देशाङ नुङा। 10अङ्गुर म्हीन्च न्हुइङ होचे काट जना नोकरकी लहो भाग लाकी डेम बीर्न्हका। तर होसे अधिया जाट्च भर्मीकै नोकरकी डुङार हीर मायाम्ह मर्ल्याङ्न ल्हेसाका। 11फेरि होचे अर्को नोकरकी बीर्न्हका। अधिया जाट्च भर्मीकै होसकी र डुङार बेइज्जत जाटा र हीर मायाम्ह मर्ल्याङ्न ल्हेसाका। 12होटै होचे फेरि अर्को नोकरकी र बीर्न्हका। तर होखुरीकै होसकी र घाइत्या खासार लोम्ह याहा।”
13 “होटै न्हुइङ अङ्गुर बारीयो मीमुरुङै डेया, ‘अब ङा ही जाटीङ? ङाल्हौ जाक्च मीजाकी न बीर्न्हकाले। ङौ मीजाकी च होखुरीकै आदर आजाटै।’ 14तर अधिया जाट्च भर्मीकै मीमुरुङौ मीजा राछ लोसीङ न डाङार लाहा लाहाङ कुरा जाटा, ‘होसे च बारी मालिकौ मीजा हो। कान इसकी साटीङ होटै होच्यो पट्ट सम्पत्ति कानुङ छान्ने।’ 15होटै होखुरीकै होसकी र अङ्गुर बारीयो बाहिर आल्हार साटा। अब अङ्गुर बारीयो मीमुरुङै होखुरीककी ही जाट्ले औला?”
16 “मालिक राहार होसे दुष्ट अधिया जाट्च भर्मीकोलाक साट्ले र लहो ह्या अरुकोलाक जाट्की याल्हे। भर्मीकै इसे कुरा सेयार डेया, ‘याङ्च च सेन र माछान्ख्यो।’”
17तर येशूये होखुरीककी ङोसार डेया, “ङोस्नी इसे रीक्च ही होट?
‘होसे ल्हुङ्की इम खास्च कर्मीकै रद्द जाटा,
होसे ल्हुङ न इमौ गारो सोट्च सुर ल्हुङ छाना।’ #
भजनसंग्रह ११८:२२
18 “होसे ल्हुङ टकी झाल्च पट्ट न भाट्ले। तर होसे ही मीटाक झाल्ले होचे होसकी धुलोपिठो खास्ले।”
कर तेरीच बारेयाङ गीन्च
(मत्ती २२:१५-२२; मर्कूस १२:१३-१७)
19धर्मगुरुको र मुख्य पूजाहारीकै इसे उदाहरण मेखुरीकुङ विरुद्धाङ डेच हो डेम वाह्रा होडीक न बेला येशूकी घोकी पा। तर होखुरीक भर्मीकोखाटा बीह्रीमन्या। 20होट छान्न होसकोकी सुटुक्कै घोकी होखुरीकै दाउ ङोस्की ठाला। होखुरीकै होसकोकी घोवार रोमी बडाहाकिमौ मीहुटाङ जिम्मा याखी मीमन जाट्न ङुमन्या। इमानदार छान्च ल्हेसार येशूखाटा कुरा खुसार फँसडीङ, डेम होखुरीकै भर्मीकोलाक घुस याहार बीर्न्हका। 21होसे भर्मीकै नुङार येशूकी गीना, “ए गुरु ज्यु, कानकी थाहा ले, नाकै डेच कुरा र पाहाक्च शिक्षा ठिक ले। नाकै सुओर पक्षपात माजाट्ले र परमेश्वरौ सत्यौ लाम टान्हाक्ले। 22होटबाटै कानकी इसे कुरा डेम यान्ही, ही कानै कैसरकी कर तेरीकी सेम्ह ले की माले?” 23तर होसकै होखुरीकुङ मासेछ विचार वाह्रार डेया, 24“ङाकी काट रोमी सिक्का टान्हाक्नी, इला सुओ नक्सा र सुओ म्यार्मीन ले?” होखुरीकै डेया, “कैसरौ ले।” 25होसकै होखुरीककी डेया, “होटडेनाङ ही कैसरौ हो कैसरकी यान्ही र परमेश्वरौ ही हो परमेश्वरकी यान्ही।” 26होखुरीकै भर्मीकुङ म्याहासाङ होसकोकी कुसे कुराङ र फँसडीकी माह्योका। होटै अचम्म मन्डीचै माच्याक्ङ ङुवा।
सीच लकीङ जीवाम सोच बारेयाङ येशूकी गीन्च
(मत्ती २२:२३-३३; मर्कूस १२:१८-२७)
27होटै न्हुइङ कुडीक सदुकीको चहिँ येशू लेठाङ राहा। भर्मी सीच लकीङ फेरि जीवाम मासोले डेच होखुरीकुङ कुरा लेया। होखुरीकै होसकोकी गीना, 28“गुरु ज्यु, मोशै कानकी रीक्ङ याछ व्यवस्था लेखा, कुसेर भर्मीयो ब्याहा जाट्च डाजे मीजाको माछान्न न सीया डेनाङ, भाइ चहिँये होच्यो मास्टोकी ब्याहा जाटार डाजेओ लागि सन्तान खास्न याखी पर्ले।#व्यवस्था २५:५-६ 29काट समयाङ सात जना डाजेभाइको लेया, जेठा डाजे चहिँ ब्याहा जाटा तर मीजा माछान्न सीया। 30होटबाटै माहिलै भौज्युखाटा ब्याहा जाटा तर होसे र मीजाको माछान्न न सीया। 31होटै न्हुइङ साहिँलै र भौज्युखाटा ब्याहा जाटा। होटजाट्न न होसे सातै जनै न भौज्युखाटा ब्याहा जाटा, तर होखुरीक र मीजाको माछान्न न सीया। 32होटै न्हुइङ होसे मास्टो र सीया। 33होटबाटै सीच लकीङ जीवाम सोनाङ होसे मास्टो होखुरीक सात जना मध्याङ सुओ मास्टो छान्ने? हीजैडेनाङ होसे सातै जनौ मास्टो छान्नन्या।”
34येशूये होखुरीककी डेया, “इसे संसाराङ मट्टै भर्मीकै ब्याहा जाट्ले र ब्याहा जाट्न याल्हे। 35तर सीच लकीङ जीवाम स्वर्गाङ नुङ्कीयो लागि योग्य छान्च भर्मीकै चहिँ ब्याहा जाट्च कुरा न माछान्ने। 36होखुरीक फेरि मासीले, हीजैडेनाङ होखुरीक स्वर्गदूत ल्याक्च न छान्ने र होखुरीक पुनरुत्थानौ सन्तान छान्चबाटै परमेश्वरौ सन्तान छान्ने। 37होटबाटै सीचको जीवाम सोले डेच कुरा मोशै र म्हे ढाम ङुच पोथ्रौ घटनाङ परमप्रभुकी अब्राहामौ परमेश्वर, इसहाकौ परमेश्वर र याकूबौ परमेश्वर डेयार पुकारीमे।#प्रस्थान ३:१-६ 38होसको सीचकुङ परमेश्वर होइन, तर जीवाचकुङ परमेश्वर हो, हीजैडेनाङ होसकुङ म्याहासाङ पट्ट न जिउँदै ले।” 39होटै धर्मगुरुको मध्याङ सु-सुये डेया, “गुरु ज्यु, नाकै ठिक न डेया।” 40होटै होसकोकी फेरि सुयेर हीर गीन्की आँट माजाटा।
मुक्ति याछ ख्रीष्ट सुओ मीजा हो डेम गीन्च
(मत्ती २२:४१-४६; मर्कूस १२:३५-३७)
41येशूये होखुरीककी डेया, “मुक्ति याछ ख्रीष्ट दाऊदौ मीजा हो डेम होखुरीकै कुटजाट्न डेले? 42-43हीजैडेनाङ दाऊदै रीक्च भजनाङ मेखोल्है न डेमने,
‘परमप्रभुये ङौ प्रभुकी डेया,
ङै नाकुङ शत्रुकोलाक नाकुङ मीखुट्या म्होकी मापार्ठर नाको ङौ डोरमीहुट पट्टी ङुनी।’ #
भजनसंग्रह ११०:१
44 “इटजाट्न दाऊद मेखोल्है न ख्रीष्टकी प्रभु डेमने डेनाङ, कुटजाट्न होसको दाऊदौ मीजा छान्ने?”
धर्मगुरुकोखाटा होशियार छान्नी
(मत्ती २३:१-३६; मर्कूस १२:३८-४०)
45पट्ट भर्मीकै सेमन लेनाङ येशूये लहो चेलाकोलाक डेया, 46“धर्मगुरुको लकीङ होशियार छानार ङुनी। होखुरीक अरुकी टान्हाक्कीयो लागि लो-लोट्च बढीन बील्हार इलाक-आलाक ह्वाले। बजाराङ लाहाकी भर्मीकै मान अट जाटै डेम पाम ह्वाले र सभा ङुच इमाङ भोज ज्याच ठावाङ बा-बाड्सो भर्मीको ङुच ठावाङ ङुकी मीमन जाट्ले। 47होखुरीकै विधवाकुङ इम ह्या पट्ट न ठोक स्याट्ले र टान्हाक्कीयो लागि लो-लोट्च प्रार्थना जाट्ले। होटबाटै होखुरीकै न वास्टै दण्ड र डीन्ल्हे।”
المحددات الحالية:
लूका 20: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
