लूका 22
22
यहूदासै येशूकी घोवाक्च
(मत्ती २६:१-५,१४-१६; मर्कूस १४:१-२,१०-११; यूहन्ना ११:४५-५३)
1अखमिरी रोटोओ चाड खेरेप राम्हन्या। इसकी छुटकारौ चाड र डेले। 2येशूकी कुटजाट्न साटीङ डेम मुख्य पूजाहारीको र धर्मगुरुकै मौका पामन लेया। तर भर्मीकोखाटा होखुरीक बीह्रीम्या।
3होडीक बेला न बाह्र जना चेलाको मध्याङ यहूदास इस्करियोत डेचौ मीमन भित्री शैतान पर्या। 4होसे मुख्य पूजाहारी र कप्तानको लेठाङ नुङार येशूकी कुटजाट्न घोवाक्ङ याखी ह्योक्ले डेयार सल्लाह जाटा। 5इसे सेयार होखुरीक माह्राङार होसकी पैसा याल्हे डेया। 6यहूदास इस्करियोत मन्डीया र भर्मीकै थाहा माढीन्न येशूकी घोवाक्ङ याखी मौका पाकी ठाला।
येशूये चेलाकोखाटा ज्याच अन्तिम भोज
(मत्ती २६:१७-३०; मर्कूस १४:१२-२६; यूहन्ना १३:२१-३०; १ कोरिन्थी ११:२३-२५)
7अखमिरी रोटो ज्याच चाड राहा। होसे छुटकारौ चाडाङ थुमा बलि याखी पर्न्या। 8येशूये पत्रुस र यूहन्नाकी इट डेयार बीर्न्हका, “नुङार काल्हौ लागि छुटकारौ चाडौ भोज तयार जाट्नी।” 9होखुरीकै होसकोकी गीना, “कानै इसे भोज कुला तयार जाट्की?” 10होसकै डेया, “नाखुरीक सहराङ टान्हाङ कुडाङ डी बुवार ह्वाचै जाट्च काट भर्मी डुप्ले र नाखुरीक होच्यो न्हुङ-न्हुङ नुङ्नी, होसे कुसे इमाङ पर्ले। 11होसे इमौ मीमुरुङ्की डेनी, ‘कानुङ गुरुये नाकोकी डेमकामने, ङै लहो चेलाकोखाटा ङुवार छुटकारौ चाडौ भोज ज्याच पाहुना कोठा कुला ले?’ 12नाखुरीककी होचे ढेम्च तलाङ सिङ्गारीच बाड्को कोठा टान्हाक्ले। होला न तयार जाट्नी।” 13होखुरीक नुङार होसकै डेच लेखा न डुपा, होटै होखुरीकै छुटकारौ चाडौ भोज होला न तयार जाटा।
14भेला छान्रखीङ येशू प्रेरितकोखाटा भोज ज्याकी ङुवा। 15होसकै होखुरीककी डेया, “दु:ख भोग्डीकी डेनाङ अघि ङै नाखुरीकखाटा ङुवार छुटकारौ चाडौ इसे भोज ज्याकी बाड्को मीमन जाट्न्या। 16हीजैडेनाङ ङा नाखुरीककी डेले, परमेश्वरौ राज्य पूरा माछान्ठर ङा फेरि इसे भोज माज्याले।” 17होटै न्हुइङ येशूये कचौरा ला र परमेश्वरकी धन्यवाद याछै डेया, “इसे लानी र नाखुरीक पट्टकै पुङार ज्यानी। 18हीजैडेनाङ ङा नाखुरीककी डेले, परमेश्वरौ राज्य माह्राठर अब ङा अङ्गुरौ मीडी सेन र मागाले।” 19होटै होसकै रोटो लाम धन्यवाद याम्ह भ्याच न्हुइङ ग्याकार होखुरीककी इट डेचै याहा, “नाखुरीकुङ लागि याछ इसे ङौ शरीर हो। ङौ सम्झनाङ जाट्च जाट्नी।” 20होटै ज्याम भ्याच न्हुइङ होसकै कचौरा लार डेया, “इसे कचौरा नाखुरीकुङ लागि जोकाक्च ङौ ह्युवाङ छ्याक्च नयाँ करार हो।
21 “तर ङाकी घोवाक्च भर्मी ङाखाटा न ज्याकी ङुमने। 22हीजैडेनाङ भर्मीयो मीजा च निश्चित जाट्च अनुसार नुङ्की न पर्ले। तर धिक्कार ले होसे भर्मीकी, सुये भर्मीयो मीजाकी घोवाक्ङ याल्हे।” 23होटै इसे कुरा सेयार होखुरीकै, “याङ्च काम जाट्च सु आले डेम मेखुरीक-मेखुरीक गीन्की ठाला।”
बाड्को सु हो डेम चेलाकुङ छलफल
(मत्ती २०:२५-२८; १९:२८; मर्कूस १०:४२-४५)
24होटै न्हुइङ होखुरीक मध्याङ पट्ट डेनाङ बाड्को सु हो डेम चेलाकुङ मीघ्याङ छलफल छान्की ठाला। 25येशूये होखुरीककी डेया, “संसारुङ राजाकै चहिँ लहो प्रजामीटाक राज्य जाट्ले र अधिकार क्योट्चकै लाहाकी उपकारी डेकी लैडीले। 26तर नाखुरीक चहिँ होङ्च छान्की माछान्ने। नाखुरीक मध्याङ सु बाड्को ले, होसे मार्जा अट छानै। होटै अगुवा छान्चकै चहिँ सेवा अट जाटै। 27हीजैडेनाङ बाड्को सु हो? ज्याकी ङुचकी ज्याकी याछ? ही ज्याकी ङुच होइन र? तर ङोस्नी, ङा च नाखुरीकुङ मीघ्याङ काट जना सेवा जाट्च ल्याक्च न ले।
28 “नाखुरीक चहिँ ङौ पट्ट न परीक्षाङ ङाकी साथ याछको छान्नी। 29कुटजाट्न ङौ बोये ङाकी काट राज्य याम्हने, ङा र नाखुरीककी याल्हे। 30ङौ राज्याङ नाखुरीक ङाखाटा काठोवाङ न ङुवार ज्याले र गाले। होटै सिंहासनाङ ङुवार इस्राएलुङ बाह्र कुलौ न्याय जाट्ले।”
येशूये पत्रुसकी सम्झडीच
(मत्ती २६:३१-३५; मर्कूस १४:२७-३१; यूहन्ना १३:३६-३८)
31होटै न्हुइङ येशूये डेया, “सिमोन, ए सिमोन ङोस्नी, शैतानै नाकोकी गहुँकी लेखा न टाप्की अनुमति ङेम्हने। 32तर नाकुङ विश्वास माम्हाट्ख्यो डेयार ङै नाकुङ लागि प्रार्थना जाट्न याम्हे। फेरि विश्वासाङ बलियो छानार नाकै लहो डाजेभाइकोलाक र बलियो खास्नी।” 33पत्रुसै होसकोकी डेया, “प्रभु, ङा नाकोखाटा झ्यालखानाङ नुङ्की अनि सीकी समेत तयार ले।” 34तर होसकै डेया, “पत्रुस, ङा नाकोकी डेले, नाकै छीनी नाबीक भाल्या राक्की डेनाङ अगाडि सोम खेप माचीन्डीले डेम ङाकी इन्कार जाट्ले होटै भाल्या राक्ले।”
येशूये चेलाकोलाक तयार छान्की डेच
35येशूये होखुरीककी डेया, “ङै नाखुरीककी पैसा, जुत्ता र नाम्जा बिना न बीर्न्हकामन्या, ही नाखुरीककी हीर कुरौ खाँचो छाना र?” होखुरीकै डेया, “माछाना।”
36होसकै डेया, “अब चहिँ नाम्जा लेचकै नाम्जा बुख्यो। पैसा लेचकै पैसा बुख्यो र सुखाटा तरवार माले, होचे लहो बढीन आर्लाम र काट तरवार अट लोए। 37ङा नाखुरीककी डेले, ‘होसकोकी अपराधीकोखाटा न हीला’ डेयार रीक्च कुरा ङौ जीवनाङ ओल्खी न पर्ले। हो ङौ बारेयाङ रीक्च कुरा ओल्न्ह न ले।”#यशैया ५३:१२ 38चेलाकै डेया, “ङोस्नी ट प्रभु, इला नीस तरवार ले।” येशूये डेया, “इडीक लेनाङ ओल्हे।”
जैतुन डाँडाङ येशूओ प्रार्थना
(मत्ती २६:३६-४६; मर्कूस १४:३२-४२)
39येशू सधैँ लेखा न जैतून डाँडाङ नुङा। चेलाको र होसकोखाटा न नुङा। 40होला टाह्रखीङ होसकै चेलाकोलाक डेया, “नाखुरीक परीक्षाङ पर्की मापर्ख्यो डेयार प्रार्थना जाट्नी।” 41होटै न्हुइङ येशू होखुरीक लेठीङ चेक पारी नुङार घुँडा टुसार प्रार्थना जाटा। 42“ए बोइ, नाकुङ इच्छा लेनाङ इसे दु:खौ कचौरा ङा लेठीङ हटडीम यान्ही। तर ङौ इच्छाङ होइन, नाकुङ न इच्छा पूरा अट छानै।” 43होटै स्वर्गीङ काट स्वर्गदूत राहार होसकोकी बल याहा। 44होसकुङ मीमन साह्रै कष्टआङ पर्नन्या। होसकै जोडखाटा बिन्ती जाट्चै प्रार्थना जाटा। होसकुङ नाम्चास ह्युओ थोपा लेखा न छानार झाङ जुर्न्ह न लेया। 45होटै येशू प्रार्थना जाट्न भ्यार चेलाको लेठाङ ल्हेसार रान्हाङ होखुरीक सुर्तै जाट्नाङ म्हुङार मीमीक झुकार लठ्ठै छान्न ङुच डुपा। 46होसकै होखुरीककी डेया, “नाखुरीक हीजै मीस्न ङुच? सोनी, राछ परीक्षाङ मापर्ख्यो डेयार प्रार्थना जाट्नी।”
येशूकी घोच
(मत्ती २६:४७-५६; मर्कूस १४:४३-५०; यूहन्ना १८:३-११)
47येशूये इसे कुरा ङाक्नाङ-ङाक्नाङ न भर्मीकुङ हुद्दा होला टाह्रा। बाह्र जना चेलाको मध्याङ काट जना यहूदास डेच चहिँ होसे भर्मीकुङ अगुवा छानार येशूकी चुम्खी डेम होसकुङ खेरेप राहा। 48तर येशूये होसकी डेया, “यहूदास, ही नाको भर्मीयो मीजाकी चुम्हार धोका याखी पाच?” 49याङ्च डाङार येशूखाटा लेच चेलाकै डेया, “प्रभु, कान तरवार क्योटीङ?” 50होखुरीक मध्याङ काट जना चेलै चहिँ मुख्य पूजाहारीयो नोकरकी तरवारै ङापा, र होच्यो डोर मेनेकेप न च्वाट्टै चेम याहा। 51तर येशूये होखुरीककी डेया, “छाना, डास्न यान्ही।” होटै होसे भर्मीयो मेनेकेप छुवार होसकै गेपाक्ङ याहा।
52येशूकी घोकी राछ मुख्य पूजाहारीको, परमेश्वरौ मन्दिरुङ कप्तानको, र अगुवाकोलाक होसकै डेया, “ही नाखुरीक डाकाकी घोकी रान्हाङ लेखा तरवार र डाङ्गा लार राछ? 53ङा परमेश्वरौ मन्दिराङ दिनहुँ नाखुरीकखाटा लेया। होडीक बेला च नाखुरीकै ङाकी माघोवा। तर अब छुम्छौ शक्तिये शासन जाट्नाङ नाखुरीकुङ काम जाट्च समय हो।”
पत्रुसै येशूकी इन्कार जाट्च
(मत्ती २६:५७-५८,६९-७५; मर्कूस १४:५३-५४,६६-७२; यूहन्ना १८:१२-१८,२५-२७)
54होसे भर्मीकै येशूकी घोवार होसकोकी प्रधान पूजाहारीयो इमाङ आल्हा। पत्रुस चहिँ चेक पारी पारीङ होसकुङ न्हुङ-न्हुङ नुङा। 55होला आर्भाङ म्हे ढाकार गुप्चै भर्मीको भेला छानार ङुम-ङुमन्या। पत्रुस र राहार होखुरीकखाटा न ङुवा। 56काट नोकरनीये म्हेओ ट्याङ्ठाङ पत्रुसकी ङुम-ङुच डाङार सेम्हजा ङोस्चै डेया, “इसे भर्मी र येशूखाटा न लेया।” 57तर पत्रुसै इट डेयार इन्कार जाटा, “ए बहिनी, ङा होसकोकी माचीन्डीले।”
58फेरि काटछीनाङ अर्कोये होसकी डाङार डेया, “नाको र होखुरीकुङ लाफा न हो।” पत्रुसै डेया, “हजुर, ङा च होइन!”
59होटै काट घन्टाटर छान्नाङ अर्को काट जनै जोड याहार डेया, “इसे भर्मी र येशूखाटा न लेया, हीजैडेनाङ इसे र गालीलुङ न हो।” 60तर पत्रुसै डेया, “हजुर, नाकै ही डेमन ले, ङा च हीर माह्वार्ले।” होटै पत्रुस ङाक्नाङ-ङाक्नाङ न भाल्यै राका। 61होटै प्रभुये ल्हेसार पत्रुसकी ङोसा, “छीनी भाल्यै राक्की डेनाङ अघि नाकै ङाकी सोम खेप माचीन्डीले डेले” डेम प्रभुये डेच कुरा पत्रुसै आर्मीटा। 62होटै होसे बाहिर ख्योहार धुरु-धुरु रापा।
येशू महासभौ म्यहासाङ
(मत्ती २६:५९-६८; मर्कूस १४:५५-६५; यूहन्ना १८:१९-२४)
63येशूकी घोच भर्मीकै होसकोकी गिल्ला जाटा र डुङा। 64होसकुङ मीमीक हुप्म याहार गीना, “नाङ्की डुङ्च भर्मी सु हो? लु, अगमवाणी जाटो!” 65होखुरीकै होसकुङ बेइज्जत जाट्चै येशूओ बारेयाङ मासेछ कुराको ङाका।
66ट्याङ्छ बित्तिकै अगुवाको, मुख्य पूजाहारीको र धर्मगुरुको जम्मा छाना। होटै होखुरीकै येशूकी महासभाङ आल्हार डेया, 67“कानकी डेउ, नाङ न मुक्ति याछ ख्रीष्ट हो?” होसकै होखुरीककी डेया, “ङै डेनाङ र नाखुरीकै मापट्डीले। 68ङै गीना डेनाङ र नाखुरीकै जवाफ माह्याले। 69तर अब भर्मीयो मीजा परमेश्वरौ शक्तियो डोर पट्टी ङुले।” 70होखुरीक पट्टकै गीना, “होटडेनाङ ही नाङ परमेश्वरौ मीजा हो ट?” होसकै जवाफ याहा, “नाखुरीक न डेमन ले, ङा होसे न हो।” 71होटै होखुरीकै डेया, “अब कानकी अरु साक्षी चहडीस्ले र? हीजैडेनाङ कानै इच्यौ मेङ्गेरीङ न सेकी क्योटा।”
المحددات الحالية:
लूका 22: EMGP
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
