लूका 17
17
पाप र माफ
(मत्ती १८:६-७,२१-२२; मर्कूस ९:४२)
1येशूये लहो चेलाकोलाक डेया, “भर्मीकी पाप जाट्की लैडीच परीक्षाको च पक्का न राल्हे। अरुकी पापाङ फसडीच होसे भर्मीकी धिक्कार ले। 2जुन भर्मीये इसे मार्जा नानीको मध्याङ काटकी पाप जाट्की लैडीले डेनाङ, होच्यो मीघाटीयाङ झाँटौ काट पाटा च्योलोकार समुद्राङ लोम्ह याखी सेम्ह छान्ने। 3होटबाटै लहो बारेयाङ होशियार छान्नी! इडीक नाकुङ भाये पाप जाटा डेनाङ होसकी च्याक्नी, इडीक होचे पश्चात्ताप जाटा डेनाङ होसकी क्षमा यान्ही।
4 “इडीक नाकुङ भाये कायाकाङ सात खेप नाकुङ विरुद्धाङ पाप जाटा, होटै सातै खेप होचे नाको लेठाङ राहार ङा पश्चात्ताप जाट्ले डेया डेनाङ होसकी नाकै क्षमा यान्ही।”
5प्रेरितकै येशूकी डेया, “प्रभु, कानुङ विश्वास बड्डीम यान्ही!” 6होटै प्रभुये डेया, “नाखुरीकखाटा राइगानौ काट दाना खालो मट्टै विश्वास लेनाङ नाखुरीकै इसे किम्बुओ म्यार्टुङ्की, ‘हुटार नाङ समुद्राङ छहो’ डेया डेनाङ होचे मन्डीले।
नोकरै जाट्की पर्च काम
7 “नाखुरीक मध्याङ सुओर नोकर ह्या घोयार की भेडा आर्छार काम लकीङ रान्हाङ, होचे नोकरकी ‘छिटो राहार ज्याकी ङुनी’ डेले र? 8बरु होचे होसकी इट माडेले र? ‘ङौ लागि ज्याट-गान तयार खास्नी। होटै पटुका छ्याकार ङै ज्याम-गाम माभ्याठर लेन्नी। होटै न्हुइङ मट्टै नाको ज्यानी।’ 9लहे अह्रडीच अनुसार काम जाट्च बाटै होचे नोकरकी स्याबासी याल्हे र? 10होटजाट्न न नाखुरीककी अह्रडीच पट्ट काम जाट्न भ्यारखीङ नाखुरीकै र डेनी, ‘कान काम मालग्डीस्च नोकर मट्टै हो, कानै च लहे जाट्की पर्च काम मट्टै पूरा जाट्नने’।”
दश जना कुष्ठरोगीको
11जब येशू यरूशलेम नुङ्नाङ सामरिया र गालीलौ सिमाना छानार नुङा। 12होसको काट लाङ्घाङ पर्या। होटै होला दश जना कुष्ठरोगीकोलाक डुपा। होटै चेक पारी टोङ्हा र होखुरीकै 13बाड्को स्वरै डेया, “ए प्रभु येशू, कानकी दया जाट्नी।” 14होटै होसकै होखुरीककी डाङार डेया, “नाखुरीक पूजाहारी लेठाङ नुङार लाहाकी टान्हाक्नी।” होटै होखुरीक नुङ्नाङ-नुङ्नाङ न गेप्की क्योटा। 15होटै काट जना चहिँ लाहा गेप्च डाङा, र बाड्को स्वरै परमेश्वरौ जय-जयकार जाट्चै होसे ल्हेसार राहा। 16होटै येशूकी धन्यवाद याहार होसे येशूओ मीकुवाङ खुखुप छाना। होसे चहिँ सामरी भर्मी लेया। 17होटै येशूये डेया, “ही गेप्चको दश जना होइन र? अरु नौ जना चहिँ कुला ले? 18इसे सामरी बाहेक ल्हेस्न राहार परमेश्वरकी जय-जयकार जाट्च अरु सुर माछाना?” 19होटै येशूये होसकी डेया, “सोनी, नाकुङ विश्वासै नाको गेप्नने, अब नुङ्नी।”
परमेश्वरौ राज्य
(मत्ती २४:२३-२८,३७-४१)
20फरिसीकै परमेश्वरौ राज्य सेन राल्हे डेम येशूकी गीना। येशूये होखुरीककी डेया, “परमेश्वरौ राज्य च डाङ्च जाट्न माह्राले। 21सुयेर परमेश्वरौ राज्यकी ‘इला ले होला ले’ डेकी माह्योक्ले हीजैडेनाङ सेनी! परमेश्वरौ राज्य नाखुरीक मीघ्याङ न ले।”
22होसकै चेलाकोलाक डेया, “होसे दिन र राल्हे, नाखुरीक भर्मीयो मीजाकी ङोस्की साप्फी मीमन च जाट्ले, तर नाखुरीकै डाङ्की माढीन्ले। 23होटै भर्मीकै नाखुरीककी डेले, ‘ङोस्नी, होला ले’ ‘इला ले’ तर होखुरीकै डेच मापट्डीनी र न्हुङ-न्हुङ र मालग्डीस्नी। 24हीजैडेनाङ कुटजाट्न पीझ्यानाङ सर्घा काट छेउ लकीङ अर्को छेउसम्म ट्याङ्छ छान्ने। होटजाट्न न भर्मीयो मीजा र लहो दिनाङ होङ्च न छान्ने। 25तर पहिले होचे वास्टै दु:ख सहडीकी पर्ले होटै इसे पुस्तुङ भर्मीकै होसकी इन्कार जाट्ले। 26होटै नोऔ पालाङ कुङ्च छानन्या, भर्मीयो मीजौ दिनाङ र होङ्च न छान्ने। 27नोआ जहाज भित्री पर्चै जाट्नाङ र भर्मीको ज्याचै-गाचै र ब्याहाबारी जाट्न न लेया। होडीक न बेला पृथ्वीयाङ जलप्रलय छानार पट्ट न ठोक नाश छाना। 28लोतौ समयाङ छान्नाङ लेखा न भर्मीयो मीजौ दिनाङ र होङ्च न छान्ने। भर्मीको ज्याम-गाम न लेया। चीज-बीचको लोम आर्लाम न लेया। बाली नाली लैडीचै इमको र खास्न न लेया। 29तर कुसनीक लोत सदोमीङ ख्योहा, होसनीक न सर्घीङ म्हे र गन्धक झालार पट्टकी नाश जाटा। 30ङा भर्मीयो मीजा राछ नीक र होङ्च न छान्ने।
31 “होस बेला सु इमौ कौसीयाङ छान्ने, होच्यो मालमत्ताको इम भित्री ले डेनाङ र होसे लाकी मानुङ्ख्यो। होटजाट्न न ह्याङ काम जाट्न ङुचको इमाङ ल्हेस्न मानुङ्ख्यो। 32लोतौ मास्टोकी छान्च कुरा आर्मीट्नी! 33सुये लहो जीवन जीवाटाक्की पाले, होचे म्हाटाक्ले। तर लहो जीवन म्हाटाक्चये चहिँ जीवन डीन्ल्हे। 34ङा नाखुरीककी डेले, होसे नाबीक काट ठावाङ न मीस्च नीस जना मध्याङ काट जनाकी आल्हे र अर्कोकी चहिँ डास्ले। 35काट ठावाङ झाँटा नुक्चै जाट्च नीस जना मास्टोवाङ काटकी आल्हे र अर्कोकी चहिँ डास्ले। 36[होटजाट्न न नीस जना भर्मी ह्याङ छान्ने। होटै काटकी आल्हे अर्कोकी चहिँ डास्ले।”]#१७:३६ कोइ कोइ संस्करनौ बाइबलाङ इसे पद माले।
37होटै चेलाकै येशूकी गीना, “कुला प्रभु?” होसकै होखुरीककी डेया, “कुला सिनु ले होला न गिद्धको छान्ने।”
المحددات الحالية:
लूका 17: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
