लूका 16
16
चलाख नाइक्या
1येशूये लहो चेलाकोलाक डेया, “काट धनी भर्मीयो काट जना नाइक्या लेया। होचे लहो मालिकौ धन-सम्पत्ति भुरुक्ङ न ले डेम होसकी कुरा लैडीच बाटै, 2धनी भर्मीये नाइक्याकी आर्घार डेया, ‘ङै नाकुङ बारेयाङ इसे ही सेमन ले? नाकुङ पट्ट न हिसाब किताब ङाकी यान्ही। अब लकीङ आलाक नाको नाइक्या छान्की माह्योक्ले’ 3होटै नाइकेइ लहो मीमनाङ डेया, ‘अब ङा ही जाट्की? हीजैडेनाङ मालिकै ङौ काम स्याट्की पामने। ह्या कोहार ज्याकी र माह्योक्ले, ङेम्ह ज्याकी र काराम सेले। 4होटबाटै कामीङ छ्युक्च न्हुइङ भर्मीकै ङाकी होखुरीकुङ इमाङ कुटजाट्न मन्डीच खास्की पर्ले डेम ङै वार्न्ह भ्यामे।’ 5होटै न्हुइङ होचे मालिकौ ऋण लाचकोलाक काट-काट जनाकी आर्घा। होचे पहिला राछकी गीना, ‘नाकोकी ङौ मालिकौ ऋण कुडीक ले?’ 6होचे डेया, ‘सोम हजार लिटर सीडी’ होटै व्यवस्थापकै होसकी डेया, ‘नाकुङ तमसुक राक्नी। छिटो जाटार होला पन्ध्र सय लिटर रीक्नी।’ 7होटै अर्कोकी गीना, ‘नाकुङ ऋण कुडीक ले?’ होचे डेया, ‘सोम सय पचास क्विन्टल गहुँ।’ होचे होसकी डेया, ‘नाकुङ तमसुकाङ सोम सय क्विन्टल रीक्नी।’”
8 “इसे थाहा डीन्छ न्हुइङ होसे मालिकै बेइमान नाइक्यौ चलाखीयौ तारिफ जाटा। हीजैडेनाङ परमेश्वरकी विश्वास माजाट्चको अरु भर्मीकोखाटा चलाख छानार व्यवहार जाट्ले। तर पनि परमेश्वरकी विश्वास जाट्चको होखुरीक ल्याक्च चलाख माछान्ने। 9ङा नाखुरीककी डेले, लहो लागि संसारुङ धनै लाफाको खास्नी। जब होसे धन र कायाक भ्याले। होटै होखुरीकै नाखुरीककी स्वर्गाङ मान जाट्ले।”
थोरै कुराङ र भर पर्च छान्की पर्ले
(मत्ती ६:१४)
10येशूये चेलाकोलाक डेया, “मार्जा कुराङ इमानदार छान्च भर्मी बाड्को कुराङ र इमानदार छान्ने। होटै माजा कुराङ बेइमानी छान्च भर्मी वास्टै कुराङ र बेइमानी छान्ने, 11इटजाट्न नाखुरीक इसे संसारुङ धनाङ इमानदार माछाना डेनाङ, नाखुरीककी सत्यौ धनौ जिम्मा सुये याल्हे? 12इडीक नाखुरीक अरुकुङ धनाङ इमानदार माछाना डेनाङ, नाखुरीकै डुप्की पर्च धन सुयेर याल्हे र?
13 “सुयेर नीस मालिकौ सेवा जाट्की माह्योक्ले। नभा च होचे काटकी जाक्ले र अर्कोकी माजाक्ले। कि त होचे काटौ चहिँ इमानदार छानार सेवा जाट्ले र अर्कोकी चहिँ हेला जाट्ले। होटबाटै नाखुरीकै र परमेश्वर र धन नीसौ न सेवा जाट्की माह्योक्ले।”
येशूये डेच अरु कुराको
(मत्ती ११:१२-१३; ५:१८,३२)
14होटै इसे पट्ट कुरा सेरखीङ फरिसीकै येशूओ गिल्ला जाटा। हीजैडेनाङ होखुरीकै पैसाकी साप्फी माया जाट्नन्या। 15होटै येशूये होखुरीककी इट डेया, “नाखुरीक भर्मीकुङ म्याहासाङ लाहाकी धर्मी खास्की च पाले, तर परमेश्वरै नाखुरीकुङ मीमनकी वार्ल्हे। हीजैडेनाङ भर्मीकै ही की बाड्को खास्नने, परमेश्वरौ म्याहासाङ होसे झीर्न सेच छान्ने।
16 “बप्तिस्मा याछ यूहन्नौ बेलासम्म मोशौ व्यवस्था र अगमवक्ताकुङ शिक्षाङ भर्मीको ह्वामन्या। होटै होसे बेला लकीङ इलाक चहिँ नाखुरीककी परमेश्वरौ राज्यौ सेछ समाचार सेटाक्ङने। होटै पट्टको होला पर्की डेम जोड जाट्न न ले। 17होटै सर्घा र पृथ्वी म्हाटार नुङ्की ह्योक्ले, तर व्यवस्थाङ लेच काट कुरा र माम्हाट्ले। 18सुये लहो मास्टोकी डासार अर्कोकी ब्याहा जाट्ले, होचे व्यभिचार जाट्ले, र लेन्जै डास्च मास्टोकी ब्याहा जाट्च भर्मीये र व्यभिचार जाट्ले।”
धनी भर्मी र लाजरस
19होटै येशूये फेरि डेया, “काट धनी भर्मी लेया। होसे मेल्हाकी सधैँ महङ्गो पर्च बैजनी रङुङ नरम लाइलनौ बढीन बील्छै दिन-दिनै मोजमज्जा जाटार ङुमन्या। 20तर होच्यो गालामटुआङ लाजरस म्यार्मीनुङ काट गरीब भर्मीकी राकार डाम याम्हन्या। होच्यो शरीरभरि म्हा न म्हा लेया। 21होटै होसे धनी भर्मीये ज्यानाङ टेबुल लकीङ झाल्च जुठाको ज्याकी डुप्ले की डेम होसे ङोस्चै ङुमन्या। होटै चीउको राहार होच्यो म्हाकी ल्हाक्ङन्या।”
22 होटै होसे गरीब भर्मी सीया र स्वर्गदूतकै होसकी आल्हार अब्राहाम छीनी डाम याहा। होटै होसे धनी भर्मी र सीया अनि ठाका। 23होटै नरकाङ नुङार बाड्को कष्ट भोग्डीकी पर्या। होचे ढेम्लाक ङोसा र अब्राहामौ छेवाङ लाजरसकी डाङा। 24होटै होचे बाड्को स्वरै डेया, ए बोइ अब्राहाम, ङाकी दया जाटार लाजरसकी बीर्न्हकाम यान्ही। होचे मेन औंलौ मीडुम डीयाङ ठाकार ङौ मेलेटकी शितल खास्न अट येहे। हीजैडेनाङ ङा इसे म्हेआङ छट्पडीस्न ङुमने। 25तर अब्राहामै डेया, “ङौ मीजा, आर्मीटो ट, नीये लहो जीवनाङ पट्ट न सुखौ कुराको भोग्डीम भ्या। तर लाजरसै चहिँ दु:खै दु:ख भोग्डीया। होसकी अब इला आराम ले। र नाङ चहिँ कष्टआङ ले। 26इडीक मट्टै होइन, इटै सुर नाङ खेरेप नुङ्की पानाङ र अट माह्योकै र होटै इला राखी पानाङ र अट माह्योकै डेम नुओ र कानुङ मीघ्याङ लुप्च धाँदो ले। 27होटै होचे डेया, ‘होटडेनाङ बोइ, नाकोकी ङा बिन्ती जाट्ले, लाजरसकी ङौ बोयो इमाङ बीर्न्हकाम यान्ही। 28हीजैडेनाङ ङौ बाङा जना डाजेभाइको ले। होचे नुङार होखुरीककी चेतावनी अट येहे, नभा च होखुरीक र इसे नरकाङ आरहे।’ 29तर अब्राहामै डेया, ‘होखुरीकखाटा मोशा र अगमवक्ताकुङ किताब ले होसे न अट सेए’ 30होटै होचे डेया, ‘होइन, बोइ अब्राहाम, सीच भर्मीको लकीङ काट जना जीवार होखुरीक लेठाङ नुङा डेनाङ च होखुरीकै पश्चात्ताप जाट्च लेया।’ 31तर अब्राहामै होसकी डेया, ‘मोशा र अगमवक्ताकुङ कुरा होखुरीकै मासेले डेनाङ, सीचको लकीङ सुर जीवार नुङ्नाङ र होखुरीकै विश्वास माजाट्ले’।”
المحددات الحالية:
लूका 16: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
