लूका 18
18
विधवा र न्यायाधीश
1होटै न्हुइङ येशूये चेलाकोलाक सधैँ न प्रार्थना जाट्की पर्ले र निराश छान्की माछान्ने डेयार बुझडीकी होसकै होखुरीककी काट उखान डेया, 2“काट सहराङ काट जना न्यायाधीश लेया। होसे परमेश्वरखाटा र माबीह्रीम्या, भर्मीकोलाक र होचे वास्ता माजाट्नन्या। 3अनि होसे न सहराङ काट जना विधवा र लेया। होसे घरी-घरी न्यायाधीश लेठाङ नुङार डेमन्या, ‘ङौ झगडीया र ङौ मीघ्याङ न्याय जाट्न यान्ही।’ 4कालाप दिनसम्म च होचे विधवौ कुरा न मासेया। तर न्हुइङ होचे लहो मीमनाङ डेया, ‘लेकीयो लागि च ङा परमेश्वरखाटा र माबीह्रीले, भर्मीकोलाक र वास्ता माजाट्ले। 5तर इसे विधवै ङाकी साह्रै न दु:ख याछबाटै ङै इच्यौ न्याय जाट्न याखी पर्ले। नभा च इचे एकोहोरो राहार ङाकी कच-कच जाटार काबु पार्ले’।”
6होटै प्रभुये डेया, “सेनी, होसे मासेछ अधर्मी न्यायाधीशै ही डेमे? 7होटजाट्न न परमेश्वरै मेखोल्हाकी नाबीक नाम्सीन पुकारीच, लहे भाक्च भर्मीकोलाक अन्याय लकीङ माजोगडीले र? ही होसकै होखुरीककी सहायता जाट्की ढिलो जाट्ले र? 8ङा नाखुरीककी डेले, होसकै छिटो न होखुरीककी न्याय जाट्न याल्हे। तर भर्मीयो मीजा रान्हाङ ही होचे पृथ्वीयाङ विश्वास डुप्ले र?”
प्रार्थना जाट्च नीस जना भर्मी
9येशूये लाहाकी मट्टै भरोसा जाट्चको र लाहाकी मट्टै धर्मी आर्मीटार अरुकी हेला जाट्चकोलाक काट उखान डेया, 10“फरिसी र कर सोट्च नीस जना भर्मी परमेश्वरौ मन्दिराङ प्रार्थना जाट्की नुङा। 11फरिसीये टोङ्हार मीमन-मीमनाङ इटजाट्न प्रार्थना जाटा, ‘ए परमेश्वर, ङा नाकोकी धन्यवाद याल्हे। हीजैडेनाङ ङा अरु भर्मी ल्याक्च लोभी र धुताहा माले। ङै व्यभिचार र माजाट्नने। ङा इसे कर सोट्च भर्मी ल्याक्च र माले। 12ङा हप्ताङ नीस खेप उपवास ङुले र ङै कमडीच पट्ट न ठोकौ दशांश र याल्हे।’ 13तर कर सोट्च भर्मी चहिँ लोस न टोङ्हार स्वर्गलाक ङोस्की आँट माजाट्न लहो छातीयाङ हीर्कडीचै डेया, ‘हे परमेश्वर, ङा ल्याक्च पापी मीटाक कृपा जाट्न यान्ही!’” 14होटै येशूये डेया, “ङा नाखुरीककी डेले, होसे फरिसी डेनाङ बरु कर सोट्च भर्मी चहिँ परमेश्वरौ म्याहासाङ धर्मी ठहरीसार लहो इमाङ ल्हेसा। सुये लाहाकी मार्जा खास्ले, होसे बाड्को छान्ने तर सुये लाहाकी बाड्को खास्ले होसे मार्जा छान्ने।”
येशूये जजाकोलाक आशिष याछ
(मत्ती १९:१३-१५; मर्कूस १०:१३-१६)
15वास्टै भर्मीकै लाहा लहो मीजाकोलाक येशूये अट छुम येहे डेम होसको लेठाङ राका। चेलाकै इसे डाङार होखुरीककी हक्कारीया। 16तर येशूये होखुरीककी आर्घार इट डेया, “जजाकोलाक ङा लेठाङ राखी यान्ही, होखुरीककी मारोकडीनी। हीजैडेनाङ परमेश्वरौ राज्य याङ्चकुङ न हो। 17साँच्ची न ङा नाखुरीककी डेले, परमेश्वरौ राज्यकी जजाकै लेखा न ग्रहण माजाट्ठर होला सुर पर्की माह्योक्ले।”
धनी शासक
(मत्ती १९:१६-३०; मर्कूस १०:१७-३१)
18काट जना इस्राएली धनी शासकै येशूकी इट डेम गीना, “ए असल गुरु, सेन र मासीच जीवन डुप्की ङै ही जाट्की पर्ले?” 19येशूये होसकी डेया, “नाको हीजै ङाकी असल डेले? परमेश्वर बाहेक अरु सुर असल माले। 20नाकै परमेश्वरौ व्यवस्थाङ लेच आज्ञा च पट्ट न वार्ल्हे। व्यभिचार माजाट्की, भर्मी मासाट्की, माखुस्की, झूटो गवाही माह्याखी, बोइ-मोइकी आदर जाट्की।”#प्रस्थान २०:१२-१६; व्यवस्था ५:१६-२० 21होचे डेया, “इसे पट्ट न आज्ञा च ङै मार्जा लकीङ न मन्डीचै राछ हो।” 22याङ्च कुरा सेरखीङ येशूये होसकी डेया, “नाकै अझै काट काम जाट्की बाँकी ले। नाकोखाटा लेच पट्ट न ठोक आर्लाम गरीबकोलाक पुङ्ङ यान्ही। नाकुङ स्वर्गाङ धन छान्ने। होटै रान्ही र ङाकी डुट्नी।” 23तर इसे कुरा सेरखीङ होसे साह्रै खीन्न छाना। हीजैडेनाङ होसे अलेख धनी लेया।
24येशूये होसकी ङोसार डेया, “धन-सम्पत्ति लेच भर्मीकोलाक परमेश्वरौ राज्य भित्री पर्की कुडीक साह्रो लेसा। 25धनी भर्मीकी परमेश्वरौ राज्याङ पर्की डेनाङ च बरु उँटकी आर्चौ नाथ्रीयाङ केल्खी सजिलो छान्ने!” 26इसे कुरा सेचकै येशूकी इट डेया, “होटडेनाङ सुये मुक्ति डुप्की ह्योक्ले ट?” 27होसकै डेया, “भर्मीये जाट्की माह्योक्च काम परमेश्वरै जाट्की ह्योक्ले।”
28पत्रुसै डेया, “ङोस्नी, कानै इमको पट्ट न डासार नाकोकी डुट्नने।” 29येशूये होखुरीककी डेया, “साँच्ची न ङा नाखुरीककी डेले, परमेश्वरौ राज्यौ लागि सुये लहो बोइ-मोइ, डाजेभाइ र मीजाको डास्ले, 30होचे चाहाँ न होसे डेनाङ वास्टै डुप्ले। होटै स्वर्गाङ सेन र मासीच जीवन डीन्ल्हे।”
येशूये लहो मृत्युओ बारेयाङ जाट्च भविष्यवाणी
(मत्ती २०:१७-१९; मर्कूस १०:३२-३४)
31येशूये बाह्र जना चेलाकोलाक काटपट्टी आल्हार डेया, “सेनी, काल्हा यरूशलेमपट्टी नुङ्ङ न ले। अगमवक्ताकै भर्मीयो मीजौ बारेयाङ रीक्च पट्ट न कुराको अब ओल्हे। 32होसे रोमी भर्मीकुङ मीहुटाङ पर्ले। होटै होसकी गिल्ला जाट्ले, बेइज्जत जाट्ले र मेठोक ठोक्ले। 33होटै होखुरीकै होसकी कोर्रै ङाप्ले र साट्ले। तर सोमयाकाङ होसे सीच लकीङ फेरि जीवाम सोले।” 34तर चेलाकै इसे कुराको हीर माबुझडीसा। होखुरीकुङ लागि इसे कुरौ अर्थ आर्च्युक्न्या। होटबाटै इसे कुरा होखुरीकुङ मीमनै आर्मीट्की र माह्योका।
मीमीक माडाङ्च भर्मीये डाङ्च
(मत्ती २०:२९-३४; मर्कूस १०:४६-५२)
35येशू यरीहो सहर खेरेप टाहा। होला काट जना मीमीक माडाङ्च भर्मी लामौ छेवाङ ङुवार ङेम्ह ङुमन्या। 36वास्टै भर्मीकुङ भीड होसे न छेउ लकीङ नुङ्चै जाट्च सेयार, “इला ही छान्नन ले?” डेम होचे गीना। 37भर्मीकै होसकी डेया, “नासरतुङ येशू इटै न नुङ्ङ न ले।” 38इसे सेयार होसे मीमीक माडाङ्च भर्मीये साप्फी चीघारीसार डेया, “ए दाऊदौ मीजा येशू ङा मीटाक दया जाट्नी!” 39अगाडि ह्वाचकै होसकी माच्याको डेम हक्कारीया। तर होसे झन् बाड्को स्वरै चीघारीस्चै डेया, “ए दाऊदौ मीजा ङा मीटाक दया जाट्नी!” 40येशू ह्वानाङ-ह्वानाङ न टोङ्हार “होसकी इला राक्नी” डेया। खेरेप राह्रखीङ होसकी येशूये गीना, 41“नाको ही मीमन जाट्ले? ङा नाकुङ लागि ही जाटीङ?” होचे डेया, “प्रभु, ङा मीमीक डाङ्की ह्योकीङ” डेम बिन्ती जाटा। 42येशूये इट डेया, “नाको डाङ्च छान्की क्योट्नी, नाकुङ विश्वासै नाको गेप्मने।” 43होडीक न बेला होचे मीमीक डाङार परमेश्वरौ जय-जयकार जाट्चै येशूओ न्हुङ-न्हुङ ह्वा। इसे डाङार पट्ट न अरु भर्मीकै र परमेश्वरौ जय-जयकार जाटा।
المحددات الحالية:
लूका 18: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
