लूका 11
11
येशूये पाहाक्च प्रार्थना
(मत्ती ६:९-१३; ७:७-११)
1प्रभु येशू कायाक काट ठावाङ प्रार्थना जाट्न ङुमन्या। प्रार्थना जाट्न भ्यारखीङ होसकुङ काट चेलै डेया, “प्रभु, यूहन्नै लहो चेलाकोलाक प्रार्थना जाट्की पाहाक्नाङ लेखा न कानकी र प्रार्थना पाहाक्ङ यान्ही।” 2येशूये होखुरीककी डेया, “नाखुरीकै इटजाट्न प्रार्थना जाट्नी
ए परमेश्वर बोइ,
नाकुङ पवित्र म्यार्मीनौ आदर छान्ख्यो,
नाकुङ राज्य राख्यो,
3 कानकी दिन दिनाङ चहडीस्च ज्याच ठोक यान्ही।
4 कानुङ पाप क्षमा जाट्न यान्ही,
हीजैडेनाङ कान र कानकी मासेछ जाट्चकोलाक क्षमा याल्हे।
कानकी पाप जाट्की लकीङ जोगडीनी।”
5होटै न्हुइङ होसकै होखुरीककी डेया, “इडीक काट भर्मीयो इमाङ आधा राताङ काट पाहुना राहा र मेल्हाखाटा ज्याच ठोक मालेया। मेन लाफा लेठाङ नुङार डेले, ‘लाफा, ङाकी सोम रोटो पैँचो यान्ही, 6हीजैडेनाङ ङौ काट लाफा लोसीङ ङा लेठाङ राम्हने, होटबाटै आसकोकी कास्की ङाखाटा हीर माले।’ 7होटै होसे लाफै भित्री लकीङ न डेले, ‘ङाकी दु:ख माह्यानी। गालाम ठुन्न भ्यामने, र ङा मीजाकोखाटा मीस्न भ्यामने। ङा चाहाँ सोवार नाकोकी हीर याखी माह्योक्ले’।” 8येशूये डेया, “ङा नाखुरीककी डेले, होचे लाफा आर्मीटार माह्यानाङ र एकोहोरो ङेम्ह ङुवा डेनाङ होसे सोले र ङेछ टडीक पट्ट न याल्हे।
9 “होटबाटै ङा नाखुरीककी डेले, ङेहा डेनाङ नाखुरीककी याल्हे, पाले डेनाङ डुप्ले, गालामकी ढ्वाक-ढ्वाक जाटा डेनाङ नाखुरीकुङ लागि गालाम फोस्ले। 10हीजैडेनाङ सुये ङेल्हे होचे डीन्ल्हे, र सुये पाले होचे डुप्ले, र गालामकी सुये ढुस्ले आच्यो लागि फोस्ले। 11ही नाखुरीक मध्याङ कुसेर बोये लहो मीजै डीस्या ङेन्हाङ डीस्यौ सट्टा बुल याल्हे र? 12अथवा मीह्रु ङेन्हाङ बिच्छी याल्हे र? 13नाखुरीक दुष्ट छानार च लहो मीजाकोलाक मजुङ ठोकको याखी वार्ल्हे डेनाङ झन् स्वर्गाङ लेच नाखुरीकुङ बोये कुडीक वास्टै पवित्र आत्मा याल्हे।”
येशूकी शंका जाट्च
(मत्ती १२:२२-३०,४३-४५; मर्कूस ३:२०-२७)
14काट भर्मी भूत लग्डीसार लाटा छानन्या। येशूये होसे भर्मी भित्री लेच भूतकी छ्युक्रखीङ होसे भर्मी ङाक्की ठाला। याङ्च डाङार भर्मीको छक्क पर्या। 15तर होखुरीक मध्याङ कुडीकै चहिँ डेया, “इचे च भूतकुङ राजा बालजिबुल डेचौ शक्तिये भूतकी छ्युक्ले” 16अरु भर्मीकै चहिँ होसकोकी परीक्षा जाट्की डेम स्वर्ग लकीङ काट चिन्ह ङेहा। 17तर होखुरीकुङ मीमनुङ कुरा वाह्रार येशूये डेया, “इडीक कुसेर देशुङ भर्मी लाहा-लाहा पुन्हा डेनाङ होसे देश उजाड छान्ने। होटै योन्च पुन्छ इम र नाश छान्ने। 18होटजाट्न न शैतानको र लाहा-लाहा माखाटा डेनाङ होच्यो राज्य कुटजाट्न ङुम-ङुकी ह्योक्ले र? नाखुरीक ङाकी बालजिबुलौ शक्तिये भूत छ्युक्ले डेले। 19ङा बालजिबुल लकीङ भूत छ्युक्ले डेनाङ, नाखुरीकुङ मीजाकै सुओ शक्तिये होखुरीककी छ्युक्ले? होखुरीकै न नाखुरीकुङ न्याय जाट्ले। 20ङै परमेश्वरौ शक्तिये भूत छ्युक्ले डेनाङ नाखुरीकुङ मीघ्याङ परमेश्वरौ राज्य राम्हभ्यामने। 21काट बलियो भर्मीये हतियार भीरीसार मेन इम रुङा डेनाङ मालमत्ताको माम्हाट्ले। 22तर होसे डेनाङ बलियो भर्मी राहार होसकी डुङार जुवा डेनाङ होच्यो भर पर्च पट्ट न हतियारको स्याट्ले। होटै मालमत्ताको स्याटार आल्हे र लाफाकोखाटा पुङ्ले। 23ङाखाटा मालग्डीस्च भर्मीको ङाकी माजाक्चको हो। होटै सुये ङाकी भेला पार्की मासघडीले होचे भेला पार्च र ख्यास्न याल्हे।
24 “दुष्टआत्मा भर्मी लकीङ ख्योहार नुङ्ले, र होचे सेछ ठाँउको पाम ह्वाले। होटै होचे होङ्च ठाउँ माडुप्नाङ ‘पहिला ङुच ङौ इमाङ न नुङ्ले’ डेम ल्हेस्ले। 25जब होसे ल्हेसार रान्हाङ, होचे होसे इम सीटार सफा जाट्न डाच डुप्ले। 26होटै होचे मेल्हा डेनाङ झन् मासेछ अरु सात वटा दुष्टआत्माकोलाक आर्घाम राक्ले, होटै पट्ट न भित्री पर्ले र बास ङुले। होटै होसे भर्मीयो हालत पहिला डेनाङ न्हुइङ झन् मासेछ छान्ने।”
येशूये साँच्ची न माह्राङ्खी डेम पाहाक्च
27येशूये इसे कुरा पाहाक्चै जाट्नाङ भर्मीकुङ हुद्दा लकीङ काट मास्टोये बाड्को स्वरै डेया, “नाकोकी डीन्हार दुध कास्च मोये वास्टै आशिष डुप्नने।” 28तर येशूये डेया, “परमेश्वरौ वचन सेयार सुये मन्डीले होखुरीक टी आशिष डुप्चको हो!”
भर्मीकै अचम्मौ चिन्ह पाले
(मत्ती १२:३८-४२)
29वास्टै भर्मीको येशूओ वार्लाक-पार्लाक भेला छान्चै नुङा। होटै येशूये होडीक न बेला डेया, “इसे पुस्ता चहिँ दुष्ट पुस्ता हो। इखुरीक अचम्मौ चिन्ह पाले, तर योना अगमवक्तै टान्हाक्च चिन्ह बाहेक इखुरीकै अरु कुसेर डाङ्की माडुप्ले। 30हीजैडेनाङ निनबे सहरौ भर्मीकुङ लागि योना चिन्ह छानन्या। होटजाट्न न भर्मीयो मीजा र इसे भर्मीकुङ लागि चिन्ह छान्ने। 31न्यायौ दिनाङ इसे पुस्तौ भर्मीकोखाटा शेबा डेच दक्षिण देशुङ रानीये सोवार इखुरीककी दोषी ठहरीले, हीजैडेनाङ होसे सोलोमन राजौ ज्ञान बुद्धि सेकी डेम पृथ्वीयो पार्च छेउ लकीङ राम्हन्या। तर ङोस्नी, इला काट जना ले होसे सोलोमन डेनाङ र महान ले। 32निनबे सहरुङ भर्मीकै न्यायौ दिनाङ टोङ्हार छीन्पीहीनुङ भर्मीकोलाक दोष याल्हे, हीजैडेनाङ योनै प्रचार जाट्नाङ होखुरीकै पश्चात्ताप जाटा। तर ङोस्नी, योना डेनाङ र महान काट जना इला ले।”
शरीरौ बत्ती न मीमीक हो डेम येशूये पाहाक्च
(मत्ती ५:१५; ६:२२-२३)
33 “सुयेर बत्ती ढाकार आर्च्युक्ङ माडाले र डालोये र माहुप्ले। तर भित्री राछ भर्मीकोलाक ट्याङ्ख्यो डेम सामदानाङ डाले। 34नाकुङ शरीरौ बत्ती मीमीक हो। नाकुङ मीमीक ठिक ले डेनाङ नाकुङ पट्ट न शरीर ट्याङ्ल्हे तर होसे खराब ले डेनाङ च नाकुङ शरीर र छुम्ल्हे। 35होटबाटै होशियार छान्नी, नाकोखाटा लेच ट्याङ्छ छुम्छ माछान्ख्यो। 36इडीक नाकुङ शरीर ज्योतिये न्हेप्मने र छुम्छ माले डेनाङ, बत्तीये नाकोकी ट्याङ्छ यान्हाङ लेखा न नाकुङ शरीरौ पट्ट न भाकाङ ट्याङ्ल्हे।”
फरिसी र धर्मगुरुकोलाक येशूये चेतावनी याछ
(मत्ती २३:१-३६; मर्कूस १२:३८-४०)
37येशूये इसे कुरा डेम भ्यारखीङ काट जना फरिसी भर्मीये होसकोकी लहो इमाङ ज्यामा-गामा जाट्की डेयार आर्घा। होटै नुङार होसको ज्याकी डेम इम भित्री पर्यार ङुवा। 38तर होसकै मीहुट माहुर्न न ज्याकी पाच डाङार होसे फरिसी भर्मी छक्क पर्या। 39होटै प्रभुये फरिसीकी डेया, “नाखुरीक फरिसीको थाल बेला च बाहिर सेम्हजा ठुट्ले, तर नाखुरीकुङ भित्री मीमन चहिँ लोभ र मासेछ कुराकै न्हेप्च छान्ने। 40ए मूर्खको, सुये बाहिर खासा, होसकै न भित्री र खास्च होइन र? 41नाखुरीकखाटा भित्री ही ले होसे यान्ही, होटै नाखुरीकुङ लागि पट्ट ठोक शुद्ध छान्ने।
42 “नाखुरीक फरिसीकोलाक धिक्कार! पुदिना, आरुद र अरु जडीबुटीकुङ उब्जनी लकीङ दशांश याल्हे, तर न्याय र परमेश्वरकी प्रेम जाट्च कुराकी चहिँ वास्ता न माजाट्ले। होसे अरु कुराको खाट-खाट न नाखुरीकै न्याय, प्रेम र जाट्की पर्नन्या।
43 “नाखुरीक फरिसी भर्मीकोलाक धिक्कार! हीजैडेनाङ यहूदीकुङ सभा ङुच इम-इमाङ नुङार मुख्य भर्मीको ङुच ठावाङ ङुकी पाले र बजाराङ अरुये झोर्ख्यो डेम नाखुरीक मीमन जाट्ले। 44नाखुरीककी धिक्कार! हीजैडेनाङ नाखुरीक माडाङ्च चिहानको ल्याक्च न ले। भर्मीको होसे मीटाक ह्वाच थाहा न माछान्ने।”
45काट जना धर्मगुरुये येशूकी डेया, “गुरु ज्यु, इट डेयार नाकै च कानकी र काराम सेयाका।” 46येशूये डेया, “नाखुरीक धर्मगुरुकोलाक धिक्कार ले! हीजैडेनाङ नाखुरीकै अरुकोलाक चहिँ धर्म-कर्मौ भारी बुकी र माह्योक्ङ बुसाक्ले। तर लाहा चहिँ काट औँलै र होसे भारी माछुले।
47 “नाखुरीककी धिक्कार! नाखुरीकै लहो बोइ बाज्युकै साट्च अगमवक्ताकुङ मजुङ-मजुङ चिहान खास्ले। 48इटजाट्न न नाखुरीक नाखुरीकुङ लहो बोइ बाज्युकुङ कामौ साक्षी ले। होखुरीकै अगमवक्ताकोलाक साटा, होटै नाखुरीकै चहिँ होखुरीकुङ न चिहान खास्ले। 49होटजाट्न पट्ट कुरा वार्छ परमेश्वरै खायाक लकीङ न डेमने, ‘ङा होखुरीक लेठाङ अगमवक्ता र प्रेरितकोलाक बीर्न्हकाले। तर होखुरीकै कुडीककी साट्ले र कुडीककी दु:ख याल्हे।’ 50होटबाटै संसार सुरु छान्च लकीङ चाहाँसम्म साट्च अगमवक्ताकुङ ह्युओ लेखा चहुँङ भर्मीकोखाटा लाले। 51ङा नाखुरीककी डेले, हाबिलकी साट्च बेला लकीङ र मन्दिरौ पूजा जाट्च ठाऔ मीघ्याङ साट्च जकरियासम्मौ अगमवक्ताकुङ ह्युओ लेखा चहुँङ पुस्तुङ भर्मीकोखाटा लाले।
52 “नाखुरीक व्यवस्थौ धर्मगुरुकोलाक धिक्कार! हीजैडेनाङ नाखुरीकै ज्ञानौ साँचा च ला। तर नाखुरीक लाहा र भित्री मापर्या र अरु पर्की पाचकोलाक र पर्की माह्या।”
53होटै येशू नुङ्रखीङ धर्मगुरु र फरिसी भर्मीकै होसकोकी खीस्डीचै ही-ही कुराको गीन्की ठाला। 54र होसकै ङाक्नाङ हीर ल्हीट्ले की डेयार कुरा घोकी डेम दाउ ङोस्न ङुवा।
المحددات الحالية:
लूका 11: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
