लूका 12
12
येशूये चेलाकोलाक चेतावनी याछ
(मत्ती १०:२६-२७)
1होला हील्की माह्योक्ङ वास्टै भर्मीको ढुसा-ढुस जाट्चै भेला छानन्या। होटै येशूये पहिला लहो चेलाकोलाक इट डेया, “नाखुरीक फरिसीकुङ कपटी व्यहोरा लकीङ जोगडीस्नी। होसे कपट चहिँ खमीर ल्याक्च न हो। 2हीजैडेनाङ माडाङ्ख्यो डेम हुप्च ही-ही ले, होसे पट्ट न डाङ्ले होटै आर्च्युक्च ही-ही ले, होसे पट्ट न थाहा डीन्ल्हे। 3इटजाट्न नाखुरीकै छुम्ठाङ ङाक्च कुराको ट्याङ्ठाङ सेले। इम भित्री आर्च्युह्वार खास्याक-खुस्युक ङाक्च कुराको इमौ धुरी लकीङ बाड्को स्वरीङ च्याक्नाङ लेखा न पट्टकै सेले।”
परमेश्वरखाटा बीह्रीखी
(मत्ती १०:२८-३३; १२:३२)
4येशूये डेया, “ए ङौ लाफाको, ङा नाखुरीककी डेले, नाखुरीककी साट्की पाचखाटा माबीह्रीनी। होखुरीकै च शरीरकी मट्टै साट्ले तर अरु हीर जाट्की माह्योक्ले। 5तर सुखाटा बीह्रीखी पर्ले ङा नाखुरीककी डेले, शरीरकी साटार नरकाङ लोम्ह याछ शक्ति लेचखाटा बीह्रीखी पर्ले। हो होसकोखाटा न बीह्रीनी। 6ही नीस पैसाङ बाङा भँगेरा माल्हुम्ले र? होसे मध्याङ काटकी र परमेश्वरै माम्ह्याक्ले। 7तर नाखुरीकुङ च काट-काट मीछाम र हील्नने। होटबाटै माबीह्रीनी, नाखुरीक वास्टै भँगेरा डेनाङ परमेश्वरौ मीमीकाङ नाखुरीक झन् मुल्यवान ले।
8 “सेनी ङा नाखुरीककी डेले, सु-सुये भर्मीकुङ म्याहासाङ ङाकी मन्डीले, होसकी भर्मीयो मीजै र परमेश्वरौ स्वर्गदूतकुङ म्याहासाङ मन्डीले। 9तर सुये ङाकी भर्मीकुङ म्याहासाङ माचीन्डीले डेले, होसकी ङा र परमेश्वरौ स्वर्गदूतकुङ म्याहासाङ माचीन्डीया डेले। 10होटै ङा भर्मीयो मीजौ विरुद्धाङ ङाक्चकोलाक क्षमा छान्ने। तर पवित्र आत्मौ विरुद्धाङ ङाक्चकोलाक क्षमा माछान्ने।
11 “नाखुरीककी भर्मीकै घोवार यहूदीकुङ सभा ङुच इम-इमाङ, हाकिम र शासन जाट्चकुङ म्याहासाङ आल्हे। होडीक बेला नाखुरीकै कुटजाट्न जवाफ याखी र ही डेकी पर्ले डेम चिन्ता माजाट्नी। 12हीजैडेनाङ नाखुरीकै ही डेकी पर्च हो, होडीक न बेला पवित्र आत्मै पाहाक्ले।”
येशूये भर्मीकोलाक लोभी माछान्की डेम चेतावनी याछ
13होटै काट जना भर्मीये होसे भीड लकीङ येशूकी डेया, “गुरु ज्यु, ङौ भाग सम्पत्ति अंशबन्डा जाट्न याखी डेम ङौ डाजेकी डेम यान्ही।” 14तर होसकै डेया, “ए लाफा नाखुरीक डाजेभायो अंशबन्डा जाट्न याखी डेम ङाकी सुये लैडीया?” 15होटै न्हुइङ होला लेच भर्मीकोलाक होसकै डेया, “होस जाट्नी! पट्ट खाल्या लोभ जाट्की लकीङ जोगडीस्नी। हीजैडेनाङ धन-सम्पत्ति कुडीक न वास्टै लेनाङ र होचे भर्मीकी जीवन चहिँ माह्याले।”
16होखुरीककी येशूये काट उदाहरण सेटाक्चै डेया, “काट धनी भर्मीयो ह्याङ साप्फी अन्नको स्या। 17होटै होचे मीमनाङ डेया, ‘ङौ अन्न डाच ठाउँ र माले, अब ङा ही जाटीङ?’ 18होचे आर्मीटा ङा इट जाट्ले, इसे मा-मार्जा ढुकुटीकोलाक भत्कडीयार झन् बा-बाड्को खास्ले। होटै ङौ पट्ट न अन्न र मालमत्ताको होला डाले।” 19ङा ङाल्हौ प्राणकी डेले, “नाङ्की वास्टै वर्षकी ओल्छ सम्पत्ति थुपारीस्नने। सुखखाटा ज्यौ, गौ होटै माह्राङो।”
20तर परमेश्वरै होसकी डेया, “ए मूर्ख भर्मी, छीनीङ नाबीक न नुओ प्राण ह्वाले। होटै नीये लाहाकी डेम ही-ही ठोकको थुपारीमे होसे सुओ छान्ने?” 21इसे कुरा डेम भ्याच न्हुइङ येशूये डेया, “लहो लागि धन-सम्पत्ति भेला जाट्च, तर परमेश्वरौ नजराङ धनी माछान्च भर्मीकोलाक याङ्च न छान्ने।”
चिन्ता माजाट्की
(मत्ती ६:२५-३४)
22होटै न्हुइङ येशूये चेलाकोलाक इट डेया, “इटबाटै ङा नाखुरीककी डेले, जीवाकी मट्टै डेम ही जीङ, ही बील्हीङ डेम चिन्ता मालानी। 23हीजैडेनाङ प्राण ज्याच ठोक डेनाङ र शरीर बढीन डेनाङ बाड्को हो। 24कागकोलाक ङोस्नी! होखुरीकै माभेरेट्ले र अन्न र माबटुलीले। होखुरीकुङ ढुकुटी र माले। होट छान्नाङ र परमेश्वरै होखुरीककी कास्नने। नाखुरीक च ग्वाजाको डेनाङ वास्टै मुल्यौ ले। 25नाखुरीक मध्याङ सुये चिन्ता जाटार लहो आयुकी इठर्जा र ठप्डीकी ह्योक्ले र? 26होटबाटै नाखुरीक इडीक मार्जा काम धरी जाट्की माह्योक्ले डेनाङ, अरु कुरौ चिन्ता हीजै जाट्ले? 27जङ्गलाङ वाट्च सारकी ङोस्नी, होखुरीकै काम र माजाट्ले। होटै बढीन बील्खी बढीनको र माडाक्ले। तर ङा नाखुरीककी डेले, सोलोमन राजा लहो पट्ट इज्जत र धन-सम्पत्ति लेनाङ र आसको सारको लेखा मासिङ्गारीस्नन्या। 28तर छीनीङ वाट्च सार पीउह्राक छोकार म्हेयाङ सीकाक्चकी च परमेश्वरै इटजाट्न सिङ्गारीले डेनाङ, होसकै झन् कुडीक वास्टै सेछ ठोककै नाखुरीककी मासिङ्गारीले र? नाखुरीकुङ विश्वास खोइ? 29होटबाटै नाखुरीक ही जीङ ही गइङ डेम पाम माङुनी र चिन्ता र माजाट्नी। 30परमेश्वरकी माचीन्डीचकै टी याङ्च कुरौ चिन्ता जाट्ले। इसे पट्ट न कुराको नाखुरीककी चहडीस्नने डेयार नाखुरीकुङ परमेश्वर बोये वार्न्हने। 31बरु परमेश्वरौ राज्यकी पानी, होटै इसे पट्ट कुरा र होसकै याल्हे।”
स्वर्गाङ जम्मा छान्च सम्पत्ति
(मत्ती ६:१९-२१)
32येशूये चेलाकोलाक डेया, “ए मार्जा बगाल, माबीह्रीनी! हीजैडेनाङ परमेश्वर बोये मेखोल्हौ राज्यौ अधिकार नाखुरीककी याखी डेम माह्राङ्नने। 33नाखुरीकुङ सम्पत्ति आर्लार हीर मालेचकोलाक यान्ही। लाहाकी डेम सेन र माच्याछ थैली खास्नी। होटै स्वर्गाङ सेन र माभ्याच स्वर्गीय सम्पत्ति बटलीनी। होला खुस र माह्राले, डुये र माज्याले। 34हीजैडेनाङ सम्पत्ति लेच ठावाङ न नाकुङ मीमन र छान्ने।”
चनाखो छानार ङुकी
35होटै न्हुइङ येशूये इट डेया, “लहो कम्मर कसडीयार तयार छान्न ङुनी र बत्ती ढाक्ङ डानी। 36नाखुरीक ब्याहा ज्याकी नुङार ल्हेस्च लहो मालिककी मामीस्न लेन्न ङुच होसे नोकरको ल्याक्च छान्नी। मालिक राहार गालाम ढ्वाक-ढ्वाक जाट्च बित्तिकै गालाम फोम याल्हे। 37नोकरकै लहो मालिक रान्हाङ मामीस्न न लेन्न ङुचबाटै स्याबास डुप्ले। होटै होखुरीक माह्राङ्ले। ङा साँच्ची न नाखुरीककी डेले, होसे मालिकै कम्मराङ पटुका छ्याकार पाहुनाकी लेखा न ज्यामा-गामा खासार नोकरकोलाक सेम्हखाटा डार ज्याकी याल्हे। 38इडीक मालिक ढिलो जाटार नाबीक की ग्वाभाल्या राक्च बेलाङ रान्हाङ र नोकरको मामीस्न न ङुच डुपा डेनाङ झन् वास्टै स्याबास डुप्ले।”
39 “तर इसे आर्मीट्न डानी, इडीक खुस राल्हे डेम थाहा डुप्नाङ च इमुङ मीमुरुङै रुङ्ङ ङुच लेया र खुसकी इमाङ पर्की न माह्याछ लेया। 40होटबाटै नाखुरीक सधैँ तयार ङुनी। भर्मीयो मीजा नाखुरीकै थाहा माडीन्ह मोसोमायाङ राल्हे।”
नीस खाल्या नोकरकुङ उदाहरण
(मत्ती २४:४५-५१)
41होटै पत्रुसै येशूकी गीना, “प्रभु, नाकै इसे उदाहरण कानकी मट्टै डेचकी पट्टकी डेच?” 42होखुरीककी प्रभुये इट डेया, “होसे विश्वासीलो र बुद्धिमानी भण्डार्या सु हो, होसकी न होच्यो मालिकै लहो इमुङ पट्ट न कामको जिम्मा याल्हे र अरु नोकरकोलाक निश्चित समयाङ होखुरीकुङ भाकाङ पर्च ज्याच ठोक याखी डेम खटडीले। 43इमुङ मालिक ल्हेसार रान्हाङ होटजाट्न न काम जाट्न ङुच डुपा डेनाङ झन् होसकी स्याबास याल्हे। 44साँच्ची न ङा नाखुरीककी डेले, मालिकै होसे नोकरकी मेखोल्हौ पट्ट न धन-सम्पत्ति मीटाक अधिकार जाट्की याल्हे। 45तर इडीक नोकरै मेन मीमनाङ ‘ङौ मालिक ढिलो राल्हे’, डेयार ज्याम-गाम म्होरार नोकर नोकरनीकोलाक डुङ्की ठाला डेनाङ 46होच्यो मालिक होचे माआर्मीट्च दिन र घडीयाङ थाहा माडीन्ह झोस टाराल्हे। होटै होसकी बाड्को दण्ड याल्हे र होच्यो दशा विश्वास माजाट्चकुङ ल्याक्च न छान्ने।”
47 “लहो मालिकौ इच्छा वार्न्ह र तयार माङुच र मालिकै अह्रडीच काम माजाट्च नोकरै वास्टै कोर्रा ज्याले। 48तर मालिकौ इच्छा माह्वारार सजाय डुप्च खाल्या काम जाट्च नोकरै चहिँ चेचेस्जा मट्टै कोर्रा ज्याले। सुकी वास्टै याम्हने होसेखाटा वास्टै न लाले र सुकी वास्टै जिम्मा याम्हने होसेखाटा झन् वास्टै ङेल्हे।”
परिवाराङ माखाट्च
(मत्ती १०:३४-३६)
49येशूये डेया, “ङा पृथ्वीयाङ म्हे लैडीकी डेम राछ हो। होसे म्हे च बरु पहिला न सल्कडीस्न भ्यानाङ छान्च लेया! 50काट बाड्को कष्टौ बप्तिस्मा ले होसे ङै लाकी न पर्ले। होसे पूरा माछान्ठर ङा साह्रै व्याकुल ले! 51ङा पृथ्वीयाङ लेच भर्मीकोलाक मेलमिलाप जाटाक्की राछ हो डेम नाखुरीक आर्मीट्ले? तर होइन, ङा भर्मीकोलाक लाहा लाहाङ फाटो जाटाक्की डेम राछ हो। 52हीजैडेनाङ इटै आलाक बाङा जनौ परिवाराङ लाहा लाहाङ न झगडा छान्ने। सोम जना नीस जनौ विरुद्धाङ र नीस जना सोम जनौ विरुद्धाङ सोले। 53बोये लेन्जा मीजाकी, लेन्जा मीजै बोइकी विरोध जाट्ले, होटजाट्न न मास्टो मीजै मोइकी मोये मीजाकी र विरोध जाट्ले, होटजाट्न न मीनीमै मेखोनकी, मेखोनै मीनीमाकी विरोध जाट्ले।”
समयौ लक्षण
(मत्ती १६:२-३; ५:२५-२६)
54येशूये भर्मीकुङ भीडकी डेया, “पश्चिम लाक डेबु सोच डाङ्च बित्तिकै नाखुरीक डेले, ‘अब नामास राल्हे’ होटै होङ्च न छान्ने। 55दक्षिण लकीङ नाम्सु क्योस्नाङ नाखुरीक ‘साप्फी खान्ल्हे’ डेले, होटै होङ्च न छान्ने। 56ए, कपटीको! पृथ्वी र सर्घाकी ङोसार नामास राल्हे की माराल्हे डेम वार्खी च ह्योक्ले, तर इसे समयाङ छान्न राछ घटनौ चिन्ह चहिँ हीजै माह्वार्ले? 57कुसे कुरा सेम्ह हो डेम नाखुरीक हीजै लहे न भाक्की माह्योक्ले?”
58 “सुयेर नाखुरीक मीटाक मुद्दा याहार न्यायाधीश लेठाङ आल्हा डेनाङ होसेखाटा लामाङ न खाट्नी। माखाटा डेनाङ च होचे नाकोकी न्यायाधीश लेठाङ टान्डीयार आल्हे, होटै नाकोकी न्यायाधीशै सिपाहीकी जिम्मा याल्हे। सिपाहीये नाकोकी आल्हार झ्यालखानाङ काम याल्हे। 59ङा नाकोकी डेले, नाकै तेरीकी पर्च पैसा मातेरीठर होटै ख्योखी माढीन्ले!”
المحددات الحالية:
लूका 12: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
