लूका 10
10
येशू प्रभुये बहत्तर जना चेलाकोलाक बीर्न्हकाच
1होस न्हुइङ प्रभु येशूये अरु बहत्तर जना चेलाको भाका। होटै लाहा नुङ्की पाच काट-काट सहर र लाङ्घा-लाङ्घाङ लाहा डेनाङ अगाडि होखुरीककी नीस-नीस जना जाटार बीर्न्हका। 2होसकै होखुरीककी डेया, “सोट्की पर्च फसल च वास्टै ले, तर ह्यामीको चेक्जा मट्टै ले। फसलौ प्रभुकी ह्यामी बीर्न्हकानी डेम प्रार्थना जाट्नी, होसकै लहो फसलाङ ह्यामीको बीर्न्हकाख्यो। 3नाखुरीक नुङ्नी, ङोस्नी ङा नाखुरीककी ब्वाँसाकुङ मीघ्याङ भेडौ पाठाकोलाक लेखा न बीर्न्हकाले। 4नाखुरीकै पैसौ थैली, नाम्जा, जुत्ता, हीर माबुनी र लामाङ सुकीर माझोर्नी।
5 “नाखुरीक कुसे इमाङ पर्ले पहिला न डेनी, इसे इमाङ शान्ति छान्ख्यो। 6इडीक होला शान्ति प्रिय भर्मी लेसा डेनाङ नाखुरीकुङ शान्ति होसेखाटा ङुले, तर माजाक्च लेसा डेनाङ नाखुरीक लेठाङ न ल्हेस्ले। 7होखुरीकै याछ ज्यामा-गामा ज्यार होसे इमाङ न ङुनी। हीजैडेनाङ ह्यामीये लहो ज्याला डुप्की ज्योस्च छान्ले तर इम-इम ह्वाम माङुनी।
8 “नाखुरीक कुसे सहराङ नुङ्ले, होला होखुरीकै नाखुरीककी मान जाटार ज्याकी याछ ठोक ज्यानी। 9होला लेच छाचकोलाक गेपाक्नी, र होखुरीककी डेनी, ‘परमेश्वरौ राज्य नाखुरीकुङ खेरेप राम्हभ्यामने।’ 10तर नाखुरीक कुसेर सहराङ नुङ्नाङ होलुङ भर्मीकै नाखुरीककी मामन्डीले डेनाङ लामाङ ख्योहार डेनी, 11‘कानुङ मीहीलाङ लाछ नाखुरीकुङ सहरुङ झाबुल र कान नाखुरीकुङ विरुद्धाङ खाह्राले। तर नाखुरीकै इसे कुरा वार्न्ही, परमेश्वरौ राज्य खेरेप टाह्रामने।’ 12ङा नाखुरीककी डेले, न्यायौ दिनाङ होसे सहरौ भर्मीकुङ हालत डेनाङ च पापै न्हेप्च सदोम सहरुङ भर्मीकुङ हालत सहडीकी ह्योक्च छान्ने।
विश्वास माजाट्च सहराङ ङुचकुङ दशा
(मत्ती ११:२०-२७; १३:१६-१७)
13 “ए खोराजीन र बेथसेदुङ भर्मीको, नाखुरीककी धिक्कार! नाखुरीकुङ मीघ्याङ जाट्च अचम्मौ कामको टुरोस र सीदोन सहराङ जाट्च लेनाङ होलुङ भर्मीकै पहिला न भाङ्ग्रा # १०:१३ भाङ्ग्रा: घेओ सुटै जाछ काट खाल्या बढीन बील्हार बाडाप मोल्न पश्चात्ताप जाट्च लेया। 14तर न्यायौ दिनाङ नाखुरीकुङ डेनाङ च टुरोस र सीदोनुङ भर्मीकुङ हालत सहडीकी ह्योक्च छान्ने। 15ए कफर्नहुमुङ भर्मीको, ही नाखुरीक स्वर्ग टाहार आदर डुप्ले डेम आर्मीट्ने? नाखुरीक च नरकाङ न टाखी पर्ले।”
16होटै येशूये डेया, “सुये नाखुरीकुङ कुरा सेले होचे ङौ कुरा र सेले। नाखुरीककी मान माजाट्चकै ङाकीर माजाट्ले र ङाकी मान माजाट्चकै ङाकी बीर्न्हकाचकी र माजाट्ले।”
बहत्तर जना चेलाको ल्हेस्न राछ
17येशूये बीर्न्हकाच बहत्तर जना चेलाको ल्हेस्न राहा। होटै माह्राङ्छै डेया, “प्रभु, नाकुङ म्यार्मीनौ शक्तिये भूतको र कानुङ अधीनाङ राहा।” 18होटै होसकै होखुरीककी डेया, “ङै शैतानकी स्वर्ग लकीङ पीझ्यानाङ लेखा न झाल्चै जाट्च डाङा! 19सेनी, ङै नाखुरीककी बुलको र बिच्छीको पीचीच र शत्रुकुङ पट्ट न शक्तिकी जुच अधिकार याम्हे। नाखुरीककी हीये र हानी माजाट्ले। 20तर दुष्टआत्माको नाखुरीकुङ अधीनाङ ले डेम माह्राङ्च होइन। बरु लहो म्यार्मीन स्वर्गाङ रीक्ने डेयार माह्राङ्नी।”
21होटै होडीक न बेला येशू पवित्र आत्मा लकीङ न्हेपार माह्राङ्छै डेया, “ए बोइ, स्वर्ग र पृथ्वीयो परमप्रभु, ङा नाकोकी धन्यवाद याल्हे, हीजैडेनाङ बुद्धि लेचको र वार्छको लकीङ आर्च्युकार डाच कुरा नाकै हीर माह्वार्चकोलाक बुझडीम याहा! ए बोइ, नाकोकी इट जाट्की न सेम्ह सेया।”
22 “ङौ बोये ङाकी पट्ट कुराको जिम्मा याम्हे। बोये बाहेक मीजाकी सुयेर माचीन्डीले। बोइ सु आले डेम मीजै बाहेक सुयेर माचीन्डीले र मीजै बोइकी सु-सुकी चीन्डीयाक्ले होसे भर्मीकै बाहेक सुयेर चीन्डीकी माह्योक्ले।”
23होटै चेलाको पट्टी ल्हेसार येशूये सुटुक्कै डेया, “इसे पट्ट न कुरा डाङ्की डुप्च होखुरीक कुडीक आशिषित ले। कुसे कुरा नाखुरीकै डाङ्ने! 24ङा नाखुरीककी डेले, वास्टै अगमवक्ताको र राजाकै नाखुरीकै डाङ्च इसे कुराको डाङ्की र सेकी वास्टै मीमन जाटा, तर डाङ्की र सेकी माडुपा।”
असल सामरीयौ कथा
(मत्ती २२:३४-४०; मर्कूस १२:२८-३१)
25कायाक धर्मगुरु#१०:२५ धर्मगुरु: परमेश्वरौ नियम मन्डीकी पाहाक्च भर्मी राहार येशूओ मीमन खुस्चै होसकोकी डेया, “ए गुरु, ङाकी डेनी, सेन र मासीच जीवन डुप्की ङै ही जाट्की पर्ले?” 26येशूये होसकी डेया, “नाकै व्यवस्थाङ#१०:२६ व्यवस्थाङ: परमेश्वरै मोशाकी याछ ५ वटा नियमौ किताब रीक्च ही परेसा?” 27होचे डेया, “नाकै लहो परमप्रभु परमेश्वरकी पट्ट मीमन, पट्ट प्राण, पट्ट बल, पट्ट बुद्धिये माया जाट्नी र लहो छिमेकीकोलाक लाहाकी लेखा न माया जाट्नी।”#व्यवस्था ६:५; लेवी १९:१८ 28येशूये होसकी डेया, “नाकै ठिक न डेया। नाकै र होटन जाट्नी, होटै नाकै सेन र मासीच जीवन डुप्ले।” 29तर होसे धर्मगुरुये मेल्हाकी धार्मिक खास्चै डेया, “होटडेनाङ ङौ छिमेकी सु आले ट?”
30येशूये होसकी काट कथा सेटाक्चै डेया, “काट भर्मी यरूशलेम सहरीङ यरीहो पट्टी नुङ्ङ न लेया। होडीक न बेला खुसकै होसकी घोवार नाङ्ग्या खासा। होटै साप्फी डुङार सीकी न जीवाकी पार्न डासार ह्वा। 31कालापाङ होसे न लाम छान्चै पूजाहारी होला टाह्रा। तर होचे घाइत्याकी माडाङ्नाङ लेखा जाटार तर्कडीसार ह्वा। 32होटै कालापाङ लेवी कुलौ काट भर्मी होसे न लाम छान्चै राहा, तर होचे र हीर माडाङ्नाङ लेखा जाटार तर्कडीसार ह्वा। 33होटजाट्न न होसे न लाम छानार अर्को काट सामरी भर्मी होला टाह्रा। होसे घाइत्या भर्मीकी डाङार सामरी भर्मीकी साप्फी रोम सेया। 34होटै होच्यो खेरेप नुङार म्हाङ जैतूनौ सीडी र अङ्गुरौ मद्य कार म्हाकी छ्याक्ङ याहा। होटै होसे भर्मीकी लहो गधा मीटाक काल्हाकार आल्हा। चेक पारी बास ङुच इमाङ टाहाकार होसकी रातभरि स्याहारीया। 35पीउह्राक लेखो ह्वाच बेलाङ होसे सामरी भर्मीये इमुङ मीमुरुङकी डेया, ‘इसकी सेम्हखाटा ङोस्न यान्ही है, अरु माओल्छ पैसा ङा फेरि ल्हेस्न रान्हाङ याल्हे’ डेयार चाँदीयो नीस सिक्का#१०:३५ चाँदीयो नीस सिक्का: नीस याक बराबरौ ज्याला याहा।”
36इसे कथा डेम भ्याच न्हुइङ येशूये धर्मगुरुकी गीना, “होसे सोम भर्मीको मध्याङ सुये चहिँ होसे घाइत्याकी लहो छिमेकीये लेखा सेछ व्यवहार जाटा?” 37होसे धर्मगुरुये डेया, “होसे घाइत्याकी ङोस्च सामरी भर्मीये” होटै येशूये डेया, “नुङ्नी नाको र होटन जाट्नी।”
येशूये मार्था र मरियमकी डुप्च
38येशू र होसकुङ चेलाको नुङ्चै जाट्नाङ काट लाङ्घाङ टाहा। होला होखुरीककी मार्था म्यार्मीन जाट्च मास्टोये लहो इमाङ स्वागत जाटा। 39मार्थौ मरियम डेच काट बहिनी र लेया। होसे चहिँ येशूओ मीकु छेवाङ ङुवार होसकुङ वचन सेम ङुमन्या। 40मार्था चहिँ मेजमान जाट्की डेम ज्यामा, गामा खासा। लहे मट्टै काम जाट्च बाटै होचे येशू लेठाङ राहार डेया, “ए प्रभु, पट्ट न काम ङै न जाट्की पर्या। ङौ बहिनीये ङाकी हीर मासघडीले। ही नाकै माडाङ्ने? होचे र ङाकी सघडीख्यो डेम यान्ही।” 41येशूये जवाफ याहार डेया, “ए मार्था, नाको वास्टै कुराकुङ चिन्ता जाट्ले र व्याकुल छान्ने। 42तर चहडीस्च कुरा काट मट्टै ले, होसे न असल कुरा मरियमै रोजडीमे। होटै होसे कुरा होसे लकीङ सुयेर स्याट्की माह्योक्ले।”
المحددات الحالية:
लूका 10: EMGP
تمييز النص
نسخ
قارن
شارك
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2025 by Mother Tongue Translators Society and Wycliffe Bible Translators, Inc.
