Hosheya 12
12
1Ɛfrayim e gyeng gul sede mwat e gyeng yas,
e kyě gwɔrɔ gûl rak mwa wosho.
Yɛn e gwɛ̌ ha neha bɔs na ragas yol.
Yɛn a wuna hɛn na Asirya,
ko yɛn e nɔngɔ̂s gbɔng gwɔ̀m Misra něy vwel mɛn.
2Dagwi Darwey a vɔk shɔt na Yuda,
Ê tabak Yakɔp tyɛng na begwong beves mɛ,
ko ê tala hɛ tyɛng na tomong ves mɛ arɔng.
3Yimo e jîm neng mɛn a kaba tô bwôl gwa mɛ.
Jeng de a vey mwat ko a ra sekyisa na Dagwi.
4A ra sekyisa na tom-lagwi ko a di wɛng,
a tosho ko a ra won na a sɛ̀ nerat mɛ.
A man na Dagwi e Bet-Ɛl
ko Dagwi a ha na yɛ e hwomo.
5Dagwi Darwey Dâ Jey Mwa,
reza mɛ à Dagwi Darwey!
6Toyo hin vey na Dagwi min.
Gyeng in tsak tɛ̂ yey, na gâs badu e tē,
na yin niri e gyêng Dagwi min.
7Sede jik de a vɔk pyɛ masâ pyɛ́ ye bɔs e vwɔ mɛ,
e simo na a mɔt mɛ bemat.
8Ɛfrayim a ye, “Ey yàa, ma ga tɛ́ me darwey,
ma ga sɛ̀ á to hom nedanerey.
E ji pyɛ̂ nedanerey de ma sɛ̀,
be tɔk sɛ̀ pyɛ cak vyes e ra me de ya sé renɛn wɛt.”
9Ma sé Dagwi Darwey, Dagwi mo,
de a pat o yi e vwêl Misra,
mê tɛ̀ yin a to sangal e bǔk
sede remo de yin e ragas e negasî nzem o.
10Ma ha na bezarap hom na be tusa hin.
Ma dura a yɛn pyɛ́ pyak e ji negwi-ywey,
ko ma ha na gwɔrɔ-há pyak yi na yɛn.
11Ba sé ra banɛn e Gileyat,
ko yɛn ê wey.
Be nása nenɔrɔ̂ bemus e Gilgal,
ko begagbang nása nenɔrɔ̂ yas mɛn o
bê tɛ́ ɛn sede bagwɔt beta e bepǒl cap de ba ga how.
12Yakɔp à kana tele vɔk e vwêl Aram,
ko à ra fwom e hwomo na a sɛ̀ mɛ hwā,
à gyeng tyīmit na a tala mɛ hwā mo.
13Dagwi Darwey à yila zarap mɛ
na a pat BeIsrayɛl yi e vwêl Misra,
ko zarap o à gyeng ɛn.
14BeIsrayɛl ba ga tɛ̀ shôm Dagwi Darwey ye tē puu.
Yaga ano, ê hala banɛ̂n mɔbɔs bemat o wɛt,
ko ê tɛ̀ hâ bɔs mɛn he toyo e ra yɛn.
Currently Selected:
Hosheya 12: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust