Hosheya 13
13
Shɔt Dagwi yè yɛnɛ mo e ra BeIsrayɛl
1Raane e jeng de yerê Ɛfrayim yá hanat
ko bwang BeIsrayɛl bá tɛ̀ bengyip.
Yɛn á nɔ̂ng Ɛfrayim nerey.
Ko mwa ano bá gang ɛ na shɔt yi na sâp ci Baal, ko a ku.
2A remo yɛn a sé re nuyel na ragas banɛn.
Yɛn e yongos cī na dyam shinang,
yɛn e yong yɛ̄ na sekwɛl sizɔng,
pyɛ́ de bemât fwôm vwɔ ba yong.
Yɛn e yâng bemat o, “Nára hin a yɛ nɔrɔ̂ mwat!”
Yɛn e manas ranang na cī mus.
3Yaga ano, bemat o bê kwey sede wut wo bop nagasi,
kɛ sede mwɛngɛ de gwo tanga sogo dey.
Yɛn e kwey sede byɛmɛ de gul gwo pɛsɛl yɛ e gazu,
kɛ sede sekyeng yi e vu-kya.
4Ma sé Dagwi Darwey, Dagwi min,
ma pat in yi e vwêl Misra.
Yin a vɔk Dagwi hwak wɛt, sɛ̌ me.
Vit à mwât sey hwak sɛ̌ me.
5Ma bɛrɛng hin naka e hey,
e vwel de ha hworok na nevît rwak.
6Ko e jeng de yin a yel e vwel rat o,
yin a sirik na pyɛ́,
yin a hwo dak kaa,
ko yin a ye bam à me.
7Yaga ano, mê sè a yin sede gukum,
mê waba me e gwong min sede cwey na me gyeng in.
8Mê hwo e ra yin sede beyar de ba ga hashe nèy wɛ,
ko mê hama rebek min,
mê re in sede gukum.
Mê cɛgɛt hin sede ngyāma vyes.
9Mê wey na yin, à yin BeIsrayɛl!
E wa de ê sɛlɛ hin bet ɛ?
10Yin vemo de yin á ra won, yin á ye,
“Nɔng ot gbɔng gwɔ̀m na bemât nuyel.”
A remo gbɔng gwɔ̀m min á wɛ de ê sey in ɛ?
Bemât nuyêl mwa bapomo min a vɛ de bê gyep in ɛ?
11E ji shom, ma nɔng in gbɔng gwɔ̀m,
ko e ji shom ma to pat ɛ arɔng.
12Ba ga jɛk banɛ̂n Ɛfrayim,
ko ba ga wɔ̀ tik vɛ naka.
13E jeng nepêp tɔ,
a sé hwey sana netsitsɛng —
a kyɛ́ ɛ nà nusu yi e jim o.
14Mê viri hɛn yi e retô kwɔ̂n bevuvwel.
Mê viri hɛn yi e retô reku.
À reku tumbang mo à wɛ arɛt?
À sak, kwɔ̂n wey mo à hɛ ɛ?
Mê wok nemwishish mo wɛt.
15Mwa ano de Israyɛl a sé karak sede sere,
me, Dagwi Darwey mê tomo na gûl rak pwep yi e hêy gbingiring.
Ko gwo tɛ̀ lel nshi na hes mɛn be ye jɔng,
bê hashe mwa pyɛ́ ryat yi e begban mɛn.
16Bemât Samariya bê jut pyɔlɔ̂ banɛn mɛn,
yaga yɛn a ga sogo a Dagwi mɛn na nehywɛ.
Bê wey na bemat mɛ na wal,
bê lagam nèy mɛn e vwel,
ko be vugus beha mɛn de ba vɔk nejim.
Currently Selected:
Hosheya 13: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust