Hosheya 11
11
Tɛ̂ yey Dagwi na BeIsrayɛl
1Jeng de Israyɛl á sè hwey, ma tɛ̀ yey na yɛ,
ko ma yila yɛ hwey hom o yi e vwêl Misra.
2Sede ma gwɛ̌ yila hɛ́,
ko a gwɛ̌ kyè yikyik yi na me.
Ba nása a Baal nenɔrɔ̂ yas,
ko ba rangas a cī pyɛ̂ nesang hyɔɔlɔl.
3Mwa ano de e me de ma masa a Ɛfrayim kwɛngɛl,
ma kaba vɔ mɛ,
ma tɛ̀ ɛ tyang
ko a tɔk wɛt.
4Ma kyè na yɛ na nerat tanga tɛ̂ yey,
ma ra na yɛ sede mwat de a man rwanang na hwey sɛl,
ko ma ye ngyuk na me tɛ̀ a yɛ pyɛ̂ re.
5Yɛn ê to ɛn vɔk e vwêl Misra,
ko vwêl Asirya hê re negwɔm e ra yɛn,
yaga yɛn a kyɛ́ ɛn nà doyo vey na me.
6Bê rùnus bapomo mɛn,
ko bê kwɔrɔs ri ruhup mɛn.
Bê re bemat hom e como mo
yaga báre ves mɛn.
7Yɛn a sé re nuyel na doyo a me ma.
Ko ma tɛ̀ a yɛn swesêk vɔk berɔndɔng.
Ko be yila yaga sɛlɛ,
ko vit a hwak de ê pat gwɛ.
8À Ɛfrayim, yi e rɛ̌ de mê ye waa a hwo ɛ?
Yi e rɛ̌ de mê kyini hwo à Israyɛl ɛ?
Yi e rɛ̌ de mê ye waa a hwo sede Adma ɛ?
E rɛ̌ de mê teshe na yin sede Zɛbɔyim ɛ?
Yey hom yê tik me na me ra ano wɛt!
Nemwishish hom vey na yin na sé pyak sizɔng!
9Mê teshe na yin e ji nepyak shom hom wɛt,
mê to me wey na Ɛfrayim wɛt.
Yaga ma sé Dagwi, ko mwasi wɛt.
Me wɛ ma sé Wo Jɛrɛ, e ji min.
Mê vey na yin na shom wɛt.
10Mê lumla sede gukum e ra bemât repugu min,
ko bemat hom bê vey na be raa me.
Yɛn nèy hom nê tele vey na me yi e rwa ta.
11Yɛn ê tele dey-dey yi e vwêl Misra sede benon,
tanga yi e vwêl Asirya sede bebɔp.
Mê toyo na yɛn na yɛn a ba sangal e ji nelɔ mɛn.
Me Dagwi Darwey ma ha ano.
Dagwi Darwey ê gyong Ɛfrayim na Yuda
12BeƐfrayim ba ga gwɔrɔ me na hâ bɔs,
BeIsrayɛl ba ga gwɔrɔ me na kwɛlɛng.
BeYuda ba sé rɔɔ ra sekyisa na Dagwi,
Me de ma sé Dagwi wo tsak o, wo jɛrɛ arɔng.
Currently Selected:
Hosheya 11: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust