NUMERI 5:1-10
NUMERI 5:1-10 Bybel vir almal (ABA)
Die Here het vir Moses gesê: “Jy moet vir die Israeliete sê: Julle moet elke persoon wegstuur wat melaats is, en ook elkeen wat 'n geslagsiekte het of wat onrein geword het omdat hy aan 'n lyk geraak het. Julle moet daardie mans en vroue wegstuur, julle moet hulle uit die kamp stuur, sodat hulle nie hulle kampe onrein laat word nie, die kampe waar Ek tussen hulle woon.” Die Israeliete het dit gedoen. Hulle het die persone wat onrein is, uit die kamp gestuur. Die Israeliete het gedoen wat die Here vir Moses gesê het. Die Here het vir Moses gesê: “Jy moet vir die Israeliete sê: Wanneer 'n persoon, 'n man of 'n vrou, iets verkeerd doen aan 'n ander mens, dan is hy ontrou aan die Here en dan is daardie persoon skuldig. Hy moet sy sonde bely wat hy gedoen het en hy moet boete betaal omdat hy verkeerd gedoen het. Hy moet dit gee vir die persoon aan wie hy die verkeerde ding gedoen het en hy moet een vyfde meer bysit. As die persoon aan wie hy verkeerd gedoen het, gesterf het, en daar is ook nie iemand wat familie is aan wie hy die boete kan betaal nie, dan moet hy die geld vir die Here gee, en die priester moet dit kry. Maar die persoon wat verkeerd gedoen het, moet ook nog 'n skaap-ram gee. Die skaap-ram moet die offer wees waarmee die priester versoening moet doen vir die persoon.” Die Here het vir Moses gesê: “Wanneer die Israeliete gewyde presente gee om offers te wees, dan moet die priester daarvan kry. Die gewyde presente wat 'n persoon bring, bly sy eie presente, maar hy moet daarvan vir die priester gee wat die priester moet kry.”
NUMERI 5:1-10 Afrikaans 1933/1953 (AFR53)
EN die HERE het met Moses gespreek en gesê: Gee bevel aan die kinders van Israel dat hulle uit die laer wegstuur al die melaatse mense en almal wat 'n vloeiing het, en almal wat deur 'n lyk onrein is. Man sowel as vrou moet julle wegstuur; buitekant die laer moet julle hulle wegstuur, sodat hulle nie hul laer verontreinig waar Ek in hulle midde woon nie. En die kinders van Israel het so gedoen en hulle buitekant die laer gestuur; soos die HERE met Moses gespreek het, so het die kinders van Israel gedoen. VERDER het die HERE met Moses gespreek en gesê: Spreek met die kinders van Israel: As 'n man of vrou enige menslike sonde doen, sodat ontrou teen die HERE gehandel word, en dié siel skuldig word, dan moet hulle hul sonde wat hulle gedoen het, bely; daarna moet hy wat hy skuldig is, ten volle teruggee en die vyfde deel daarvan byvoeg, en hy moet dit aan dié een gee teen wie hy hom skuldig gemaak het. Maar as die man geen losser het aan wie die skuld teruggegee kan word nie, behoort die skuld wat teruggegee moet word, aan die HERE, aan die priester, behalwe die versoeningsram waarmee hy vir hom versoening doen. En elke heffing van al die heilige gawes van die kinders van Israel wat hulle na die priester bring, moet syne wees. En elkeen se heilige gawes — dit moet syne wees: wat iemand aan die priester gee, moet syne wees.
NUMERI 5:1-10 Afrikaans 1983 (AFR83)
Die Here het vir Moses gesê: “Beveel die Israeliete om elkeen uit die kamp uit te stuur wat 'n ernstige velsiekte het of aan 'n geslagsiekte ly, of wat verontreinig is deur aan 'n lyk te raak. Dit geld mans sowel as vrouens. Julle moet hulle buitekant die kamp uit stuur, sodat hulle nie die kamp waarin Ek onder hulle woon, verontreinig nie.” Die Israeliete het toe so gemaak: hulle het die onreines uit die kamp uit gestuur, presies soos die Here vir Moses gesê het. Die Here het aan Moses opdrag gegee om vir die Israeliete te sê: “Wanneer iemand, man of vrou, 'n medemens benadeel en dus ontrou teenoor die Here is, is hy skuldig en moet hy sy sonde bely. Hy moet die volle bedrag van die skade plus 'n vyfde daarvan teruggee aan die persoon wat hy benadeel het. As die benadeelde na sy dood geen familielid het aan wie die skuld betaal kan word nie, kom die bedrag die Here toe en moet dit aan 'n priester gegee word. Afgesien hiervan moet die skuldige nog die ram voorsien waarmee die priester vir die skuldige versoening moet doen.” “Die offergawes wat die Israeliete na die priester toe bring vir die diens van die Here, behoort aan die priester. Die gewyde gawes wat iemand bring, bly sy eie, maar wat die priester toekom, moet aan hom gegee word.”
NUMERI 5:1-10 Die Bybel 2020-vertaling (AFR20)
Die HERE het met Moses gepraat en gesê: “Gee die Israeliete opdrag om elkeen wat 'n velsiekte het en elkeen wat 'n afskeiding het, uit die kamp te stuur, ook elkeen wat onrein is omdat hy aan 'n lyk geraak het. Mans sowel as vroue, moet julle uitstuur. Na die buitekant van die kamp moet julle hulle stuur, sodat hulle nie hulle kamp, waar Ek in hulle midde woon, verontreinig nie.” Die Israeliete het toe so gemaak. Hulle het hulle uit die kamp gestuur. Net soos wat die HERE vir Moses beveel het, so het die Israeliete gedoen. Die HERE het met Moses gepraat en gesê: “ Sê vir die Israeliete, ‘Wanneer 'n man of 'n vrou enige sonde begaan wat 'n mens kan doen, sodat daar ontrou teenoor die HERE gepleeg word, is daardie persoon skuldig. Hulle moet hulle sonde wat hulle gedoen het, bely. Die persoon moet ten volle vergoeding gee vir wat hy verkeerd gedoen het en 'n vyfde daarvan byvoeg. Hy moet dit gee aan wie hy ook al benadeel het. As iemand egter geen naaste familielid het aan wie die skuld vergoed kan word nie, val die verskuldigde bedrag terug aan die HERE. Dit is tot voordeel van die priester, bo en behalwe die ram vir versoening waarmee die priester vir die persoon versoening moet doen. “ ‘Enige •wydingsgeskenk uit al die •heilige gawes van die Israeliete wat hulle na die priester bring, sal syne wees. Elkeen se heilige gawes is sy eie, maar wanneer iemand iets vir die priester gee, behoort dit aan die priester.’ ”
NUMERI 5:1-10 Contemporary Afrikaans Bible 2023 (CAB23)
En die HERE het met Moses gespreek en gesê: Gee bevel aan die kinders van Israel dat hulle elke melaatse man en elkeen wat 'n vloeiing het en elkeen wat deur die dooies verontreinig is, uit die laer wegdryf. Man sowel as vrou moet julle verdrywe; buitekant die laer moet julle hulle uitsit; dat hulle hul laers nie verontreinig in die midde waarin Ek woon nie. En die kinders van Israel het so gedoen en hulle buitekant die laer uitgedryf; soos die HERE met Moses gespreek het, so het die kinders van Israel gedoen. En die HERE het met Moses gespreek en gesê: Spreek met die kinders van Israel: As 'n man of vrou enige sonde doen wat 'n mens doen, om 'n oortreding teen die HERE te doen, en daardie persoon skuldig is; Dan moet hulle hul sonde bely wat hulle gedoen het; en hy moet sy oortreding vergelde met die hoof daarvan, en die vyfde deel daarvan byvoeg en dit gee aan hom teen wie hy oortree het. Maar as die man geen bloedverwant het om die oortreding te vergelde nie, laat die oortreding vergeld word aan die HERE, ja, die priester; by die ram van die versoening, waardeur vir hom versoening gedoen sal word. En elke offergawe van al die heilige gawes van die kinders van Israel wat hulle aan die priester bring, moet syne wees. En elkeen se heiligdom sal syne wees; alles wat iemand aan die priester gee, dit sal syne wees.
NUMERI 5:1-10 Die Boodskap (DB)
Die Here het vir Moses gesê: “Beveel die Israeliete om elkeen wat ’n ernstige velsiekte het, of ’n onnatuurlike liggaamlike uitskeiding, of wat in kontak was met ’n lyk en daarom vir ’n tydperk nie aan godsdienstige aktiwiteite mag deelneem nie, uit die kamp uit te stuur. Dit geld vir sowel mans as vroue. Stuur hulle uit die kamp uit sodat hulle nie die kamp waar Ek by julle is, onrein maak nie.” Die Israeliete het toe die Here se opdrag uitgevoer en al hierdie mense uit die kamp weggestuur. Die Here het toe vir Moses gesê: “Wanneer ’n man of ’n vrou enige sonde doen waarmee hulle ontrou aan die Here is, moet die skuldige persoon sy skuld bely. Verder moet die volle bedrag vir die skade wat die onskuldige gely het, plus ’n verdere twintig persent as skadevergoeding aan daardie persoon terugbetaal word. As die persoon wat skade gely het, reeds dood is en nie ander familie het aan wie die skuld betaal kan word nie, behoort die geld aan die Here. Hierdie bedrag moet saam met die ram, wat geoffer moet word as bewys dat die skuldige jammer is oor sy sondes, aan die priester gegee word. “Al die offers wat die Israeliete na die priester toe bring vir die diens aan die Here, behoort aan die priester. Dit dien as sy inkomste waarvan hy moet leef. Nadat die Here se deel deur die mense wat kom offer aan Hom gegee is, behoort die res aan die priester.”
NUMERI 5:1-10 Nuwe Lewende Vertaling (NLV)
Die HERE het vir Moses gesê: “Sê vir die Israeliete hulle moet enige persoon wat ’n aansteeklike velsiekte het, of wat ’n onreëlmatige afskeiding het, of besoedel geraak het deur aan ’n lyk te raak, uit die kamp uit wegstuur. Dit geld vir sowel mans as vroue. Sit hierdie mense uit die kamp uit sodat die kamp waar Ek tussen julle bly nie deur hulle besoedel word nie.” Die Israeliete het so gemaak en die persone weggestuur soos die HERE gesê het. Die HERE sê toe vir Moses: “Sê vir die Israeliete: Enige man of vrou wat ’n ander persoon verontreg, is ontrou aan die HERE en is skuldig. Hulle moet hulle oortreding bely. Hulle moet die persoon vergoed vir wat hulle aan hom gedoen het en twintig persent bysit wanneer hulle hom vergoed. Indien die benadeelde persoon reeds dood is en daar is nie ander familie vir wie dit gegee kan word nie, behoort dit aan die HERE. Dit moet vir die priester gegee word saam met ’n ram wat geslag kan word sodat die oortreder se sonde vergewe kan word. Alles wat die Israeliete as ’n offer vir God na die priester toe bring, sal aan die priester behoort. Elke ding wat iemand vir God bring, is sy geskenk aan God. Die priester mag dit egter ná die tyd vir homself hou.”