KU̧U̧NAŊMƆ 28
28
1Nɛ́ mɔ'ɔ nɛ̀ Izak saa Jakob, tok de yoŋgo zu a̧, ɓɛɛ tɔ̧ ha̧ a̧: «Ká mɛ́ ba ŋma boko be Kanaŋ nɛ kóò na. 2Mɛ̀ kúr, mɛ̀ yák si bɔkɔ-nú Aram sɛn tɛ ko Bɛtuɛl, dáà ko nàà kɔ-mɛ. Mɛ̀ nɛ́ɛ̀ ba nɛ́ ŋma bem ko Labaŋ nya nàà kɔ-mɛ nɛ kóò. 3Sɔ̧ nɛ a̧a̧ nɛ ŋgayamɔ lɛŋ a̧ tok de yoŋgo zu mɛ;
a̧ a̧ de ha̧ mɛ mɛ ko dɔk siti,
ha̧ mɛ mɛ duk nɛ tugun gíí bíí.
4A̧ a̧ ha̧ de toka yoŋgo ko Abraham
ha̧ mɛ in ha̧ o bezaŋ-mɛ,
ha̧ nù nɛ mɛ ɔ sɛnɛ hee gɛnɛ ga,
mɛ zii nɛ mɛ;
wen nɛ́ nù nɛ GASA WAN baa ha̧ so ha̧ Abraham.»#Ku̧u̧ 17.4-8
5Ɓɛɛ Izak e yuwar ha̧ Jakob mɛ kur yak si sɛn bɔkɔ-nu Aram, si tɛ ko Labaŋ, bem ko Bɛtuɛl, be Aram. Labaŋ nɛ nya Rebeka, naa ko Jakob in Esau.
Esau baa mbe koo
6Esau zɔka'e ndé Izak toka de yoŋgo zu Jakob, ɓɛɛ fo a̧ yaknɛ si sɛn bɔkɔ-nú Aram wen baa kóò, wen ŋgimbi nɛ Izak toka so de yoŋgo zu Jakob, a̧ baa ha̧ so nú ha̧ a̧ nde: «Mɛ beka ba boko be Kanaŋ nɛ kóò na.» 7Esau zɔka ndé, Jakob zia wen nú dáà kɔ‘i in naa kɔ‘i, wen n'aa yaka so si bɔkɔ-nú Aram. 8Esau zɔka'e ndé o boko be Kanaŋ nyɛm see dáà kɔ̧-a̧ Izak na, 9ɓɛɛ a̧ kur nɛ sɛn tɛ Ismaɛl, ɓɛɛ a̧ ba kóò sɛn hi̧i̧, e zu o wan nɛ duka so er-a nɛti. A̧ baa nɛ Mahalat, bem ko Ismaɛl, bem ko Abraham. Mahalat duka nɛ boko-nya Nɛbayot.
Ɔɔ-zu ko Jakob
10Jakob kura Bɛrseba wen yaka-a si nú Haraŋ. 11A̧ hɔɔ ŋma fara hegɔ n'aa iŋ na, ɓɛɛ a̧ ɔ hi̧i̧ wen wese yee so kaɗi. A̧ baa ŋma ta sɛn mbɔɗɔnu fara'i ɛk nɛ zu-a, ɓɛɛ a̧ ɔ ya hi̧i̧. 12A̧ ɔɔ zu fara n'aa zɔk sara-daŋ-mɔ zu nù hegɔɔ hɔ yiwese mɛ, ɓɛɛ o betom ko Sɔ̧ daŋ nɛnɛ in zir nɛnɛ mbɛt.#Jn 1.51 13A̧ zɔka GASA WAN nɛ yor sɛn ti a̧ tɔ̧ nɛ wen ha̧ a̧‘e: «Mi nɛ GASA WAN Sɔ̧ ko Abraham, zɔmdáa kɔ-mɛ, mi nɛ Sɔ̧ ko Izak; fara nɛ mɛ ɔ nù sɛnɛ kinii'i’ɛ, mi ha̧a̧ ha̧ mɛ in o bezaŋ-mɛ mbɛt.#Ku̧u̧ 13.14-15 14O bezaŋ-mɛ tɛ ko dɔk hee fuunu ga, ɛnɛ tɛ dɔk si yee-wese, si daŋa-wese, si ká̧-zan-mɛ́-ŋgɔn in si ká̧-zan-mɛ́-ɗɔɔ mbɛt, ɓɛɛ o tugun bíí zu nù lɛŋ tɛ kpa de toka yoŋgo nɛ ɗoŋ mɛ in o bezaŋ-mɛ.#Ku̧u̧ 12.3; 22.18 15Mi a̧a̧ in mɛɛ, mi tɛ yor ɗoŋ mɛ hɔ fara lɛŋ nɛ mɛ tɛ hɔ, mi tɛ ba mɛ piinɛ ɗoŋ sɛn tɛ nù'ɛ. Mi beka e mɛ duk na hɔ ŋgimbi n'am tɛ de mɔ lɛŋ n'am tɔ̧ɔ̧ nɛnɛ ha̧ mɛ.»
16Jakob tuna tɛ ya, ɓɛɛ tɔ̧: «Nɛ́ kpasawen, GASA WAN a̧a̧ sɛn fara’ɛ, ɓɛɛ mi iŋ so na.» 17Jakob dee kíì, ɓɛɛ tɔ̧: «Wi tɛ yu fara’ɛ yuu. Bo nɛ gee fara na; ɛ̧ɛ̧ nɛ tua ko Sɔ̧ in nú tua daŋa-a si yiwese.»
18Jakob kura mɛ tutuyɛ sut; a̧ baa ta n'aa ee so ɗɔɔ zu-a e ŋgɔn, a̧ tɛna nɔ̧́ a zu-a, 19ɓɛɛ a̧ a nin fara'i'e Bɛtɛl; nɛ wen nɛ tɔ̧ Tua ko Sɔ̧. (Nɛti nin gasa ye fara'i duka nɛ Luz.) 20Jakob ha̧a̧ nú, ɓɛɛ tɔ̧: «Kà Sɔ̧ nɛ́ duka in am, kà a̧ pɛm am tɛ nɔ̀ n'am nɛ'ɛ, kà a̧ nɛ́ ha̧a̧ nyɔŋmɔ ha̧‘m in o laa ha̧‘m mɛ pi̧ tɛ‘m, 21kà‘m nɛ́ pia ɗoŋ nɛ ga̧a̧-see kɔ̧ tua ko dáà kɔ‘m, ɓɛɛ GASA WAN tɛ duk nɛ Sɔ̧ kɔ‘m. 22Ta n'am baa e ŋgɔn’ɛ tɛ duk nɛ tua ko Sɔ̧, ɓɛɛ mi tɛ ha̧ zu-mɔ lɛŋ n’ɛnɛ tɛ ha̧‘m h’ɛ́nɛ́.»
Tans Gekies:
KU̧U̧NAŊMƆ 28: GB11DC
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.