Bage oy fare 3
3
Dam ya go ɗu ne kaŋ ge daage pe
1Swaga ya go ne kaŋ ge daage pe,
kaŋ ge daage da ne na dam suwar pal.
2Dam ya go ɗu ne tolla pe,
dam ɗu ne suya pe.
Dam ya go ɗu ne ɗḭya pe,
dam ɗu ne mbugiya pe.
3Dam ya go ɗu ne hunna pe,
dam ɗu ne zonna pe.
Dam ya go ɗu ne gulla pe,
dam ɗu ne sinna pe.
4Dam ya go ɗu ne fyalla pe,
dam ɗu ne manna pe.
Dam ya go ɗu ne sun ta pe,
dam ɗu ne kaŋ ndalla pe.
5Dam ya go ɗu ne mbal njal uzi pe,
dam ɗu ne kote njal ma digi pe.
Dam ya go ɗu ne abe ta zi pe,
dam ɗu ne kuri abe ta zi pe.
6Dam ya go ɗu ne ɓyareya pe,
dam ɗu ne banna pe.
Dam ya go ɗu ne koyya pe,
dam ɗu ne mbal uzi pe.
7Dam ya go ɗu ne taabeya pe,
dam ɗu ne yarra digi pe.
Dam ya go ɗu ne zaneya pe,
dam ɗu ne farra pe.
8Dam ya go ɗu ne laar wanna pe,
dam ɗu ne kwaneya pe.
Dam ya go ɗu ne pore mballa pe,
dam ɗu ne kat halas pe.
Dok ke kaŋ ma pet kwaɗa
9Ndu ge ne ke temel, ɓol ma kaŋ mam ne yál ge na ne zi ɗaa? 10Mbi ndi kaŋ ge Dok ne hon naa dasana ma kerra ma pet. 11Dok ke kaŋ ge daage na swaga go. Dok é dwatɗa ndu dasana zi ge kwa kaŋ ge ne kale ma, ne kaŋ ge ne mbo mbo ya ma. go no puy ɗe, ndu dasana day wan kaŋ ge Dok ne ke ma, ne pe dolla go ɗiŋ mbo aya go to.
12Mbi kwa go, kaŋ a̰me ge kwaɗa ne ndu dasana pe ge waɗe katɗa laar saal zi ma, ne swaga katɗa ge kwaɗa to. 13Uwale, kadɗa ndu dasana ɓol zamma, ne njotɗa, ka zá̰ tuli ne temel ge na ne ke ma, no a bobo ge Dok ne ho̰ na ne. 14Mbi kwa go, kaŋ ma pet ge Dok ne ke ma a ɗiŋnedin. Kaŋ a̰me ge ndu gwan kan pal, ko ndage uzi to. Dok ke kaŋ mbe ma go no, ne da pe, a sya na vo#Frs 1:7.. 15Kaŋ ge ne ke ma̰ ma no, ko kaŋ ge ne mbo ke dḛ ya ma, a kaŋ ge ne ke dḛ zaŋgal ma ne. Dok gwan’a da ne kaŋ ge dḛ ne bá̰ uzi ma.
Kaŋ ma pet a sú su
16Ndi kaŋ ge mbi ne gwan kwar suwar pal no uwale, kaŋ ge sone gá ne kaŋ ge ne na viya̰ go byalam go ne. Kaŋ ge sone gá ne kaŋ ge dosol byalam go ne.
17Mbi jya̰ tene go: Dok mbo kun sarya ndu ge dosol ma ne ndu ge sone pal. Ago dam ya go ɗu ne kaŋ ge daage pe, Dok mbo kun sarya kaŋ kerra ge daage pal.
18Ne naa dasana ma pe, mbi jya̰ tene go, Dok kugi nama, ndwara ke nama kwarra go, nama be waɗe kavaar ma to. 19Ago pe aya ge naa dasana ma ne, ne ge kavaar ma ne, a kaŋ ge ɗu ne. Nama sḛ ma jwak a sú su. A da ne o̰yom ge ɗu mbe mwaɗak. Ndu dasana be waɗe kavaar to, a no pet, a a̰me pe ne to#Kmb 49:13,21.. 20Kaŋ ma pet a mbo swaga ge ɗu ya. Kaŋ ma pet a ke nama da ne suwar lugɗum, kaŋ ma pet a gwan suwar lugɗum zi#Pe 3:19, Kmb 104:29.. 21A wuɗi kwa ne go, o̰yom ge naa dasana ma ne mbo digi, ge kavaar ma ne ban uzi suwar se ɗaa? 22Mbi kwa go: A golgo ndu dasana e na sḛ ke tuli ne kaŋ ge na ne ke ma, kaŋ ge waɗe no a to. No a na ne ndwara ne. Ndu ge gwan ne na ya kwar kaŋ ge ne mbo kerra na go̰r go ya go ɗaa?
Tans Gekies:
Bage oy fare 3: FGN2013
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
La Bible en langue Kim © Alliance Biblique du Tchad, 2013.