Ездралэн 3-тӥ книгаез 1
1
1-тӥ ЛЮКЕТ
1-3Ездра Левий выжыысь Ааронлэн Елеазар пиезлэн Финеес пиезлэн Авишуй пиезлэн Вориф пиезлэн Уззий пиезлэн Арна пиезлэн Мерайоф пиезлэн Асиел пиезлэн Амария пиезлэн Илий пиезлэн Финеес пиезлэн Ахия пиезлэн Ахитув пиезлэн Садок пиезлэн Шаллум пиезлэн Хелкия пиезлэн Азария пиезлэн Сераия пиезлэн пиез вал, – со Персияын Артаксеркс эксэй дыръя Мидия кунын пленын улӥз. 4Кузё-Инмар дорысь мыным верамын вал: 5«Мын, вера Мынам калыкелы солэн лекесь ужъёсыз сярысь, соослэн пиоссылы вера Мыным пумит, законлы пумит лэсьтэм ужъёссы сярысь, нош соос пиоссылэн пиоссылы мед вералозы; 6уго анай-атайёссылэн сьӧлыкъёссы соос бордын йылӥзы: Монэ вунэтӥзы но мурт инмаръёслы курбон сётъяны кутскизы. 7Ляльчиын улон коркась – Египет музъемысь – Мон ӧй-а потты соосыз? Нош соос Мынэсьтым вожме поттӥзы, Мынэсьтым визь-кенешъёсме кулэтэм каризы. 8Тон йырысьтыд йырсидэ ӵышкы но соос вылэ вань лекез кушты, уго соос Мынэсьтым законме санэ ӧз понэ – серметамтэ-тэрытскисьтэм калык! 9Кинъёслы сомында ӟеч лэсьтӥ, кема-а соосты чидалом на? 10Соослы луыса трос эксэйёсты Мон куяй; фараонэз ляльчиосыныз, вань ожгарчиосыныз валче погыртӥ; 11соослэн азьысьтызы вань язычникъёсты быдтӥ, шундыӝужан палась кык улосвылъёсысь – Тирысь но Сӥдонысь – калыкез пазьги, соослэсь выль тушмонъёссэс быдтӥ. 12Нош соослы тазьы шу: тазьы шуэ Кузё-Инмар: 13”Уго Мон тӥледыз зарезь вамен поттӥ, солэн пыдэстӥз кенерам сюрес лэсьтӥ, тӥледлы азьвалтӥсе Моисеез но Аарон священникез сётӥ, 14тыл юбо пушкы мон тӥледлы югыт сётӥ, тӥ пӧлын трос паймымон ужъёс лэсьтӥ; нош тӥ Монэ вунэтӥды”», – шуэ Кузё-Инмар.
15Тазьы шуэ Дунне Кутӥсь Кузё-Инмар: «Бӧдёноос тӥ понна паймымон тодмет вал. Утиськон понна Мон тӥледлы станъёс сётӥ, нош тӥ отын но ӟургетыса улӥды, 16Мынам нимы понна ӧд шумпотэ, тушмонъёсты кулӥзы-быризы шуыса; та дырозь но ӟургетыса улӥськоды. 17Тӥледлы лэсьтэм ӟеч ужъёсы кытын? Кыр дуннеын кӧтты сюмаку, Мыным тазьы ӧд вазиське-а: 18”Малы Тон милемыз та кыр дуннее вайид? Сютэм виылыны-а? Та кыр дуннеын кулон сярысь, Египет калык дорын ужаса-тыршыса улыны умойгес вал”. 19Ӝожтӥськыса улыкуды, Мон жаляй тӥледыз – сиыны манна сётӥ: кылчинъёслэсь няньзэс тӥ сииды. 20Сюды куасьмыса улыку, изэз ӵогыса, ву ӧй потты-а, сюды юзмамон со ӧз луы-а? Пӧсь шунды ӵушкаку писпу куаръёсын Мон тӥледыз шобыръяй. 21Удалтӥсь музъемъёсыз Мон тӥледлы люкылӥ; хананей, ферезей, филистим калыкъёсты тӥляд азьысьтыды улляй. Мар эшшо тӥледлы лэсьтом на?» – шуэ Кузё-Инмар. 22Тазьы шуэ Дунне Кутӥсь Кузё-Инмар: «Мерра шур дурысь кыр дуннеын улыкуды, сюды куасьмон дыръя тӥ Мынэсьтым нимме сантэмаса улӥды, 23Инмар нимез саптамды понна Мон тӥ доры тыл ӧй лэзьы, – шур вуэ кор-пу понӥ но шурысь вуэз юыны ярамон кари. 24Иаков, мар Мон тыныд лэсьтом? Иуда, тынад тэрытскыса улэмед ӧз поты. Мукет калыкъёс доры улыны выжо но соослы Аслэсьтым нимме сёто, законъёсме утьыса мед улозы шуыса. 25Тӥ Мон дорысь кошкиды бере, Мон но тӥледыз асьтэ поннадэс кельто; Мынэсьтым гажан-жалян курисьёслы жалянме уг возьматы. 26Монэ ӧтьыса вазиськиды ке, Мон тӥледыз уг кылы, уго тӥ асьтэлэсь киостэс вирен саптады, пыдъёсты но, адямиез виён вылысь, мыныны шаплыесь. 27Тӥ Монэ ӧд кельтэ кадь, асьтэдыз асьтэос кельтӥды кадь», – шуэ Кузё-Инмар. 28Тазьы шуэ Дунне Кутӥсь Кузё-Инмар: «Мон тӥледыз сюлворыса ӧй куры-а, кызьы атай пиоссэ сюлворыса куре, кызьы анай нылъёссэ сюлворыса куре, кызьы нуны нонтӥсь вордоно-утялтоно нылпиоссэ сюлворыса куре, 29тӥ Мыным калык мед луоды, Мон тӥледлы Инмар мед луом шуыса, тӥ Мыным пиос мед луоды, Мон тӥледлы Атай мед луом шуыса сюлворыса ӧй куры-а? 30Мон тӥледыз люкай, куреглэн чипыоссэ ас бурд улаз люкамез кадь. Мар али тӥледлы каром? Аслам син азьысьтым улляло тӥледыз. 31Мыным салам-кузьым вайиды ке, ымнырме тӥ палась палэнто, уго праздник нуналъёстэс, выль толэзь потонэз сӥлы карондэс, вандӥськон сям ортчытондэс Мон кулэтэм кари. 32Мон тӥ доры Аслэсьтым ляльчиосме, пророкъёсты, ыстӥ; тӥ соосты кутӥды но виылӥды – мугоръёссэс кесяса куштӥды. Соослэн вирзы кисьтӥськем понна пунэмзэ берыкто», – шуэ Кузё-Инмар.
33Тазьы шуэ Дунне Кутӥсь Кузё-Инмар: «Юртты тырттэм кылемын. Тӧллэн тӧлберез пельтыса нуэмез кадь тӥледыз пазьго, 34пиостылэн пиоссы уз луэ, уго Мынэсьтым курон-косонъёсме кулэтэм каризы, мар Мон азьын уродлык – сое соос лэсьтыса улӥзы. 35Тӥлесьтыд коркаостэс лыктоно калыклы сёто, соос Мон сярысь ӧз ке но кылэ, Мыным оскозы, соослы Мон паймымон тодметъёс ӧй ке но возьматылы, соос быдэстозы сое, мае Мон соослы лэсьтыны косӥ, 36пророкъёсты адӟытэк но асьсэлэсь законлы пумит улэмзэс тодазы ваёзы. 37Вуоно калыклы дэлет сӥзисько, соослэн нылпиоссы, ас синмынызы Монэ адӟытэк, лулынызы Мынам верам кылъёсылы оскизы ке, шумпотыса шулдыръяськозы. 38Озьыен, брат, учкы ни, кыӵе данлык, – шундыӝужанысь лыктӥсь калык шоры учкы, 39соослы Мон азьветлӥсе Авраамез, Исаакез, Иаковез, Осияез, Амосэз, Михеез, Иоилез, Авдиез, Ионаез, 40Наумез, Аввакумез, Софонияез, Аггеез, Захарияез, Кузё-Инмарлэн Кылчинэз шуыса нимам Малахияез сёто».
Tans Gekies:
Ездралэн 3-тӥ книгаез 1: УДМБИБ
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
(c) Библияез берыктонъя Институт, Хельсинки, 2013; 2016