मत्तयाल 19
19
सोडसिट्टिता बारेमते येसु कराहता पोल्लें
(मरकुस 10:1-12)
1इव अन्नि पोल्लें वेहामळ आतारित्ते येसु गालिल एरियाताल पेय्सि योर्दन बेरेडता हब्बेर ओड्डुंक मनना यहुदिया एरियाते होत्तोर. 2अस्के वेल्लेन मंदि ओना पज्जो होत्तुर. येसु ओर्कुन बिमारकुनाल बेस कीतोर.
3अगा इच्चुर परिसिल्कगुडा वातुर. येसुना पट्टु हूळना इंचि, “मूसाना नियम परकारम, बद कारनमताहाटीं अयना मुत्तोन होळसिय्या वच्चा?” इंचि येसुन पूसकीतुर.
4येसु इल्हा जवाब हीतोर, “बस्के अय्ते पेन मनकन कीतानो, अस्केन ओर्कुन मांड्सा मुरतळ इल्हा इंचि कीता. इदु मिमेट हदवा हिल्लिरा? #उत्पत्ति 1:27 5दीनाहाटीं मांड्सा यावन-बाबान होळसिसि, ओना मुत्तोन पीसि मनांतोर. ओर इव्वुर उंदे मेंदुल आसि मनांतुर. 6अदुनहाटीं ओर इव्वुर उंदे मेंदुल आसि मनांतुर. इल्हा पेने ओर्कुन कल्पताहाटीं, मनकल वेरे कियानायो,” इंचि इत्तोर.
7इद केंजसि, “अल्हा अय्ते मरि, मनकल ओना मुत्तोंक सोडसिट्टि हीसि होळसियना आदेस मूसाल बारिंक हीतोर?” इंचि परिसिल्क मर्रा पूसकीतुर.
8अस्के येसु ओर्कुन इल्हा इत्तोर. “मीवा मनसु बंडालेसीं मत्ताहाटीं मूसाल मुत्तोह्कुन होळसिय्या वच्चु इत्तोर, गानि मुन्नेटाल इसोंटा रिवाज मनाहिल्ले. 9नना मीकु वेहासेक गदा, बोरन्ना ओना मुत्तोन बोगमतनमता कारनम तप्पा वेरे कारनमते होळसिसि इंकुंदानतोनि मरमिं आयानय्ते, ओर बोगमतनम कींतोर.” इल्हा इत्तोर.
10इद केंजसि ओना सिस्युल्क ओन, “अय्ते मुत्तो मुय्दोन नड्डुम इसंटा लेक्का मत्ते मरमिं आयाकोंटेन सूटि,” इंचि इत्तुर.
11येसु ओर्कु इल्हा समजांस्तोर, “मिमेट इत्ता पोल्लेतुन ओप्कुनमळ अंटोर्क कुदुरो, गानि बोनकु अय्ते ई पोल्लेन पीसि ताकना ताकत पेन हीतनो ओरे ओप्कुना परांतोर. 12बारित्ते बोरो-बोरो तलुह्कुना पीटाले आडिगुंलोर्क आसि पुटतोर मंतुर, मनकालोरा कयदालगुडा आडिगुंलोर्क आतुर मंतुर, आनि स्वर्ग राज्येमता हेंका इच्चुर मंदि मरमिं आयाकोंटा मंतुर. इंचि बोर्क अय्ते ई पोल्लें नच्चंतंगो ओर इदुन ओपकुनिरकांटी.”
येसु पिलाल्कुंक आसिर्वाद हींतोर.
(मरकुस 10:13-16; लूकाल 18:15-17)
13पजा इच्चुर लोकुल्क ओरा पिलाल्कुनपोर्रो येसु कय इर्सि पारतना कियाना इंचि ओनगा पीसि वातुर, गानि सिस्युल्क ओर्कुन रांगतुर. 14गानि येसु, “पिलाल्कुन नाहेके वायाहीम्ट, ओर्कुन आपमट. स्वर्ग राज्येम इसंटोरदे आंद,” इंचि इत्तोर. 15पजा येसु पिलाल्कुनपोर्रो कय इर्सि अगटाल पेय्सि होत्तोर.
दनवंतुड येसुन पूसकींतोर
(मरकुस 10:17-31; लूकाल 18:18-30)
16वरोर मनकल येसुनगा वासि, “गुरु, बस्केळ्क पिस्सना पिस्वर गावाले मत्ते नना बव बेसता कबाह्क कीते सरे?” इंचि पूसकीतोर.
17अस्के येसु ओन इल्हा इत्तोर, “बेस इत्ते बतल, नाकुन बारि पूसकींतिन? बेसतद अय्ते सिराप पेन उंदे आंद. ओक्कला नीकु बस्केळ्क पिस्सना पिस्वर गावाले अनपिस्ते पेनदा आदेसकुना परकारम ताका,” इत्तोर.
18“बव आदेसकु?” इंचि आ मनकल इत्तस्के, “बोने हव्कमा, बोगमतनम कियमा, दोंगातनम कियमा, आबद्दम गवाइ हियमा, 19नीवा तल्लुर-बाबाना कदर कीम. नीवद निमे बच्चोन पावरम कींतिनो, अचोने पावरम इंकावरोनगुडा कीम.” इंचि येसु वेहतोर.
20अस्के, “नना अय्ते इव अन्नि कीसेकेन वातन, इंका नावा लोप्पो बतल तक्को मंता?” इंचि आ लेय्योड येसुन इत्तोर.
21अस्के येसु इत्तोर. “ओक्कला नीकु सत्तेमते पुरागा आयानद मत्ते, होन, निहगा बतल अय्ते मंता अदुन पूरा अम्मिसि, गरिबोर्कुंक तूसि हीम. अस्के नीकु स्वर्गमते दनम दोर्कार. पजा नहगा वासि ना पज्जो ताका,” इत्तोर.
22गानि ओनगा सोम्मु वेल्लेन मत्ताहाटीं ई पोल्ले केंजसि लेय्योड सिम्मरा आसि पेय्सि होत्तोर.
23अस्के येसु ओना सिस्युल्कुन इल्हा इत्तोर. “नना मीकु निजम वेहांतन, स्वर्ग राज्येमते सिरमंत मनकल होळियमळ इत्ते वेल्लेन कस्टम. 24नना मर्रा वेहांतन, पेनदा राज्येमते सिरमंत मनकल होळियमळकन्ना लोटापेटा सूदि बोंगाताल होनमळ अल्कगा मनंता,” इत्तोर.
25इद केंजसि सिस्युल्कुंक वेल्लेन इचंत्रम आता. अदुनहाटीं, “अय्ते मरि मुक्ति बोर्क दोर्का पर्रंता?” इंचि पूसकीतुर.
26अस्के येसु सिस्युल्कुनहेके हूळसि, “मनकालोरतोनि अय्ते इद आयापर्रो, गानि पेन मात्रम अन्नि किया पर्रंता.” इंचि इत्तोर.
27अस्के पत्रु येसुन इल्हा इत्तोर. “हूळा, मोमोट अय्ते मत्तद-हिलवद अन्नि होळसिसि नीवा पज्जो वातोम. अय्ते माकु बतल दोर्कार?” इत्तोर.
28“नना मीकु निजम वेहांतन, पूना दुनियाते, मनकना रूपमते पुटतोन नना नावा महिमाता राजगद्देपोर्रो उद्दंतन, अस्के नावा पज्जो मनानोर मिमेटगुडा पन्नेंड राजगद्देन पोर्रो उद्दिसि, इस्राएलना पन्नेंड गोत्राल्कुनोरा न्यायम कीकिर. 29अचोने आयका नावाहाटीं बोर अय्ते लोन-दारातुन, दादल-तम्मुह्कुन, अक्कल-हेलाह्कुन, तल्लुर-बाबोन, पिलाल्कुन, इंका बूमिं-जेगान होळसीतुरो ओर्कु आ होळसीतवुंकन्ना नूर अंताल्क एक्को दोर्कार. इंका ओर बस्केळ्क पिस्सना पिस्वरता वारसदार आयानुर. 30गानि मुन्ने मत्तोर वेल्लेटुर पज्जो आयानुर. पज्जोटोर मुन्ने आयानुर,” इंचि येसु ओन इत्तोर.
Tans Gekies:
मत्तयाल 19: esg-Deva
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2022, Wycliffe Bible Translators, Inc. All rights reserved.
