Psalm Late 99
99
Pathian a Lianbel Kumpipa
1 Topa sia kumpipa ahi hi;
tuaciang mihingte liinglawng uh hi.
Ama in Cherub te ii tung sang,
a kumpi tokhum tungah to a, leitung sia kilok hi. #Pu 25:22
2 Topa sia Zion ah thahat hi;
ama sia minam theampo tungah a lianbel ahi hi.
3Mihing sim in, a lian le a vaang
nei ama ii min pok tu uh hi.
Ama thiangtho hi!
4A thahat kumpipa awng, nangma in a maan nate na dei hi;
nangma in Israel ngam sungah thutang khenna omsak zo ni hi;
nangma in thutang le phatna nong paipui hi.
5 Topa ih Pathian pok vun;
a kumpi tokhum mai ah bia vun!
Ama thiangtho hi!
6Moses le Aaron in ama ii thiampite hi a,
Samuel sia ama tungah thu ngen pa ahi hi;
amate in Topa biakpui a, ama in zo kik hi.
7Ama in meeikhuam panin amate paupui hi;
amate tungah ama ii piak
thukhamte le a thupiakte amate in zui uh hi. #Pu 33:9
8 Topa kote Pathian awng, na mite ngetna na zo kik hi;
A mawnate hu in amate daan na piak hial hangin,
mawmaisakna a pia Pathian khat na hi hunlam amate na lak hi.
9 Topa ih Pathian pok vun a,
ama mual thiangtho ah bia vun!
Topa ih Pathian thiangtho hi.
Tans Gekies:
Psalm Late 99: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016