Psalm Late 77
77
Dongtawk Hun sungah Heenepna
1Pathian tungah nging takin ka au hi; nging takin ka au ciang ama in hong za hi.
2Ngimna hun sung
Topa tungah thu ka ngen hi;
zankhuateakin thungen in
ka khut ka laamto hi,
ahihang heenepna
ka mu bua hi.
3Pathian ka ngaisut ciangin ka vuisa hi;
khua ka ngai susut ciang ka thinkiam hi.
4Ama in zankhuateak khangciim in hong koi hi;
ka thinngim mama ahikom ka pau zo bua hi.
5A bosa nite ka ngaisun a,
taanghlai kumte ka phawk hi.
6Zan hunte khua ngaisusutna in ka zangh hi;
ka ngaisusun a, hi bangin keima le keima ka kidongh hi:
7“Topa in hong nial top tu ziam?
Ama in eite dik hong sa ngei nawn ngawl tu ziam?
8Ama in eite
hong it nawn ngawl ziam?
A kamciamte kip
nawn ngawl ziam?
9Pathian in hesuakna a nei tu mangil zo ziam?
A thin uukna taw khuangai huai a sak theina theak zo ziam?
10Tuaciangin, “Na ka sakbel in hi thu ahi hi —
Pathian sia a vaang lian nawn ngawl ci thu hi,” ka ci hi.
11 Topa awng, na nasepna liante ka phawk tu hi;
hun bosa sungah a lamdang na sepnate ka phawk kik tu hi.
12Na sepsa theampo
ka ngaisun tu hi;
a nasia mama na sepna theampo
ka ngaisusun tu hi.
13Pathian awng, na sep na vawt theampo thiangtho hi.
Nang za in a lian pathian om ngawl hi.
14Nangma in nalamdang a vawt Pathian na hi hi;
na thahatna sia minam tuatuamte tungah na lak hi.
15Jacob le Joseph suan na mite,
na vaangletna taw na hun hi.
16Pathian awng, tuite in nangma hong mu ciang lau uh a,
tuipi tawtawngte liing hi.
17Meeikaaite in
nguatui buak suk hi;
van panin vanto ngingkeak a,
khualengte mun theampo ah taangkeak hi.
18Na vanto sia a kipee in ngingkeak a,
khualeng in leitung
taangsak hi;
leitung liingin ngawk hi.
19Tui kihualte tungah na vak hi;
tuipi thuk, na kaantan hangin,
na khuanite a kimu thei bua hi.
20Nangma in Moses le Aaron ii
a uk, na mite sia
tuucingpa bangin
lam na pui hi.
Tans Gekies:
Psalm Late 77: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016