Psalm Late 46
46
Pathian Ei taw Omkhawm
1Pathian in ih belhna le ih thahatna hi a,
ngimna hun sungah hong hun tu in a kinging sa in om tawntung hi.
2Tua ahikom leitung keak a ngawk ngawp a
mualte tuipi thuk sungah a kisep hial zong;
3tuipite hawkin kilok a,
mualte liing ngawp le zong ih lau buatu hi.
4A Saangbel Pa ii inn thiangtho,
Pathian khuapi a lungdamsak ngun khat a om hi.
5Pathian in tua khuapi sungah om a,
tua khuapi a lal ngei buatu hi;
zing khuavak tuungin a hu tu in ama hong pai tu hi.
6Minamte lau uh a, kumpi ngam liinglawng hi.
Pathian aw ngingin, tuaciang leitung tuitham hi.
7 Topa, Vaanglianbelpa in ei taw omkhawm hi;
Jacob ii Pathian sia ih bukna ahi hi.
8Pathian ii sep sa le vawt sate en tu in hong pai tavun;
leitung ah a vawt na lamdangte en in.
9Ama in leitung theampo ah
ngal kidonate thimsak hi;
ama in thalkawngte thiaktan a, teite susia in,
lumte haltham hi.
10“Kisim kidona tawp vun a,
Pathian ka hina hong tel tavun,
minamte ii sungah a lianbel le
leitung ii tungsia ah a lianbel ka hi hi” ci hi.
11Vaanglianbelpa Topa in ei taw hong omkhawm hi.
Jacob ii Pathian sia ih bukna ahi hi.
Tans Gekies:
Psalm Late 46: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016