Psalm Late 39
39
Ngimna Thuak khat ii Mawna Pualaakna
1“Ka sep po kidawmin
seam tong
tuaciang ka leei zongh in
mawna vawtsak bua tong;
mihing ngilote hong nai laitakin
bangma pau bua tong” ka ci hi.
2Ka thim om a, kam khat zongh ka huthe bua hi,
a phate ngawngawn zongh ka son bua hi!
Ahihang ka thuakna sia khang vaial bekin,
3ka thinngim cip hi.
Ka ngaisut a tam vaial ciang, ka thinngim vaial a;
hi bangin dongh ngawlin ka om thei bua hi:
4“Topa awng, bang tanvei nungta tu khi ziam?
Bang hun ciang thi tu khi ziam?
Ka nuntakna bangza in bo pal tu ziam hong son ta'n.”
5Ka khan bangza in hong tomsak zo ni ziam!
Nang muna ah kei ii khan khat sia bangma ngawl bang ahi hi.
A tatakin a nungta mihing khat sia vui muut khat za hi bek a,
6limh khat bang hi lel hi.
Ama sep le vawtte bangma in a kimang bua hi;
ama in nei le lamh khawmtua ahitazong
akua in lua tu ziam ci in a he bua hi.
7Tua ahile Topa awng,
bang lamen thei tu khi ziam?
Ka lametna in nangma sung ahi hi.
8Ka mawna theampo panin hong hun ta'n a,
mihing mawmawte in hong nuisansak heak in.
9Thim takin ka om tu a,
kam khat zongh ka huthe buatu hi,
banghang ziam cile hi bang a,
hong thuaksak sia nangma na hi hi.
10Daan hong pia nawn heak in!
Nong vuakna taw ka thi dek zo hi.
11Ko ii mawnate sia nangma ii
teihna taw daan nong pia hi,
tuaciang koma ii itte sia nget ii
neak bangin na lalsak hi!
A tatakin kote sia
husan khat za kan ha hi bua uh hi!
12 Topa awng, kong thungetna hong za ta'n a,
ka auna hong ngai ta'n;
ka kaa ciangin kei hong hu tu in hong pai ta'n.
Ka taanghpupite theampo bangma in
keima in tawmvei no sung atu bekin na leangna ka hi hi.
13Ka thi ma thinnopna tawm ka nga thei natu in
keima nguak hong omsak ta'n.
Tans Gekies:
Psalm Late 39: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016
