Psalm Late 35
35
Hu natu Thungetna
1 Topa awng, kei hong langpante na langpan in;
kei hong dote na do in.
2Na lum le na thikpuante zamhin
kei hong suatak tu in hong pai ta'n.
3Kei hong delte sangah na tei le na hei hong vik ta'n a,
kei nong hut natu kamciam hong pia ta'n.
4Kei hong tha sawmte in lelna le
maizumna thuak tahen a,
kei hong thasawmte nungkin in lungmang tahen!
5 Topa ii vantunglalang in
a del ciang
amate sia vui ii taangphaw
a letkeak bang hi tahen.
6 Topa ii vantunglalang in a vaat vawk laitakin
amate lampi sia khuazing in leinaal tahen.
7Bangma ahang om ngawl bulin
amate in keima thaang hong sia hi,
tuaciangin kei hong mat natu in vuum thuk khat to uh hi.
8Ahihang amate ii tel ma in, siatna thuak tu a,
amate ii thaang sungah amate awkin lalna sungah taaksuk tu hi.
9Tuasia ciangin keima in Topa hangin ka lungdam tu hi;
banghang ziam cile ama in hong hun hi.
10 Topa tungah “Nang bang ahi kuama om ngawl hi;
a hatte khut sung pan a thazawmte na sungsia a,
a zawngte sia a zothawte khut sung pan na hung hi”
ka thin theampo taw ka ci tu hi.
11Mi ngilote in kei lang ah tetti in hong ding uh a,
ka heak ngawl khialna liante hong suan hi.
12Amate in a pha ka vawtte, a sia taw hong thuk a,
thin kiamin ka topsuk hi.
13Ahihang amate a ciinat uh ciangin khau-ip puan silhin
ka heena taw an ka tang a,
14suapui laipee ahibuale ngualtamh khat atu
thu ka ngetsak tu bangma in kun in thu ka ngen hi.
A nu atu in a tau mihing khat bangin,
tau in a kun sa in ka vavak hi.
15Ahihang ngim ka nga ciang amate lungdam siat a,
hong selno tu in hong kikhawm uh hi;
khualmite in hong vel a hong sasaat hi.
16Peangzawte nunau tu bangin amate in
kei sia etsatna taw hong salh uh hi.
17Topa awng, bang tanvei, hong en thong lalai tu ni ziam?
Amate ii hong simnate pan hong suatak ta'n a,
hi tawpite panin ka nuntakna hong hun ta'n.
18Tuasia ciang na mipawlte kikhopna munah lungdam kong ko tu a,
amate theampo mai ah nang kong pok tu hi.
19Tua a leilot thei ka ngalte sia
kei ii lelna hangin na kisatheisak heak in.
Bangma ahang om ngawl bul a kei hong ensante in
kei ii khuangaina hangin
lungdamna taw hong nuisansak heak in.#Ps 69:4; Jn 15:25
20Amate in ngualtamh bangin pau ngawl uh hi;
kilemna a dei mihingte taw kisai in,
leilot thu a tuatuamte phuak tawm zawsap hi.
21“Nang bang seam cisia hong mu khu hi”
ci in amate au in maw hong suan uh hi.
22Ahihang, Topa awng, nangma in
hite sia na mu sa ahi hi.
Tua ahikom om thim heak in, Topa;
a khuala na ah hong kiheam heak in!
23Topa awng, nangma le nangma hong kithawn ta'n a, hong panpui ta'n;
ka Pathian awng, hong tho ta'n a,
ka thu hong sonsak ta'n.
24 Topa awng, nang sia thutang na hikom
kei, maw ngawl hi ci in hong pualaak ta'n;
ka ngalte in kei tungah hong kisatheisak heak in.
25Amate le amate tungah, “Ama taw kipeal thei hing!
Ih oai bang keak hi!” cisak heak in!
26Kei thuakna tungtaang ah a kisatheite
lel kha ma in na lelsak in a,
lungmang biaibuai tahen;
kei sangin pha a kisa zawte
maizumna le min siatna in tuam tahen.
27Maw ngawl hi ci in
kei tungah thukhensat natu
a mu nuamte in
“Topa bangza in lian ziam!
Ama in a naseampa ii zawna tungah lungkim hi.”
ci in lungdamna taw au kikik tahen.
28Tuasia ciang na thutang ka thangsak tu a,
nitangtumin kong pok tu hi.
Tans Gekies:
Psalm Late 35: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016