Isaiah 32
32
A Thutuum Kumpipa
1Khatvei ciangin thutuumna taw a uk kumpi khat le, thukhaikim thu taw a uk ngam lampuite om tu hi. 2Amate khat simin vui vak ciang le suangval vak ciang belhna le bukna bang hi tu hi. Senneal kongaw ngam sungah luitui luang bang le ngam kolhna munah a om suangpi lian khat ii limh bang hi tu hi. 3Tuaciang amate ii mit le bil in mihing cimawte kisapna mu in, za tu uh hi. 4Amate thintom nawn ngawlin, heakna telthiangna taw diangin, a ci nopte ahi bang tatak son tu uh hi. 5Kuama in mihing mawmaw khat sia zatak huai sa ngawl tu a, mihing tatsia khat sia thumaan kici ngawl tu hi. 6Mihing mawmaw khat in mawmawt kam veu pau in, a sia vawt tu vive ngaisun hi. A nasep le a kampau in Topa selnona vive hi a, ama in ngilkial dangtaakte an le tui pia ngeingawl hi. 7Ngaisutna kicing ngawl pa sia ngilo in, a sia vive vawt hi; leilot thu taw mizawngte suksiat sawmin, a nga tu a kilawmte khaktansak tu sawm hi. 8Ahihang a zatak huai mipa in thumaan takin ngamta a, a maanna sangah kho din hi.
Thukhenna le Kipuuaphat kikna
9Thinngimna nei ngawl, a ol no in, a nungta no numeite awng, ka ci bang hong ngai tavun. 10Tu laitakin lungkim tha tu nu hi, ahihang mai ciang tu hunin sapitngate na law tu uh om ngawl tu a, na thin uh kiam tu hi. 11Thinngimna le nei ngawlin, nuntak ol in na nungta uh hi; ahihang tu in, patau in liing vun! Na puante suutkeak vun a na kawngah puansia lom sawm vun. 12Khuangai in na awm uh beang vun, banghang ziam cile leiphana lote le sapithuante kilalsak zo a, 13lingnguite le lingkungte ka mite ii leitang tungah po zo hi. Mihingte lungdam takin a teenna innte theampo atu le nuntakna a nuam khuapi atu in kap vun. 14Kumpi inn ngawngawn kinusia tu a, khuapi taisan in kiloai tu hi. Innte le amate a dal kulhte a tawntung lalcip tu hi. Tua mun ah ngam laate vakin tuute an zong tu uh hi.
15Ahizong Pathian in ama thaa khatvei ma hong puak kik tu hi. Leisiate leipha suak kik tu a, lo panin an tam mama piang tu hi. 16Ngamsung mun theampo ah thumaan thutang le thukhaikim thu om tu hi. 17Mihing theampo in a maan sia seam tek tu ahikom, kilemna le ngam muanna om tawntung tu hi. 18Pathian ii mihingte in thinngimna te taw kipeal in, a innte sia thinnopna le ngam muanna taw kidim tu hi. 19(Ahihang duisung ah ngial kia in, khuapi sia kicimhthamsak tu hi.) 20An ciin natu tui kicing piikpeak in, laate le khuite a tat natu mun theampo muanhuai ahiciang mihing theampo bang zata in lungdam tu uh ziam?
Tans Gekies:
Isaiah 32: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016