Isaiah 15
15
Pathian in Moab Lalcipsak tu
1Hisia sia Moab taw kisai thupuak khat ahi hi. Zan khat thu in Ar le Kir khuapite kilalcipsak a, Moab ngam thim dide hi. #Is 25:10-12; Jer 48:1-47; Eze 25:8-11; Amo 2:1-3; Zep 2:8-11 2Dibon khua mihingte a thiangtho biakna mun mual tungah kap tu in kaato uh hi. Nebo le Medeba khuapite tungtaang ah khuangai in Moab khua mite nasia takin kap uh hi; a khuangai hu in a samte le a khamulte meet uh hi. 3Lampi tungah a om mite khau-ip puan kisilhsak a; innkhum dawn le khuapi khawlmunte ah a om mite tau in kap uh hi. 4Heshbon le Elealeh khua mite kapin, amate kaana awnging sia Jahaz khua dongin kiza thei hi. Ngalkapte ngawngawn liingin; a hanna teng bo siat hi. 5Ka thin takpi taw Moab atu in ka kap hi! Mihingte Zoar khua le Eglath Shelishiyah ah tai zo uh hi. Pawlkhat te Luhith paina lampi ah kap kawmin paito uh a; pawlkhat ahile Horonaim khua ah suakta a, khuangai in ngamlum siasua uh hi. 6Nimrim Luitui kang hi, tua luihui ah a po lopate vul zo a, lohing mun om nawn ngawl hi. 7Mihingte sia amate ii neisa theampo taw a suatak natu hanciam in Pakngiam Kuam kaantan in pai uh hi. 8Moab ii ngamngi theampo ah kaana awnging kiza hi. Eglaim le Beerelim khuate ah kaana aw kiza hi. 9Dibon khua ah nguntui sia chisan taw kidim a, Pathian in tualai ah a om mite atu in a sia zawlai pawlkhat nei hi. Hi hi, Moab ngam sungah a kikhe lai mi theampo chisan luangin hon kithalupna khat om tu hi.
Tans Gekies:
Isaiah 15: SCB2
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Siyin Chin Bible © Bible Society of Myanmar, 2016