Lev%EDtico 9
9
I ma Aarón kujeq upatan chwach i Dios
1Che uwajxaq ij ma Moisés xeusik'ij ma Aarón, i uk'ojol xaq i kinimaqil i aj Israel. 2Are uri xub'ij che ma Aarón: “Chak'ama jun me' chi klis taj re i sipon re riqb'al kuyb'al mak, xaq chak'ama jun chij ma chi xaq klis taj, re i sipon chi kporoxik chwach i Ajwal. 3Te'uri chab'ij chke i je aj Israel chi kkik'am li jun chab'at ma re i sipon chi re riqb'al kuyb'al mak, jun chij xaq jun me' chi o jujun junab' chke re i sipon chi poroxik re. 4Chik'ama chali jun toro xaq jun chij ma re sujb'al ke chwach i Ajwal, are jun sipon re riqb'al chomb'al ib'; xaq chik'ama li jun sipon re jok'om trigo xaq jok'om cebada chiyot'o li aceite ru'. Man lik wo'or i Ajwal kuk'ut ni rib' chiwe.”
5I je aj Israel xkik'am b'i toro xaq i chij chwaja re i ja re riqb'al ib' ru' i Dios pacha ub'im ma Moisés chke, konojel i je aj Israel lik arewi xetak'i chwach i Ajwal. 6Are uri ma Moisés xub'ij chke: “Iri are utaqom u'anik i Ajwal, lik chi'ana ile, i Ajwal kuk'ut ni uri u'ij uchomal chiwe.”
7Chrijil chik ile are uri ma Moisés xub'ij che ma Aarón: “Chattejeb' chwach i sujb'al sipon, chasujuj asipon re riqb'al kuyb'al mak, man ile lik kporoxik, kuyb'al amak yet xaq re kuyb'al kimak i aj Israel. Rumali xaq chasujuj i sipon chwach i Dios ke i aj Israel winaq xaq chatz'onoj kuyb'al mak pkiwi lik pacha ub'im i Ajwal.”
8Are uri ma Aarón xtejeb' pan chwach i sujb'al sipon xuwor puqul i me', chi are i sipon re riqb'al kuyb'al umak ire. 9Are uri i uk'ojol xkiya pan i kik' che i kiqajaw chi ma Aarón, i ma Aarón xumu uwi u'ab' chupam i kik' le, xusu chke ok'a' re i sujb'al sipon, i kik' chi xk'is taj xutix chuxe' i sujb'al sipon. 10Te'uri xuporoj i xepu puwi i sujb'al sipon, keb' u-riñón xaq i xepu chi o chrij useseb' i chikop chi xsujuxik re riqb'al kuyb'al mak, lik pacha ub'im i Ajwal che ma Moisés. 11I ti' xaq i utz'umalil xujarsaj pa a' k'a naj che i k'ijib'al ipa je o wi aj Israel.
12Te'uri ma Aarón xuwor chik puqul i chij chi kporoxik; xaq i uk'ojol xkik'am chub'i i kik' le che ire, xukitzka pa taq uxukut i sujb'al sipon. 13Xaq xya' pan i ti' che chi attalik rachi'ilam ujolom i chikop, are uri ma Aarón xuporoj ronojel ile puwi i sujb'al sipon. 14Te'uri xuch'aj i rixkol xaq i ra' i chikop le, xaq ronojel xuporoj puwi i sujb'al sipon, junam ru' pacha x-an che i sipon chi xporoxik.
15Are uri ma Aarón xusujuj i sipon ke i winaq chwach i Dios chi are i chab'at ma, re i sipon chi re riqb'al kuyb'al kimak i je aj Israel. Xuwor puqul xaq xusujuj chwach i Dios chi are i sipon re riqb'al kuyb'al mak pacha xu'an che i jun nab'e. 16Are uri xusujuj i chikop re i sipon chi poroxik re chrij pacha utaqom i Ajwal. 17Te'uri xusujuj i sipon ch'irajil, xuk'am jumo'aj xuporoj chwi sujb'al sipon chrijil chik i sipon chi xuporoj saqirik.
18Te'uri ma Aarón xuwor chik puqul i toro xaq xuwor puqul i chij ma, ile are jun sipon re chomb'al ib' ke i je aj Israel. Are uri i uk'ojol xkik'am b'i kik' che, ire xukitzka pa taq uxukut i sujb'al sipon. 19Xaq xuk'am i xepu re i toro; xaq re uje i chij ma, xaq keje i xepu chi o chrij kixkol, ki-riñón xaq i xepu chi o chrij kiseseb', 20xaq xuya i xepu junam ru' uwach kik'ux i chikop le. Te'uri ma Aarón xuporoj chwi sujb'al sipon. 21Xwiri kipechil xaq i ka' wiqab'im, i ma Aarón xwi xusay an chwach i Ajwal. Ile are jun sipon chi xsujuxik pacha ub'im i Ajwal che ma Moisés.
22Ma Aarón xuyak an u'ab' pkiwi i aj Israel xaq xutz'onoj utzil chomal pkiwi. Are xutzin tan usujuxik i sipon re riqb'al kuyb'al mak, sipon chi poroxik re xaq i sipon re chomb'al ib', xel chila ru' i sujb'al sipon. 23Ma Moisés xaq i ma Aarón xe'ok b'i pa ja re riqb'al ib' ru' i Dios. Are xe'el chaloq xkitz'onoj kan utzil chomal pkiwi i aj Israel. Are uri konojel i aj Israel le xkil lo'laj u'ij uchomal i Ajwal. 24Are uri xkilo chi xel jun a' chwach i Ajwal chi xujarsaj b'i chikop chi re sipon poroxik re xaq i xepu chi o puwi i sujb'al sipon.
Are xkil ronojel ile, konojel i je aj Israel xesik'in rumal kikotemal, xaq xexuki chwach, xkiqajsaj kipalaj k'a chwach ulew.
Tans Gekies:
Lev%EDtico 9: ACHICUB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Biblia Achí de Cubulco, Derechos reservados de Sociedad Bíblica de Guatemala