G%E9nesis 48
48
Mam Jacob kuya utzil chomal puwi a Efraín xaq puwi a Manasés
1Are xel keb' oxib' ij ulapanik ma José ru' uqajaw, are uri xb'ix che chi uqajaw lik olya chik, are uri x-e chusolixik xaq xeuk'am b'i keb' uk'ojol ru' chi a Manasés xaq a Efraín. 2Are xb'ix che mam Jacob chi xupon uk'ojol chusolixik lik x-on pen xkub'i an chwi uch'at, 3i xub'ij che ma José:
—I Dios chi is Ronojel ktiki che, xuk'ut rib' chwe che i tinimit Luz, chila che ulew Canaán xaq chila xuya wi utzil chomal pinwi, 4ru' i tziji: “Kin-an ni chawe chi katk'uwalinik, xaq kek'iyar ni amuq axikin, xaq kin-an ni chke amuq axikin le chi ke'on ni k'iyal taq tinimit, xwi ta la ile, xaq chke ike kinya wi kan ulewi ronojel ij saq.” 5Wo'or, i keb' awak'al chi xealax waral Egipto chi a Efraín xaq a Manasés, are k'amaja kink'un yin, ike le lik je wak'al chik, keje pacha ma Rubén xaq ma Simeón. 6Ni'pa kak'uwalij chkijil chik ike le, je awe yet uri; xaq kya' ni kulew kumal i katz chi a Efraín xaq a Manasés. 7Yin are xinpe Padan-aram, i achuch xkam kan chila pa b'e che ulew Canaán, naqaj che i tinimit Efrata, chila xinmuq wi kanoq xukut b'e, chi wo'or, Belén ub'i.
8I mam Israel are xeril pan ak'alab', xutz'onoj che uk'ojol chi ma José:
—¿Je pachin i ak'alab' le?
9Are uri ma José xub'ij che uqajaw:
—Je are wak'al ile chi uya'om i Dios chwe waral pa Egipto.
Are uri mam Israel xub'ij:
—Cheatejeb'saj li wu' man kintz'onoj utzil chomal pkiwi.
10I mam Israel ktzun ti chik mas rumal urijal, rumali keril ti chik i ri umam. Are uri ma José xeutejeb'saj pan ru' uqajaw chi mam Israel, ire xeutz'ub'aj xaq xeutz'ulej. 11Are uri xub'ij mam Israel che ma José chi uk'ojol:
—Inch'ob'om ti yin we k'a kwil awach, xwiri i Dios xu'an chwe chi xaq xwil kiwach uwi inmam.
12Are uri ma José xeresaj i rak'al chuxol uch'ek i kimam, ire xxuki'ik, xuqajsaj upalaj k'a chwach ulew. 13Are uri i ma José xeuk'am pan uk'ojol chekeb'; ru' u'ab' wiqab'im xuchap a Efraín, xaq ru' u'ab' moxim xuchap a Manasés, are u'ankil uri chi a Efraín xkanaj pumoxim umam xaq a Manasés xkanaj puwiqab'im, te'uri xeutejeb'saj ru' uqajaw. 14Xwiri i mam Israel xuya u'ab' wiqab'im puwi a Efraín chi o pumoxim tupu are ire cha'xel, xaq i u'ab' moxim xuya puwi a Manasés chi o puwiqab'im tupu are ire atz. 15Are uri xutz'onoj utzil chomal pkiwi, ru' i tziji:
“I Dios chi xb'in
inmam mam Abraham ru' xaq inqajaw chi mam Isaac,
are i Dios chi uchajim ink'aslemal
are xinalaxik, xaq k'a are o wi wo'or,
16i ángel chi in resam chupam ronojel i utz taj,
chuya ni utzil chomal pkiwi i alab'omi
man kumal ike kkuxtax ni inb'i yin
xaq ub'i etz inmam mam Abraham, xaq etz inqajaw chi mam Isaac;
xaq chek'iyar ni
chwach ulew.”
Xcha.
17I ma José are xrilo chi uqajaw xuya u'ab' wiqab'im puja' a Efraín, xumaj ti uwach; rumali xuchap che u'ab' uqajaw, man kraj ire kujalwachij te'eq, kresaj puja' a Efraín kuya puja' a Manasés. 18Are uri xub'ij che uqajaw:
—Keje ti ile ta, man i juni are nab'e ak'al; rumali chaya a'ab' wiqab'im puja'.
19Xwiri i uqajaw xraj ti xujalwachij u'ab', xub'ij:
—Weta'am loy, weta'am. Xaq umuq uxikin ire le ke'on ni jun nim laj tinimit xaq lik o ni ki'ij. Xwiri i umuq uxikin i ucha' le lik o ni ki'ij chkiwach ike, xaq lik ke'on ni k'iyal taq tinimit.
20Lik che i ij le mam Jacob xuya utzil chomal pkiwi ru' i tziji:
—Are ni utzil chomal iri chi lik arewi kkb'ij ni'pa aj Israel: “I Dios katuchajij na pacha uchajixik a Efraín xaq i a Manasés xu'ano.”
Keje u'anik uri ile chi mam Israel xuya kan a Efraín chunab'eyal. 21Pa k'isb'al re xub'ij mam Israel che uk'ojol chi ma José:
—Yin kamik chik we; xwiri i Dios kk'iji ni iwu' yix, xaq kixutzalijsaj chub'i che kulew iwatit imam. 22Yin kinya ni jub'i' uwi awulew yet chwach ke i awatz acha', are ulew chi xinmaj chke aj Hamor ru' inch'ich' xaq ru' inch'ab'.
Tans Gekies:
G%E9nesis 48: ACHICUB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Biblia Achí de Cubulco, Derechos reservados de Sociedad Bíblica de Guatemala
