%C9xodo 17
17
Ralaxik i ya chwach ab'aj
1Konojel i je aj Israel xe'el chila pa tz'inilik jyub' chaqij chi Sin ub'i. Pa taq tzob'ajil chrij pacha xub'ij i Ajwal chke, xek'iji che i jyub' Refidim, xwiri chila lik nti ya re kkitu' i winaq. 2Are uri i je aj Israel xkikoj uch'ojil che ma Moisés, xkib'ij che:
—Chaya qaya' re kqatu'u —xecha che.
I ma Moisés xub'ij chke:
—¿B'uchak kikoj uch'ojil chwe yin? ¿B'uchak kik'am upam i Ajwal? —Xcha.
3Xwiri i je aj Israel lik kek'atik, rumali xkimayij ti ukojik uch'ojil che ma Moisés, xkib'ij:
—¿B'uchak xojawesaj li pa Egipto, xa kamsab'al b'a qe ri waral che i k'atik junam ku' i qak'al xaq i qachikop? —Xecha.
4Are uri ma Moisés xsik'in chub'ixkil che i Ajwal:
—¡Wach kin-an yin chke i winaqi, man lik xwi chik maja kinkipuk' che ab'aj! —Xcha.
5I Ajwal xub'ij che ma Moisés:
—Chatnab'ej b'i chkiwach i winaq, xaq cheak'ama b'i jujun chke kinimaqil aj Israel awu'. Xaq chak'ama b'i ach'amiy chi xak'ut che i raqana Nilo. Su' chamaja b'i ab'e. 6Yin katwoy-ej ni puwi i nim laj ab'aj chila pa Horeb, yet kab'uj ni ach'amiy chwach i nim laj ab'aj le man kel li ya chupam re kkitu' aj Israel.
I ma Moisés lik keje ile xu'an chkiwach i kinimaqil aj Israel. 7I ma Moisés xuya pub'i i jyub' le Masah xaq Meriba, rumal kich'ojinik aj Israel ru' ma Moisés xaq rumal xkik'am upam i Ajwal man xkib'ij: “¿O i Ajwal chqaxol o ntaj?”
Ch'oj chkij aj Amalec
8I je aj Amalec xeupon chila pa Refidim chu'anik ch'oj chkij aj Israel. 9Are uri ma Moisés xub'ij che ma Josué:
—Cha'ulu b'i jujun chke achiyab', cheak'ama b'i awu' chu'anik ch'oj chkij aj Amalec. Chweq, yin kink'iji ni puwi i jyub', kwok'aj uch'amiy i Dios pin-ab' —xcha.
10I ma Josué xu'ano pacha xb'ix che rumal ma Moisés, x-e pa ch'oj chkij aj Amalec. Xwiri ma Moisés, ma Aarón xaq i ma Hur ike xe'el b'i tzam jyub'. 11Xuk'ulmaj chi are uyakom u'ab' ma Moisés chikaj, are i je aj Israel kech'akanik. Xwiri are kuqajsaj u'ab' are je aj Amalec kech'akanik. 12Xwiri i u'ab' ma Moisés lik kkosik, rumali xkitzukuj jun ab'aj re utem, man kkub'i puwi. I ma Aarón xaq i ma Hur kichapom u'ab' ma Moisés che, jun uchapom u'ab' wiqab'im xaq i jun chik uchapom i moxim. Keje ile lik uyakom u'ab' chikaj k'a are xkub'i i ij chwi jyub'. 13Keje uri ile chi ma Josué xeukamsaj ma Amalec xaq i je rajch'oj ru' ch'ich'.
14Are uri i Ajwal xub'ij che ma Moisés:
—Chatz'ib'aj iri chupam jun wuj man keje ile ksach taj, xaq chab'ij che ma Josué chi lik kinsach ni uwach ronojel ni'pa i kuxtab'al re ma Amalec.
15Are uri ma Moisés juntir xuyijb'a jun sujb'al sipon chi xuya pub'i: Ajwal are pacha ink'ul chi kuk'ut u'ij jun tzob'aj. 16Xaq xub'ij:
“I k'ul chi kuk'ut u'ij jun tzob'aj o pu'ab' i Ajwal
rumali wo'or ku'an ni ch'oj chkij aj Amalec
xaq chkij kimuq kixikin.”
Xcha.
Tans Gekies:
%C9xodo 17: ACHICUB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Biblia Achí de Cubulco, Derechos reservados de Sociedad Bíblica de Guatemala
