Mathiu 3
3
1Ka mȧrey mati Yɔnȧŋ ɔBaftays ɔ wur gbafǝth, kɔ tamǝs ka aŋwula ŋa ro Yudia, ɔ pa, 2Thupi nu, kotȧy-e rȧbȧy ra ro riyana rǝ po fat. 3kotȧy-e ta ɔwe ɔnȧbi Aysayaŋ ɔ fɔf ma ɔ pa,
Ȧrim ra ukin ɔwe gbelegbele ro wula, ɔ pa,
Bɛnɛnɛ nu aroŋ da ɔMarki,
Lompǝs nu asoŋ tɔŋ.
4Yɔnȧŋ ɔ wɔŋ ruma ra aŋfon ŋa ȧyɔkmɛ, ɔwa ɔ senɛ ȧthɛbɛŋ ŋa areka. Ɛdi yɔŋ ɛ yi ɛlama yi rǝmai. 5Ȧŋlɔkɔ ŋati afǝm agbȧthi aŋ kɔ ro ŋɔŋ kǝwur ro Yerusalɛm yi ro Yudia bɛ, yi ka aŋgbaŋ bɛ aŋa fatǝr ro Yɔrdan. 6kɔ baftays ŋa ro Yɔrdan maŋ gbithanɛ ɛhakɛ yaŋ.
7Kɛrɛ ma ɔ nənk aFaresi yi aSadusi agbȧthi aŋ der kȧmȧ ɔ baftays ŋa, ɔ pa ro ŋaŋ, Naŋ, na rȧkomra ra ɛgbɔrɔ, kanɛ maŋ nu tǝ kǝgbukɛ rabaŋ ara mǝ der-e? 8Tiyȧŋ kȧrȧ nu mǝkomi mǝbeki ta kǝthupi. 9Ɔwa te nu nanɛ ka ɛmerȧ ɛ nu kǝpa, Sǝ ba Ebraham ta ɔkas kȧsu; kotȧy-e i kanɛ nu Kuruȧŋ ɔ gbǝli yokas awuth ta Ebraham ka masar ame. 10Ɔwa ka-ake a po thɔ bot kabap ka aŋthǝŋk ŋa ɛyint. Tiyȧŋ, ŋǝnt o ŋǝnt aŋa mǝ te wur mǝkomi mǝfinɔ-e, a tǝ tap ŋi, a tǝ fitha ŋi ro nȧnt.
11Minɛŋ yathi, i baftays nu yi mȧnt ka kǝthupi, kɛrɛ ɔwe mǝ der kǝdarǝŋ kȧmi kɔnɔ thasi mi afɔsɔ. I bek hɛ tǝ kǝwop ɛkɔftha yɔŋ. Ɔ tǝ baftays nu yi ɔYina mǝsǝm yi nȧnt. 12Aŋfuŋa ŋɔŋ aŋ yi ka kȧta kɔŋ, ɔ tǝ gbǝl aŋgbethe ŋɔŋ gbǝraŋ, ɔwa ɔ tǝ thoŋkla apǝla pɔŋ ro fuŋk, kɛrɛ ɛfuk-e, ɔ tǝ thɔi yi rǝ nȧnt nǝte dimsɛ.
13Ȧŋlɔkɔ ŋati Yisɔsȧŋ ɔ wur ro Kalili, ɔ der ro Yɔrdan ka Yɔn, kȧmȧ ɔ baftays kɔ. 14Kɛrɛ Yɔnȧŋ ɔ yema bɛnt kɔ, ɔ pa, Pǝ mar munɔ mǝ baftays mi, kɛrɛ mǝ der ro mi-i? 15Ka Yisɔsȧŋ ɔ pa ro ŋɔŋ, Ta pǝ yi yaŋ ka-ake, kotȧy-e ya pǝ mar sǝ lasǝr mȧlompi bɛ. Kɔ selɔ ɔ baftays kɔ. 16Ma a po baftays Yisɔs-e, ɔlɛmp wati ɔ wur ro mȧnt; ka ȧkȧriyana kǝ kanthɛ, kɔ nənk ɔYina ka Kuru ɔ thor mɔ kǝpǝrǝm ɔ thorǝr kɔ, 17ka rim rǝ wur ka Kuru, rǝ pa, Ɔwe-e, kɔnɔ yi ɔWan kȧmi ubɔthǝr, ka ɔwe i ba mǝbɔnɛ.
Tans Gekies:
Mathiu 3: TMNNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Themne New Testament © The Bible Society of Sierra Leone, 2009.