1 AKORINTHO 11
11
1 #
1 Kor 4.16; Filip 3.17. Inyuĩ tuĩkai a kwĩgerekanagia na niĩ, o ta ũrĩa niĩ na niĩ ndĩĩgerekanagia na Kristo.
2Nĩndakĩmũgatha nĩ ũndũ wa ũrĩa mũndirikanaga maũndũ-inĩ mothe, na mũgatũũra mũrũmĩtie irĩra o ũrĩa ndamũheire cio. 3No nĩngwenda mũmenye atĩrĩ, atĩ mũtwe wa mũndũ mũrũme o wothe nĩwe Kristo; na mũtwe wa mũndũ wa-nja nĩwe mũndũ mũrũme; o na mũtwe wa Kristo nĩwe Ngai. 4Mũndũ mũrũme o wothe ũkũhoya Ngai, kana akaratha ũhoro, ekĩrĩte kĩndũ mũtwe-rĩ, nĩ gũconora egũconorithia mũtwe wake. 5Nake mũndũ-wa-nja o wothe ũkũhoya Ngai, kana akaratha ũhoro, atehumbĩire mũtwe, no gũconora egũconorithia mũtwe wake, nĩ ũndũ no ta ũndũ ũmwe na kwenjwo. 6Mũndũ wa nja angĩkorũo ndekwĩhumbĩra mũtwe-rĩ, kũrengwo nĩakĩrengagwo njuĩrĩ; no rĩrĩ, ongorũo mũndũ-wa-nja kũrengwo njuĩrĩ kana kwenjwo nĩ ũhoro ũrĩ njono-rĩ, nĩakĩĩhumbagĩre mũtwe. 7#Kĩam 1.26,27.Nĩ gũkorũo mũndũ mũrũme we ndaagĩrĩirũo nĩ kwĩhumbĩra mũtwe, kuona atĩ nĩwe mũhianĩre wa Ngai, na nĩ riri wa Ngai onanagia; ĩndĩ mũndũ-wa-nja onanagia riri wa mũndũ mũrũme. 8#Kĩam 2.18-23.Nĩ gũkorũo mũndũ mũrũme ndoimire harĩ mũndũ wa nja, nĩ mũndũ wa nja woimire harĩ mũndũ mũrũme. 9Amu o nake mũndũ mũrũme ndombirũo nĩ ũndũ wa mũndũ-wa-nja, nĩ mũndũ wa-nja wombirũo nĩ ũndũ wa mũndũ mũrũme. 10Tondũ wa ũhoro ũcio-rĩ, mũndũ wa-nja aagĩrĩirũo nĩ gũkoragwo e na rũũri mũtwe rũa atĩ nĩ mwathwo, agĩage naruo nĩ ũndũ wa araika. 11No ningĩ, thĩinĩ wa Mwathani-rĩ, mũndũ wa nja ndeiganĩtie mũndũ mũrũme atarĩ ho, nake mũndũ mũrũme ndeiganĩtie mũndũ wa nja atarĩ ho. 12Tondũ o ta ũguo mũndũ-wa-nja oimire harĩ mũndũ mũrũme-rĩ, no taguo mũndũ mũrũme nake aciaragwo nĩ mũndũ wa nja. No rĩrĩ, kĩhumo kĩa indo ciothe no Ngai. 13Ta gĩĩciriei ũhoro ũyũ, mũtue inyuene: atĩrĩ, nĩgũkĩagĩrĩire mũndũ wa nja ahoe Ngai atehumbĩire mũtwe? 14Kaĩ mũtangĩkĩmenyithio nĩ mĩũmbĩre ya maũndũ arĩ yo, atĩ mũndũ mũrũme gũikara na njuĩrĩ ndaya nĩ ũndũ wa kũmũconorithia? 15No mũndũ-wa-nja gũkorũo arĩ na njuĩrĩ ndaya, harĩ we nĩ riri, nĩ ũndũ njuĩrĩ ĩo yake aheetwo ĩtuĩke ya kũmũhumbĩra. 16No rĩrĩ, ongorũo kũrĩ mũndũ ũkwenda gũkararia-rĩ, nĩamenye atĩ mũtugo ũcio mũgwetete, ithuĩ tũtirĩ naguo, o namo makanitha ma Ngai matirĩ naguo.
17No rĩrĩ, ha ũhoro ũyũ ngũmũtaarĩra rĩu, ndingĩmũgatha; na nĩguo ũyũ, atĩ kũũngana kũrĩa mũũnganaga gũtituĩkaga gwa kũmũguna, tiga o gwa kũmũthũkia. 18Tondũ rĩrĩ, wa mbere, njiguaga atĩ rĩrĩa mũũnganaga kĩũngano-inĩ gĩa kanitha, nĩmũgĩaga na njatũkano, na ũhoro ũcio ndingĩaga kũwĩtĩkia rũere rũmwe. 19Nĩ ũndũ gũtirĩ hingo thĩinĩ wanyu gũtangĩgĩa thiritũ cia kũhĩtithania, nĩguo kũhote gũkũũranwo andũ arĩa a ma arĩa mwĩ nao. 20No tondũ wa ũguo-rĩ, hĩndĩ ĩo mũũnganĩte, kũrĩa irio cia Mwathani gũtingĩhoteka; 21nĩ ũndũ mũkĩrĩa-rĩ, o mũndũ ahiũhaga gũthara irio ciake mwene; mũndũ ũmwe agagĩikara o ahũtiĩ, ũngĩ agakorũo arĩĩtwo. 22Kaĩ mũtarĩ na nyũmba cianyu mũrĩagĩre na mũnyuagĩre kuo? Kana nĩ kũmena mũmenete kanitha wa Ngai, o na mũkenda gũconora andũ arĩa maagĩte indo? Ingĩkĩmwĩra atĩa? Nĩ kũmũgatha ingĩkĩmũgathĩra ũhoro ũcio? Aca-ni, ndingĩmũgatha.
23Nĩ gũkorũo niĩ nĩndamenyithirio nĩ Mwathani ũhoro o ũrĩa ndamũkinyĩirie inyuĩ: atĩ Mwathani Jesu, o ũtukũ ũrĩa aakunyanĩirũo, oire mũgate, 24na aarĩkia gũcokeria Ngai ngatho, akĩwenyũra, akiuga atĩrĩ, ũyũ nĩguo mwĩrĩ wakwa ũheanĩtwo nĩ ũndũ wanyu: ĩkagai ũũ nĩ getha mũndirikanage. 25#Thama 24.8; Jer 31.31-34; Thama 24.6-8.Ningĩ, o ũndũ ũmwe, irio ciarĩkia kũrĩo, akĩoya gĩkombe, akiuga atĩrĩ, Gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa: ĩkagai ũũ hĩndĩ ciothe rĩrĩa mũrĩkĩnyuagĩra, nĩ getha mũndirikanage. 26Nĩ gũkorũo rĩrĩa rĩothe mũkũrĩa mũgate ũcio, na mũkanyuĩra gĩkombe kĩu-rĩ, nĩ kuumbũra mũkuumbũra ũhoro wa gũkua kwa Mwathani, o nginya hĩndĩ ĩrĩa agoka.
27Tondũ wa ũguo-rĩ, mũndũ o wothe ũkũrĩa mũgate ũcio kana ũkũnyuĩra gĩkombe kĩu kĩa Mwathani ũrĩa gũtaagĩrĩire-rĩ, no atuĩke nĩ kwĩhia ehĩtie mwĩrĩ wa Mwathani o na thakame yake. 28Mũndũ nĩaambage gwĩtuĩria wega amenye ũrĩa atariĩ, na aarĩkia gwĩka ũguo-rĩ, arĩe mũgate ũcio na anyuĩre gĩkombe kĩu. 29Tondũ atĩrĩ, mũndũ ũrĩa ũkũũrĩa na gũkĩnyuĩra ategũkũũrana wega ũrĩa mwĩrĩ ũcio ũtariĩ-rĩ, nĩ cira ekwĩigĩra akĩrĩa na akĩnyua ũguo. 30Ũhoro ũcio nĩguo ũtũmaga andũ aingĩ anyu makoragwo mamocete na magaikara ta marũarĩte; ningĩ arĩa makomete ti anyinyi. 31No rĩrĩ, tũngĩkoragwo twĩtuĩrĩtie ithuene tũgagĩkũũrana ũrĩa tũtariĩ-rĩ, tũtingĩtuĩka a gũcirithio. 32No rĩrĩ, twacirithio nĩ Mwathani, tũherithagio nĩ getha tũtikae gũgatuwo ehia hamwe na andũ arĩa a gũkũ thĩ. 33Tondũ ũcio, ariũ a Baba-rĩ, hĩndĩ ĩrĩa mũũnganĩte mũrĩanĩre, etanagĩrĩrai. 34Mũndũ angĩkorũo ahũtĩte-rĩ, nĩaambe arĩe irio gwake mũciĩ, nĩ getha ũhoro ũcio wanyu wa kũũngana hamwe ndũgatuĩke wa gũtũma mwĩigĩre cira. Namo maũndũ marĩa maatigara, nĩngamathondeka rĩrĩa ngoka.
Tans Gekies:
1 AKORINTHO 11: OGKBIBLE
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
©Bible Society of Kenya, 2019