Luka 8
8
1Ku te hi lokuloku anzhako ka lezo, yena i lo nzulanzula mitini ni zimitaneni, na a kanela ni ku tlhatlhambutela ivangeli ya mufumo wa Nungungulu, ni vakhume ni vambiri va wa hi zinwe naye.
2Ni vavasati vo kari lava va nga wa hanyisilwe ka mimoya ya kubiha ni wubabyini: Maria loyi va nge wa le Magdala, loyi ku nga huma ka yena a ntlhanu wa madimoni ni mambiri, Mat. 27:55, 56; Mar. 16:9
3na Johana, a sati wa Kuza a nekwa ya Herodi, na Susana, ni vanwani vo tala, lava va nga va tirela hi zilo zabye.
A mufananiso wa muxwanyi.
4Laha xi nga tsombene a xidlemo xa hombe, hakuva vanhu va le mitini yontlhe va loya ka yena, i lo kanela hi mufananiso, aku: Mat. 13:2; Mar. 4:1
5A muxwanyi i lo huma a ku ya xwanya a mbewu; na a kari a xwanya, a tinwani timbewu ti lo wela ndleleni, ti kanzihelwa hi vanhu; ni tinyanyani ta tilo ti lo ti jowotela.
6Tinwani ti lo wela maribyeni, ti su sasa ku mila, anzhako ti wuna, hakuva ku wa nga hi na nzhongo.
7Tinwani ti lo wela xikari ka mizwa; ni mizwa yi lo kula zinwe nato, yi ti tlimba.
8Kanilezi a tinwani ti lo wela misaveni yo saseka, ti kula, ti pswala hi ka 100. Loku a wulile lezo, i lo vitana, aku: Loyi a nga ni tindleve ta kuzwa, ngha a ingisa.
9A vapizani vakwe va lo mu wutisa, lezaku a mufananiso lowu wu wula yini. Mat. 13:10; Mar. 4:10
10I te ngalo kabye: Nwina mu nyikilwe ku tiva mifihlakalo ya mufumo wa Nungungulu; kanilezi a ka vanwani ku nyikiwa hi mifananiso, kasi hi ku wona va nga woni, hambu vazwa, va nga zi pimi. Isa. 6:9; Mar. 4:12
11A mufananiso lowu wu wula lezi: A mbewu hi mhaka ya Nungungulu.
12Lava va nga le ndleleni hi vona lava va zwileko; zonake kuta Satani, a ta susa a mhaka mbilwini yabye, kasi va fela ku kala va nga kholwi va hanyiswa.
13Lava va nga le maribyeni, hi vona lava na va yi zwile a mhaka, va yi amukela hi kutsaka; kanilezi a va na mitsu; va su kholwa xikhatanyana, ni xikhatini xa minzhingo va su khunguvanyeka.
14Ni leti ti weleko mizweni, hi vona lava va zwileko; kanilezi loku va ti fambela va tlimbiwa hi kukaratekela, ni kufuma ni kutsaka ka kuhanya loku; a va pswali mihanzu yi kala yi buva.
15Kanilezi leyi yi weleko misaveni yo saseka, hi vona lava na va zwile a mhaka, va yi hlayisa hi mbilu yi nene ni yi longamileko, va pswala mihanzu hi kutimisela.
A mufananiso wa kandiya.
16A nga kona munhu a lumekako kandiya a yi fenengeta hi xibya, kutani a yi veka lahasi ka wuriri; kanilezi i yi veka laha mezeni, kasi lava va enghenako va fela ku wona a kuwonekela. Mat. 5:15; Mar. 4:21; Xip. 11:33
17Hakuva a ku na zilo xi fihlilweko, xi ta nga kala ku wonekeliswa; hambu ni xilo xa le xihundleni, lexi xi ta nga kala ku tibyiwa xita kubaseni. Mat. 10:26; Xip. 12:2
18Hikwalaho tlharihani lezaku mu zwisisa kuyini; hakuva loyi a nga nazo, i ta nyikiwa zinwani; kanilezi loyi a nga hiko nazo, i ta tekelwa ni lezi a ngaku i nazo. Mat. 13:12; 25:29; Xip. 19:26
A nyine wa Jesu ni vanakulobye.
19A nyine wa Jesu ni vanakulobye va lota kakwe, kanilezi a va zi kotangi ku tshinela ka yena hi kota ya xidlemo. Mat. 12:46; Mar. 3:31
20I lo byeliwa, aku: A nyine wa wena ni vanakuloni va yimile lahandle, va lava ku ku wona.
21Kanilezi i lo hlamula, aku ngalo kabye: A nyine wa mina ni vanakulori hi vona lava va zwako a mhaka ya Nungungulu, va yi maha.
A bimbi gi miyetiwa.
22Ku te hi ginwe ga lawo masiku, a enghena ngalaveni zinwe ni vapizani vakwe, aku ngalo kabye: A hi yeni tlhatuko wa tiva; va lo suka. Mat. 8:23; Mar. 4:35
23Kota lezi va nga kari va famba i lo etlela; zonake ku si huma a bhubhutsa ga mheho lomo tiveni; va wa talelwa hi mati, va hi mhangweni.
24Vona va lota kakwe, va ta mu vuxa, vaku: Hosi, Hosi, ha lova. I lo vuka, a kawuka a mheho ni kuvindluka ka mati; zi lo gawuka, kuva ni malenga.
25Aku ngalo kabye: Hi kwihi a kukholwa ka nwina ke? Va lo chava, va hlamala, vaku ka munwe ni munwani: Hi yena mani, loyi a layako a timheho ni mati, zi mu ingisa ke?
Munhu wa dimoni a hanyiswa le Gerasa.
26Zonake va lo chikela tikweni ga le Gerasa, lego gi cuwukeneko ni Galilea. Mat. 8:28; Mar. 5:1
27Laha Jesu na humele muhanzeni, i lo tlhangavetwa hi munhu wa le mutini, loyi a nga hi ni dimoni; xikhati xa hombe i wa nga ambalangi tinguwo, a nga tshami ndlwini, kanilezi a tshama zilahleni.
28Laha a nga wona Jesu, i loba huwa, awa lahasi mahlweni ka yena, aku ngalo hi gezu ga hombe: I mhaka muni nzi nga nayo na wena Jesu, Nʼwana wa Nungungulu loyi a nga Hehla-Hehla? Nza ku khongotela, u nga nzi xanisi.
29Hakuva Jesu i wa layile a moya wa kubiha a ku huma munhwini loye; hakuva wu wa mu xanisile hi kale. Va wa mu bohile hi mangenje ni makhotso, va mu lavelela; kanilezi i lo bhewula a ziboho, a yiswa xiwuleni hi dimoni.
30Jesu i lo wu wutisa, aku: Hi wena mani a vito ga wena ke? Wuku ngalo: Nzi Legioni; hakuva madimoni yo tala ma wa enghenile ka yena.
31Ma lo mu khongotela lezaku a nga ma layi a kuya nkeleni wa lieswila. Kuv. 20:3
32Ku wa hi kona a ntlhambi wa makhumba yo tala ma nga kari maga le xitsungeni; a madimoni ma lo mu khongotela lezaku a ma vumela a ku ya enghena ka wona; i lo ma vumela.
33Ma lo huma munhwini loye, ma ya enghena makhumbeni; ni ntlhambi wu lo tsutsumela nzhelelweni wu ya pfunwala tiveni, wu mhemba lomo.
34Laha a varisi va nga wonile lezi zi mahekileko, va lo tsutsuma va ya hlawutela mutini ni le tikweni.
35A vanhu va lo huma a ku ya wona lezi zi mahekileko; laha va nga chikela ka Jesu, va lo kuma a munhu loyi ma humileko ka yena a madimoni, na a tshamile mikonzweni ya Jesu, a ambele, a hi ni kupima kunene; va lo chava.
36Lava va nga zi wonile, va lo hlawutela lezaku i hanyisisilwe kuyini loyi a nga wa hi ni madimoni.
37A vanhu vontlhe va le Gerasa va lo mu kombela a kuva a suka ka vona; hakuva va wa khomilwe hi kuchava ka hombe; zonake Jesu i lo enghena ngalaveni, a tlhela. Mat. 8:34; Miti. 16:39
38Kanilezi a munhu ma nga humele ka yena a madimoni, i lo mu kombela lezaku a famba naye; kanilezi Jesu i lo mu tlhelisa, aku: Mar. 5:18
39Tlhelela kaya ka wena, u ya hlawutela lezaku zi kulisile kuyini lezi Nungungulu a ku maheleko zona. Yena i lo ti fambela, a yaba hungu mutini wontihe hi lezi Jesu a mu maheleko zona.
Jesu a vuxa nʼwana wa Jairo, ni kuhanyiswa ka wasati.
40Laha Jesu a nga wuya a xidlemo xi lo mu tlangela, hakuva vontlhe va wa mu cuwukele.
41Zonake ku lota wanuna a vitwako Jairo, loyi a nga hi murangeli wa sinagoga; a tawa hasi mikonzweni ya Jesu, a mu khongotela a kuta le ndlwini yakwe; Mat. 9:18; Mar. 5:22
42hakuva i wa hi ni nhanyana munwe ntsena a nga hi ni 12 wa malembe, loyi a nga kari a lava kufa; kanilezi laha Jesu a nga wa famba a zidlemo zi lo tsimbeketana ka yena.
43A wasati loyi a nga wa hi ni kuphophoma ka nkhata a khume ga malembe ni mambiri, na a xakele zontlhe lezi a nga hi nazo hi ku lava tinʼanga, a tsanzeka ku chumiwa, Mat. 9:20
44i lota hi lenzhako kakwe, a ta khumba a machakafula ya nguwo yakwe; khalekhale ku su khawuka a kuphophoma ka nkhata wakwe.
45Jesu i te ngalo: Himani a nzi khumbileko ke? Laha vontlhe va nga wa kanetile, Pedro ni vontlhe va nga wa hi naye, vaku: Hosi, a zidlemo za ku tsimbeketa, ni ku ku manya.
46Kanilezi Jesu aku ngalo: I kona a nzi khumbileko; hakuva nzi zwile a ntamu wu humele ka mina. Mar. 5:30; Xip. 6:19
47Laha a wasati loye a nga zi wonile lezaku a nga na ku fihlala, i lota na a rurumela, a tawa mahlweni kakwe, a wula mahlweni ka vanhu a xigelo a nga mu khumba ha xona, ni kuhanyiswa kakwe a xikavikavi xa zalezo.
48Jesu aku ngalo kakwe: Nwananga, a kukholwa ka wena ku ku hanyisile, famba hi kurula.
49Laha na a ha wulawula, ku lota munwe hi le ndlwini ya murangeli wa sinagoga, a taku: A nhanyana wa wena i file; u nga ha karati Mugonzisi. Mar. 5:35
50Kanilezi Jesu na a zizwa, aku kakwe: U nga chavi, kholwa ntsena, i ta hanya.
51Laha na a chikele le ndlwini, a nga vumelangi munhu a kuva a enghena naye, ahandle ka Pedro, na Johani, na Jakobe, ni raru wa nhanyana ni nyine wakwe.
52Vontlhe va wa hi xirilweni, va mu rilela; kanilezi Jesu i te ngalo: Mu nga rili; hakuva a nga fangi, i etlele. Joh. 11:11, 13
53Va lo mu hleka, na va zi tiva lezaku i file.
54Kanilezi yena i lo mu khoma hi canja, a vitana hi gezu ga hombe, aku: Nhanyana, vuka! Xip. 7:14; Joh. 11:43
55A moya wakwe wu lo wuya, a hatla a vuka; zonake Jesu i lo laya lezaku ngha a nyikiwa zakuga.
56Ni vabeleki vakwe va lo hlamala nguvu; kanilezi yena i lo va laya lezaku va nga byeli munhu hi lezi zi mahekileko. Mat. 8:4; 9:30; Mar. 5:43
Tans Gekies:
Luka 8: TSC72
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Tshwa Bible © Bible Society in Mozambique, 1972, 2007.
